ءماجىلىستىڭ الەۋمەتتىك-مادەني دامۋ كوميتەتىندە ويىن بيزنەسى، لوتەرەيا جانە لوتەرەيا قىزمەتى ماسەلەلەرى تۋرالى، سونداي-اق اكىمشىلىك قۇقىق بۇزۋشىلىق تۋرالى كودەكسكە وزگەرىس ەنگىزۋ تۋرالى زاڭ جوبالارىنىڭ تانىستىرىلىمى ءوتتى.

جيىنعا ۇلتتىق قۇرىلتايدىڭ، پرەزيدەنت جانىنداعى جاستار ساياساتى كەڭەسىنىڭ مۇشەلەرى، قوعام قايراتكەرلەرى، ساراپشىلار، مۇددەلى مەملەكەتتىك ورگانداردىڭ وكىلدەرى قاتىستى.

فوتو س.مايلىباەۆ

– بۇل زاڭدى ءبىر جارىم جىل كۇتتىك. مەملەكەت باسشىسى قاسىم-جومارت توقاەۆ قۇمار ويىندارعا تاۋەلدىلىك ماسەلەسىنە بىرنەشە رەت نازار اۋدارعان بولاتىن. وسى ماسەلە قاۋىپسىزدىك كەڭەسىنىڭ وتىرىسىندا دا قارالدى. دەپۋتاتتار كوپتەگەن دەپۋتاتتىق ساۋال جولداپ، ارنايى جيىندار ۇيىمداستىردى. جاۋاپتى مەملەكەتتىك ورگانداردىڭ وكىلدەرىن شاقىرىپ، تىڭداۋ دا وتكىزدىك. پرەزيدەنتتىڭ تاپسىرماسىن ورىنداۋ ماقساتىمەن بۇل تۇزەتۋلەرگە ماجىلىستەگى بارلىق فراكتسيا وكىلدەرى باستاماشى بولىپ وتىر، – دەدى جۇمىس توبىنىڭ جەتەكشىسى ەلنۇر بەيسەنباەۆ.

دەپۋتات اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا مەملەكەت باسشىسى ناشاقورلىق، تۇرمىستىق زورلىق-زومبىلىق، ۆانداليزم جانە ىسىراپشىلدىقپەن قاتار قۇمار ويىنعا تاۋەلدىلىكتى قوعامنىڭ ەڭ قاۋىپتى بەس الەۋمەتتىك ماسەلەسىنىڭ ءبىرى دەپ اتاعانىنا نازار اۋداردى. سوندىقتان مەملەكەت باسشىسى لۋدومانيامەن كۇرەس جونىندەگى زاڭ جوباسىن وسى سەسسيانىڭ سوڭىنا دەيىن قابىلداۋ قاجەتتىگىن ناقتى تاپسىرعانىن ەسكە سالدى.

فوتو س.مايلىباەۆ

سونداي-اق ەلنۇر بەيسەنباەۆ تۇزەتۋلەر پرەزيدەنت جانىنداعى جاستار كەڭەسىنىڭ وكىلدەرىمەن، ۇلتتىق قۇرىلتاي مۇشەلەرىمەن، قوعام بەلسەندىلەرىمەن جانە ساراپشىلارمەن تالقىلانعانىن اتاپ ءوتتى.

زاڭ جوباسىن ازىرلەۋشىلەردىڭ ايتۋىنشا، بۇگىندە لۋدومانيا ماسەلەسى ۇلتتىق قاۋىپكە اينالىپ وتىر. دەرەكتەرگە سۇيەنسەك، 400 مىڭعا جۋىق ازامات – بۋكمەكەرلىك كەڭسەلەر مەن كازينولاردىڭ تۇراقتى كليەنتتەرى، بۇل ۇلكەن قالا تۇرعىندارى سانىمەن تەڭ. ال ولاردىڭ ميلليونداعان جاقىنى مەن تۋىستارى قۇمار ويىنداردان زارداپ شەگەدى. ونلاين رەجيمدە قول جەتىمدى بولعاندىقتان العاشقى ستاۆكالار مەكتەپ قابىرعاسىنان باستالادى.

فوتو س.مايلىباەۆ

ستاتيستيكا بويىنشا ون ەرلى-زايىپتىنىڭ جەتەۋى قۇمار ويىندارىنىڭ كەسىرىنەن اجىراسادى. بىلتىر قازاقستاندا 3676 ادام ءوز-وزىنە قول جۇمساعان، ونىڭ ءاربىر بەسىنشىسىنىڭ سەبەبى – لۋدومانيا.

