نۇرلان قۇلباتىروۆ قازاقستاننىڭ 2023 جىلعى سىرتقى ساۋدا ناتيجەلەرى بويىنشا مالىمەتتەردى جاريالادى. ناتيجە بويىنشا 2023 جىلى قازاقستان ازيا ەلدەرىنە ەكسپورتتى كۇشەيتكەنى بايقالادى.

ال قازاقستاننىڭ ساۋداداعى باستى سەرىكتەسى قىتاي بولعان. قازاقستاننىڭ ەكسپورت ۇلەسى بىردەن 10 پايىزعا ارتىپ، 31,5 ملرد اقش دوللارىنا جەتكەن. بۇل كورسەتكىش ءبىر جىل بۇرىن – 24,2 ملرد دوللاردى قۇراعان.

بۇل كورسەتكىشپەن قىتاي 2022 جىلى كوش باسىندا بولعان رەسەيدى ەكىنشى ورىنعا ىعىستىردى.

ال رەسەيگە قازاقستاندىق ەكسپورت ۇلەسى كەرىسىنشە 1 ملرد دوللارعا تومەندەگەن (2022 جىلى – 27, ال 2023 جىلى – 26 ملرد دوللار).

كورسەتكىش نۇرلان قۇلباتىروۆتىڭ Facebook پاراقشاسىنان الىندى

KazTrade ساۋدا ساياساتىن دامىتۋ ورتالىعى باس ديرەكتورىنىڭ ءبىرىنشى ورىنباسارى نۇرلان قۇلباتىروۆتىڭ ايتۋىنشا، قازاقستان قىتايمەن قاتار ازيانىڭ وزگە ەلدەرىنە دە ەكسپورت ۇلەسىن ايتارلىقتاي ارتتىرعان.

"قازاقستان ازيا ەلدەرىنە (قىتاي (+10%), گونكونگقا (+34%), وڭتۇستىك كورەياعا (+30%), ۆەتنامعا (+64%) شيكىزاتتىق ەمەس ەكسپورتتى ۇلعايتتى. تاۋار اينالىمىنداعى قازاقستان ەكسپورتىنىڭ ۇلەسى 56,3% قۇرايدى. ەكسپورتتىڭ جالپى كولەمىندە وڭدەلگەن تاۋارلاردىڭ ۇلەسى 32,1%-دى قۇرادى", – دەپ جازدى KazTrade ساۋدا ساياساتىن دامىتۋ ورتالىعى باس ديرەكتورىنىڭ ءبىرىنشى ورىنباسارى.

جالپى، 2023 جىلى قازاقستاننىڭ ەكسپورتى 2022 جىلمەن سالىستىرعاندا 4,3 ملرد دوللارعا ارتىپ، 139,8 ملرد اقش دوللارىن قۇراعان.

2023 جىلى قازاقستاننىڭ سىرتقى ساۋدا بويىنشا نەگىزگى ون سەرىكتەسىنىڭ ورىندارى وزگەرگەنىمەن، جالپى قۇرامىندا وزگەرىس بولماعان.

داريعا اسقار

Abai.kz