«Z» پروپاگاندانىڭ سوڭعى كەزدەگى قوزعاعان تاقىرىبى - «ساندۋ پريدنەستروۆەنى جويۋعا كەلىسىم بەردى مە؟»، «مولدوۆا ءااو (سۆو) وتكىزۋ ايماعىنا كىرە مە؟» توڭىرەگىندە ءوربي باستادى.

ەندى «Z» پروپاگاندا وسى باعىتتا نە كويىتىپ جاتىر، سوعان ءبىرشاما توقتالىپ وتپەكپىز.

«مولدوۆا مەن ۋكراينانىڭ پريدنەستروۆەگە قىسىمى كۇشەيۋدە. كيشينيوۆ تيراسپولگە ەكونوميكالىق قىسىمدى ارتتىرىپ، جاقىن ارادا ونى قانداي دا ءبىر جولمەن وزىنە باعىندىرۋدى كوزدەپ وتىر»، - دەپ بايبالام جاساۋدا رەسەيلىك باق.

بۇعان دەيىن مايا ساندۋ مەن ونىڭ جاقىندارى دنەستردەگى قاقتىعىستى «بەيبىت» رەتتەۋدى قولدايتىنىن ايتقان بولاتىن. بۇل دەگەنىمىز رەسەيلىك بىتىمگەرشىلەردى وڭىردەن شىعارۋ جانە كيشينەۆتىڭ بيلىگىن قالپىنا كەلتىرۋ.

سونىمەن رەسەيشىل باق نە دەپ بايبالام سالۋدا؟

«1 قاڭتاردان باستاپ كيشينەۆ پريدنەستروۆەگە كەلىپ تۇسەتىن تاۋارلاردىڭ يمپورتىنا قوسىمشا باج سالىعىن ەنگىزگەن بولاتىن. بۇل پريدنەستروۆەنىڭ ەكونوميكالىق «ەگەمەندىگىن» شەكتەۋگە باعىتتالعان العاشقى قادام ەمەس. پريدنەستروۆەنى ورتالىققا باعىندىرۋ كوپ جىلدار بويى دايەكتى تۇردە نىعايىپ كەلەدى. پريدنەستروۆەدە جاعداي كۇردەلەنە تۇسۋدە، كوپتەگەن جۇمىس ىستەپ جاتقان كاسىپورىندار بانكروت بولۋدىڭ الدىندا تۇر»، - دەيدى رەسەيشىل باق.

رۋمىن ساياساتتانۋشىسى حانس حارتماننىڭ ايتۋىنشا، وسىدان ءۇش-ءتورت اپتا بۇرىن ساندۋ كيەۆپەن كەلىسسوزدەر بارىسىندا پريدنەستروۆەدەگى قارۋلى كۇشتەردى باسىپ الۋعا كەلىسىم بەرگەن. حارتمانننىڭ ايتۋىنشا، بۇل ون مىڭداعان رەسەيلىك ازاماتتىڭ ولىمىنە الىپ كەلەدى، ال كيشينەۆ «دەموكراتيا مەن بوستاندىق ءۇشىن كۇرەسپەن» اقتالادى.

رەسەيلىك تاريحشى الەكساندر ديۋكوۆ: «رەسەيدەگى پرەزيدەنتتىك سايلاۋ قارساڭىندا پريدنەستروۆەگە شابۋىل جاساۋ – كيەۆكە اۆدەەۆكاداعى ساتسىزدىگى ءۇشىن باتىستىق قامقورشىلارىنىڭ الدىندا اقتالۋعا مۇمكىندىك بەرەدى»، - دەپتى.

