دەپۋتات داۋلەت مۇقاەۆ پرەمەر-ءمينيستردىڭ ورىنباسارى تامارا دۇيسەنوۆاعا "ۇلتتىق كيىم" كۇنىن بەكىتۋدى ۇسىنىپ، دەپۋتاتتىق ساۋال جولدادى. ونىڭ ايتۋىنشا، ۇلتتىق كيىم – ۇلتىمىزدىڭ ۇلىلىعىن ۇلىقتايتىن، ۇلتتىق كودىمىزدى بىلدىرەتىن ايشىقتى كورسەتكىش.

"ۇلتتىق كيىمدەرىمىزدىڭ مول مۇراسىمەن ماقتانا الاتىنداي ەلمىز. الايدا، ەلدە ۇلتتىق كيىمدى ناسيحاتتاۋ تەك ءبىر رەتتىك چەللەندجدەر مەن اكتسيالارمەن عانا ۇلىقتالۋدا. سوڭعى ۋاقىتتا جالپى حالىق اراسىندا "ۇلتتىق سەزىم" جالپىۇلتتىق اكتسياسى باستالىپ، ەل اراسىندا كەڭىنەن قولداۋ تاۋىپ كەلەدى. اكتسيانى زيالى قاۋىم وكىلدەرى، جۋرناليستەر مەن بلوگەرلەر، وقۋ وردالارى قولداپ، اپتانىڭ ءار جۇماسىندا ۇلتتىق ناقىشتاعى كيىمدەردى كيىپ جۇرگەندەر   قاتارى كوبەيدى. وسى اكتسيانى باستاعان ازاماتتارعا ەرەكشە العىسىمدى بىلدىرەمىن. ۇلتتىق كيىم مادەني مايداننىڭ نەگىزگى قارۋى، حالىق ساناسىنا اسەر ەتۋشى كۇش ەكەنىن ەسكەرسەك بۇل ماسەلەگە ءۇستىرتىن قاراۋعا بولمايدى", – دەدى داۋلەت مۇقاەۆ.

ول پرەزيدەنتتىڭ "ۇلتتىق كيىمدەردى تەك ناۋرىزدا عانا ەمەس، جاي كۇندەرى دە ءجيى كيىپ ءجۇرۋىمىز كەرەك" دەپ ايتقانىن تىلگە تيەك ەتتى.

"الداعى ۋاقىتتا ۇلتتىق ناقىشتاعى كيىم كيۋ ءداستۇرىن تەك ناۋرىزبەن، اكتسيالارمەن عانا شەكتەمەي، ونى ترەندكە اينالدىرۋ قاجەت. ماسەلەن، باۋىرلاس قىرعىز حالقى باستارىنان ايىر قالپاعىن تاستامايدى. سوعان قاراپ-اق، ونى قىرعىز ەكەنىن جازباي تانيسىڭ.   ءتىپتى جوعارعى كەنەشتىڭ وزىندە دەپۋتاتتارى ايىر قالپاقتارىن كيىپ وتىرادى. ول قالا بەردى ۇلتتىق كيىمدەرىن ساقتاۋ ماقساتىندا 5 ناۋرىزدى – ايىر قالپاق كۇنى دەپ مەملەكەتتىك دەڭگەيدە بەكىتىپ، يۋنەسكو-نىڭ ماتەريالدىق ەمەس مادەني مۇرالارىنىڭ تىزىمىنە ەنگىزگەن. بۇنداي كۇن تەك قىرعىزستاندا عانا ەمەس، الەمنىڭ برازيليا، يسپانيا، شوتلانديا، جاپونيا سىندى الپاۋىت ەلدەرىندە بار", – دەدى ول.

Abai.kz