ماشينا جاساۋ—اۆتوموبيل مەن كومباين شىعارۋ عانا ەمەس! بۇگىن ءماجىلىستىڭ جالپى وتىرىسىندا «اق جول» فراكتسياسىنىڭ دەپۋتاتتىق ساۋالىن ازات پەرۋاشەۆ جاريالادى. 

 قر يندۋستريا جانە قۇرىلىس ءمينيسترى
ق.شارلاپاەۆقا

بيىلعى جىلدىڭ 7 اقپانىندا وتكەن ۇكىمەت وتىرىسى بارىسىندا پرەزيدەنت ق. توقاەۆ ماشيناجاساۋ، مۇنايگاز، تاۋ مەتاللۋرگيالىق جابدىقتاردى شىعارۋدى يگەرۋ، جول جانە قۇرىلىس تەحنيكاسى، مەليوراتيۆتىك جۇيەلەردى ءوندىرۋ سەكىلدى ەكونوميكانىڭ ءتۇرلى سەكتورلارىن دامىتۋ بويىنشا ءتيىستى شارالار قابىلداۋدى تاپسىرىپ، كەلەسىنى اتاپ وتكەن بولاتىن: «ەگەر قازاقستاندا قازىر مۇنداي ءوندىرىس جاسالماسا، وندا جابدىقتىڭ جالپى يمپورتى سوزىلمالى سيپاتقا يە بولادى».

ءوز كەزەگىندە «اق جول» دەمپارتياسى جىلدار بويى تەحنولوگيالىق ءوندىرىستى ءارتاراپتاندىرۋدى تالاپ ەتىپ كەلەدى.

حالىقارالىق مۇناي-گاز ماشيناجاساۋ ورتالىعىنىڭ قىزمەتىنە، ەنەرگەتيكالىق جابدىقتاردى، تۇرمىستىق تەحنيكانى شىعارۋدى ۇيىمداستىرۋعا جانە ت.ب. قاتىستى ءوز ساۋالدارىمىزدا ءبىز ەكونوميكامىزدىڭ قاجەتتىلىكتەرىن ەسكەرە وتىرىپ شىعارىلاتىن ءونىمنىڭ ءتىزىمىن بارىنشا كەڭەيتۋدى، ۇلتتىق ەكونوميكانىڭ تەحنولوگيالىق دەڭگەيىن كوتەرىپ، كۇردەلەندىرۋدى تالاي مارتە تالاپ ەتكەن ەدىك.

دەگەنمەن، قولدانىستاعى «ونەركاسىپتىك ساياسات تۋرالى» زاڭعا سايكەس، ونەركاسىپتىك قۇراستىرۋ تۋرالى ۇلگىلىك كەلىسىمدەر مينيسترلىگىڭىزدىڭ تاراپىنان ءالى دە تەك اۆتوموبيلدەر مەن اۋىل شارۋاشىلىعى تەحنيكاسىن ءوندىرۋ ءۇشىن ازىرلەنىپ، قولدانىلادى.

الايدا، ماشينا جاساۋ - تەك اۆتوموبيلدەر مەن كومبايندار ەمەس.

اعىمداعى جاعداي، مەملەكەت باسشىسى اتاپ وتكەندەي، تاماق جانە جەڭىل ونەركاسىپكە، ەلەكترونيكا مەن اسپاپتارعا ارنالعان وندىرىستىك جەلىلەردەن باستاپ بۇرعىلاۋ كەشەندەرى، تاۋ-كەن جابدىقتارى مەن يلەۋ ستانوكتارىنا دەيىنگى بارلىق جابدىقتار مەن بولشەكتەر كەشەنىن تولىققاندى ونەركاسىپتىك ءوندىرۋدىڭ شۇعىل قاجەتتىلىگىن كورسەتەدى.

جانە بۇل تەك عانا پرەزيدەنتتىڭ ءسوزى ەمەس، بيزنەس دابىل قاعىپ وتىرعان شۇعىل قاجەتتىلىك: ماسەلەن، بىرقاتار كاسىپورىندار ءتيىستى مەملەكەتتىك قولداۋ (وفتەيك كەلىسىمشارتتارى، ينۆەستيتسيالىق جەڭىلدىكتەر، تەحنيكالىق قۇجاتتامالار ت.ب.) بولعان جاعدايدا زاماناۋي تەحنيكا مەن جابدىقتاردى وندىرۋگە دايىن ەكەندىكتەرىن «اق جول» دەمپارتياسىنا حابارلاۋدا.

مەملەكەت باسشىسىنىڭ تاپسىرماسىن ورىنداۋ ماقساتىندا، سونداي-اق ەكونوميكانىڭ جوعارى قاجەتتىلىكتەرى مەن مەملەكەتتىڭ وندىرىستىك ساياساتى جانە بيزنەستىڭ باستاماشىل جوبالارىن ەسكەرە وتىرىپ، «اق جول» دەمپارتياسى ونەركاسىپتىڭ كەڭ اۋقىمى مەن ءوندىرىس سالالارىندا ءتيىستى ماشينالار مەن جابدىقتاردى ونەركاسىپتىك قۇراستىرۋ تۋرالى ۇلگىلىك كەلىسىمدەر ازىرلەۋدى ۇسىنادى.

قۇرمەتپەن،

«اق جول» دەپۋتاتتىق فراكتسياسى

ا.پەرۋاشەۆ

د.ەسپاەۆا

ك.يسا

ە.بارلىباەۆ

ا.سادىكوۆ

ە.بەيسەنباەۆ

Abai.kz