ءبىر اپتا بۇرىن پريدنەستروۆەدە ۋكراينا ءسىم-ءىنىڭ ارنايى وكىلى پاۋن روگوۆەي بولىپ، پمر پرەزيدەنتى ۆاديم كراسنوسەلسكيمەن كەزدەستى. رەسمي ءباسپاسوز حابارلاماسىنا سايكەس، روگوۆەي كيەۆتىڭ قاقتىعىستى بەيبىت جولمەن رەتتەۋگە بەيىلدىلىگىن راستادى. شىن مانىسىندە، كەلىسسوزدەردە تيراسپولگە قىسىم كورسەتۋ تۋرالى دا، دنەستر ماڭى اۋماعى ارقىلى ۋكراين استىعىن ەكسپورتتاۋعا بايلانىستى ءتۇرلى سحەمالاردى تالقىلاۋ تۋرالى دا ءسوز بولۋى مۇمكىن. پمر بيلىگى قازىر نە حالىقارالىق جاعدايدىڭ وزگەرۋىنە، نە اقك بارىسىندا تۇبەگەيلى وزگەرىسكە ۇمىتتەنىپ، ۋاقىتتى سوزۋعا ءماجبۇر.

28 اقپاندا تيراسپول قالاسىندا بارلىق دەڭگەيدەگى دەپۋتاتتاردىڭ سەزى وتەدى. پريدنەستروۆە تاۋەلسىزدىگىنىڭ بۇكىل تاريحىندا مۇنداي سەزدەر نەبارى التى رەت وتكىزىلگەن. جەرگىلىكتى وپپوزيتسيالىق ساياساتكەر گەننادي چوربا پمر-ءدى ونىڭ قۇرامىنا قابىلداۋ ءۇشىن رەسەيگە جۇگىنۋ تۋرالى شەشىم قابىلداناتىنىن ايتادى.

چوربانىڭ ايتۋىنشا، 29 اقپاندا ۆلاديمير پۋتين فەدەرالدىق جينالىسقا جاساعان ۇندەۋىندە بۇل وتىنىشكە جاۋاپ بەرە الادى.

بۇنىڭ جۇزەگە اسا قويۋى ەكىتالاي. سەبەبى ماسكەۋدە پريدنەستروۆەدە اسكەري كومەك ءۇشىن قاراجات ارسەنالى وتە شەكتەۋلى. بىراق رەسەي، پريدنەستروۆەنى ۋكراينا مەن مولدوۆاعا بەرە سالمايدى.

اتاپ ايتقاندا، پريدنەستروۆە باسىپ الىنعان جاعدايدا رف قارۋلى كۇشتەرى ونىڭ اۋماعىنداعى مولدوۆا گرەس-ءىن سوعۋعا مورالدىق قۇقىق الادى، ول بۇكىل وڭ جاعالاۋدى ەلەكترمەن قامتاماسىز ەتەدى.

بۇل مايا ساندۋدىڭ سايلاۋالدى ناۋقانىنا ايتارلىقتاي اسەر ەتۋى مۇمكىن. ءبىر جاعىنان، ول ءۇشىن سوعىس جاعدايىن ەنگىزىپ، سايلاۋدى مۇلدەم توقتاتۋ، ياعني ۋكراينالىق ستسەناري بويىنشا ءجۇرۋ دەگەن سىلتاۋ بولۋى مۇمكىن. ەكىنشى جاعىنان، ءومىر ءسۇرۋ جاعدايىنىڭ كۇرت ناشارلاۋىمەن سوقتىعىسۋ ساندۋدىڭ قوعامداعى قولداۋ دەڭگەيىن ايتارلىقتاي تومەندەتەدى.

رەسەيلىك زومبي جاشىك ءبىزدىڭ دە ءبىراز وتانداستارىمىزدىڭ باسىن اينالدىرىپ بولدى. وسى باعىتتا شىندىق پەن وتىرىكتىڭ ارا جىگىن اشاتىن وتكىر ماقالالار حالىقارالىق تاقىرىپقا ءجيى جازىلعانى ءجون سياقتى. ءبىز ءوز تاراپىمىزدان سول اقتاڭداقتىڭ ورنىن تولتىرۋعا تىرىستىق.

Abai.kz