قۇجاتتىڭ تۇسىندىرمەسىندە شەتەلدە تۋىپ، رەسەي ازاماتتىعىن العاندار اسكەري ەسەپكە تۇرۋدان جالتاراتىنى نەمەسە 30 جاستان كەيىن ازاماتتىق الاتىنى جازىلعان. 2024 جىلعى 1 قاڭتاردان باستاپ رەسەيدە اسكەرگە الۋ شەگى 30 جاس دەپ بەلگىلەنگەن.
زاڭ جوباسىن «ەدينايا روسسيا» فراكتسياسىنىڭ دەپۋتاتتارى الەكساندر بوروداي مەن ميحايل شەرەمەت، لدپر دەپۋتاتى الەكسەي جۋراۆلەۆ ۇسىندى.
رەسەي ۋكرايناعا باسىپ كىرگەننەن كەيىن بيلىك ەڭبەك ميگرانتتارىن سوعىسقا بارۋعا ۇگىتتەي باستاعان. 2023 جىلى رەسەي بيلىگى ازاماتتىق العان ەڭبەك ميگرانتتارىن اسكەرگە قابىلداۋدى كوبەيتتى. رەسەيدىڭ ءىرى قالالارىندا اسكەرگە جارامدى ميگرانتتاردى انىقتاۋدى كوزدەيتىن رەيدتەر ۇيىمداستىرىلدى. رەسەي ازاماتتىعى بار ميگرانتتاردى اسكەري كوميسسارياتقا جىبەردى، اسكەري ەسەپتە تۇرۋدان جالتارعانداردى جاۋاپقا تارتتى.
2023 جىلعى جەلتوقساننان باستاپ اسكەري ەسەپتە تۇرۋدان جالتارعان ميگرانتتاردى ازاماتتىقتان ايىرا باستادى. ماسكەۋ تەرگەۋ كوميتەتى ورتالىق ازيا ەلدەرىندە تۋعان ازاماتتاردىڭ ۇستىنەن 22 قىلمىستىق ءىس قوزعادى. 80 ازامات اسكەرگە قابىلداندى.
Abai.kz
