رامزان قادىروۆتىڭ 23 جاستاعى قىزى حاديجات (كارينا) شەشەنستان باسشىسى مەن ۇكىمەتى اكىمشىلىگى جەتەكشىسىنىڭ ءبىرىنشى ورىنباسارى بولىپ تاعايىندالدى.

بۇل تۋرالى قادىروۆتىڭ ءوزى تەلەگرام-ارناسىندا حابارلادى.

قادىروۆتىڭ ايتۋىنشا، حاديجات الەۋمەتپەن بايلانىسقا جاۋاپتى بولادى. بۇعان دەيىن حاديجات گروزنىي قالاسى مەكتەپكە دەيىنگى ءبىلىم دەپارتامەنتىنىڭ باسشىسى قىزمەتىن اتقارعان.

2023 جىلعى قازاندا قادىروۆ حاديجاتقا «الەۋمەتتىك سالاداعى ۇزدىك جۇمىسشى» قۇرمەتتى اتاعىن بەرگەن. سول ايدا ونىڭ كۇيەۋى ادام الحانوۆ شەشەنستان دەنساۋلىق ساقتاۋ مينيسترلىگىن باسقارعان.

2021 جىلى حاديجات قادىروۆا «شەشەنستانعا سىڭىرگەن ەڭبەگى ءۇشىن» مەدالىن، ال 2022 جىلى احماد قادىروۆ اتىنداعى وردەن العان.

حاديجات قادىروۆا اقش، ەۋرووداق جانە جاپونيانىڭ سانكتسيا تىزىمىنە ەنگەن.

بيىل 17 قاڭتاردا حاديجات 24 جاسقا تولدى.

رەسمي مالىمەتتەرگە قاراعاندا، رامزان قادىروۆتىڭ 14 بالاسى بار. ولار مەكتەپ بىتىرە سالىسىمەن جوعارى قىزمەتتەرگە تاعايىندالىپ، مەملەكەتتىك سىيلىقتارعا يە بولىپ ءجۇر.

شەشەنستان باسشىسىنىڭ ۇلكەن قىزى ايشات قادىروۆا 2023 جىلعى قازاندا شەشەنستاننىڭ الەۋمەتتىك ماسەلەلەر جونىندەگى ۆيتسە-پرەمەرى قىزمەتىنە تاعايىندالعان.

رامزان قادىروۆتىڭ ۇلكەن ۇلى احمات 2023 جىلعى قاراشادا سپورت جانە جاستار ساياساتى ءمينيسترىنىڭ ءبىرىنشى ورىنباسارى قىزمەتىنە كىرىسكەن.

قادىروۆتىڭ تاعى ءبىر ۇلى ادام تەرگەۋ اباقتىسىندا وتىرعان كۇدىكتى نيكيتا جۋراۆەلدى ۇرعانى ءۇشىن شەشەنستان باتىرى اتاعىن العان. نيكيتا جۋراۆەل قۇراندى ورتەگەنى ءۇشىن جاۋاپقا تارتىلعان.

2022 جىلعى اقپاندا شەشەنستاننىڭ ءۇشىنشى قىزى حۋتمات پرەزيدەنت حاتشىلىعى باسشىسىنىڭ ورىنباسارى قىزمەتىنە كىرىسكەن. ول ورتا مەكتەپتى 2019 جىلى بىتىرگەن. ونىڭ جوعارى ءبىلىم العان-الماعانى بەلگىسىز.

رامزان قادىروۆتىڭ بالالارى عانا ەمەس، باۋىرلارى مەن تۋعان-تۋىستارى دا شەشەنستاندا مەملەكەتتىك قىزمەت اتقارىپ ءجۇر.

فوتو: vesti095.ru

Abai.kz