مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ ءۇشىنشى وتىرىسىن ەلىمىزدىڭ باتىسىنداعى اتىراۋدا وتكىزگەنى اباي وبلىسىنداعى، سەمەيدەگى مەكتەپ وقۋشىلارىن بەي-جاي قالدىرعان جوق.

ۇندەۋ

بىزگە، ۇلتىمىزدىڭ بولاشاعى بولىپ تابىلاتىن شاكىرتتەرگە وسى قۇرىلتايداعى پرەزيدەنتىمىزدىڭ انا ءتىلىمىزدىڭ رەسپۋبليكامىز بەن ودان تىسقارى جەردە وركەن جايۋياىنا قاتىستى وي تولعاعان تومەندەگى تەزيستەرى:

«كەلەسى ماسەلە. ءتىلىمىزدىڭ قولدانۋ اياسىن كەڭەيتە ءتۇسۋ مەملەكەتتىك ساياساتتىڭ باستى باعىتى بولىپ قالا بەرەدى. بۇل – ءبىز ءۇشىن مىزعىماس ۇستانىم.

ەلىمىزدە قازاق تىلىنە دەگەن سۇرانىس جىل وتكەن سايىن ارتىپ كەلەدى. قازاق ءتىلى بيزنەستىڭ، عىلىم مەن تەحنيكانىڭ تىلىنە اينالا باستادى. بۇل ءۇردىستى ودان ءارى دامىتۋدىڭ ەڭ ءتيىمدى ءارى توتە جولى – اعارتۋشىلىق.

قازىر ءىرى كىتاپ دۇكەندەرىندە قازاق تىلىندەگى تۋىندىلاردىڭ ۇلەسى ارتا ءتۇستى. سوڭعى كەزدە باسپاگەرلەردىڭ جاڭا بۋىنى الەمدىك بەستسەللەرگە اينالعان شىعارمالاردى اۋدارىپ ءجۇر. كوپتەگەن كىتاپتاردى شىعارىپ جاتىر.

اۋدارىلعان كىتاپتاردىڭ ىشىندە كوركەم ادەبيەت قانا ەمەس، ىسكەرلىك باعىتتاعى تۋىندىلار دا كوپ. مەملەكەتتىك ساياساتتىڭ ءمانى – وسىندا.

ەشكىمدى ماجبۇرلەمەي، كۇندەلىكتى ومىردەگى قاجەتتىلىكتى ارتتىرۋ ارقىلى ءتىلىمىزدىڭ تۇعىرىن نىعايتا بەرەمىز. مەملەكەتتىك تىلگە قاتىستى قۇر سوزدەن ەشتەڭە شىقپايدى. ەڭ باستىسى، ناقتى ءىس بولۋى كەرەك»، - دەگەنى ۇلكەن وي سالىپ، قازاق ءتىلىن جاڭا بەلەستەرگە كوتەرۋگە جەتەلەگەنى جاسىرىن ەمەس.

ءبىزدىڭ 11 مەكتەپتىڭ وقۋشىلار كوميتەتى قازاق ءتىلدى مەدياكونتەتى قالىپتاستىرۋعا قاتىستى شاكىرتتەر مەن ستۋدەنتتەر اراسىندا «جاس الاش فانداب» قوزعالىسىن ومىرگە اكەلۋ ءۇشىن اتسالىسۋعا قۇربى-قۇرباستارىمىزدى شاقىرامىز. جانە تۋعان قالامىز سەمەيدىڭ «رۋحاني استانا» مارتەبەسىنە لايىقتى بولۋ ءۇشىن Web اۋدارما سالاسىندا ءوز ۇلەسىمىزدى قوسقىمىز كەلەدى.

سول سەبەپتى ءاربىر جوو، كوللەدج بەن مەكتەپتەردە جاس اۋدارماشىلار كوميتەتى قۇرىلىپ، قازاق ءتىلىنىڭ باعى ءۇشىن ءتارجىمالار جاساپ، عالامتور كەڭىستىگىن انا تىلىمىزدەگى كونتەنتتەرمەن تولتىرىپ، ۇلتىمىزدىڭ مادەني-رۋحاني دامۋىنا ءوز ۇلەسىمىزدى قوسقىمىز كەلەتىنىن مالىمدەيمىز.

Abai.kz