– بۋكمەكەرلىك كەڭسەلەر جارناماعا قوماقتى قارجى جۇمسايدى. تەلەارنالار، رەسمي ينتەرنەت رەسۋرستارى، Youtube, Tik-Tok, Instagram, Telegram سياقتى الەۋمەتتىك جەلىلەر بۋكمەكەرلىك كەڭسەلەردىڭ جارناماسىنا تولى. سونىمەن قاتار كەيبىر قوعامدىق پىكىر كوشباسشىلارى، تانىمال بلوگەرلەر، مەديا جۇلدىزدار دا بۇل زياندى قۇبىلىستى جارنامالاپ ءجۇر. بىراق قوعام، كەرىسىنشە، ەڭ الدىمەن جاستاردى بۇزاتىن بۇل الەۋمەتتىك قاۋىپكە قارسى جۇمىلا ارەكەت ەتۋى كەرەك. جەڭىل اقشاعا قۇمارلىق ەمەس، ادال ەڭبەك قانا جاقسىلىق اكەلەتىنىن وسكەلەڭ ۇرپاقتىڭ ساناسىنا قۇيىپ، دۇرىس قۇندىلىقتارمەن تاربيەلەۋىمىز كەرەك، – دەدى ە.بەيسەنباەۆ.

جوبا اياسىندا 2 كودەكس پەن 7 زاڭعا 50-دەن استام تۇزەتۋ ەنگىزىلدى.

فوتو س.مايلىباەۆ

زاڭ جوباسىندا نە قامتىلعان؟

اتاپ ايتقاندا، ويىن بيزنەسىنە قاتىسۋشىلاردى ونىڭ جاعىمسىز سالدارى، تاۋەكەلدەرى مەن زيانى تۋرالى مىندەتتى تۇردە حاباردار ەتۋ، سونداي-اق مالىمەتتەرى بورىشكەرلەر تىزىلىمىندە بار جەكە تۇلعالاردىڭ ويىنعا قاتىسۋىنا تىيىم سالۋ تۋرالى مىندەتتى اقپارات ەنگىزىلەدى. قۇمار ويىندارعا كامەلەت جاسقا تولماعان جانە قۇمار ويىندارعا قاتىسۋى شەكتەلگەن ادامداردى تارتقانى ءۇشىن زاڭدى تۇلعالاردىڭ اكىمشىلىك جاۋاپكەرشىلىك، سونداي-اق ونلاين-كازينو ۇيىمداستىرعانى ءۇشىن قىلمىستىق جازالار بەلگىلەنەدى. بۋكمەكەرلىك كەڭسەلەر مەن لوتەرەيالارعا ارنالعان جارنامانى ورنالاستىرۋ مەن تاراتۋعا قويىلاتىن تالاپتار كۇشەيتىلەدى.

سونىمەن قاتار لوتورەيا تەرمينالدارىن ەلگە اكەلۋگە جانە تۇرعىن ۇيلەرگە، دۇكەندەرگە، مەديتسينالىق جانە ءبىلىم بەرۋ ۇيىمدارىنا ورناتۋعا تىيىم سالىنادى. قۇمار ويىندارعا قاتىسۋ جاسى 25 جاسقا دەيىن ۇلعايتىلادى. ويىن بيزنەسىن ۇيىمداستىرۋشىلار ەندى وزدەرىنىڭ اقپاراتتىق جانە قارجىلىق جۇيەلەرىن مەملەكەتتىك كىرىستەر ورگاندارىنىڭ اپپاراتتىق جۇيەلەرىمەن بىرىكتىرۋگە مىندەتتى بولادى. وسىلايشا، بارلىق قارجىلىق وپەراتسيا مەملەكەتكە كورىنىپ وتىرادى.

سونداي-اق وتىرىس بارىسىندا دەپۋتاتتار ويىنعا تاۋەلدى ادامداردى وڭالتۋ، ارنايى ەمدەۋ مەكەمەلەرىن ليتسەنزيالاۋ جانە قارجىلاندىرۋ، ويىنعا تاۋەلدى ادامدارعا نەسيە بەرۋگە تىيىم سالۋ جانە باسقا دا ماسەلەلەردى كوتەردى.

قورىتىندىلاي كەلە جيىنعا قاتىسۋشىلار قۇمار ويىنعا تاۋەلدىلىك ماسەلەلەرىن شەشۋ كەشەندى ءتاسىلدى قاجەت ەتەتىنىن،  ونىڭ سالدارىمەن ەمەس، سەبەپتەرىمەن كۇرەسۋ كەرەكتىگىن اتاپ ءوتتى. جاسوسپىرىمدەر مەن جاستارعا ناشاقورلىق قاۋپىن تۇسىندىرە وتىرىپ، پروفيلاكتيكالىق جانە اعارتۋ جۇمىستارىن كۇشەيتۋ ماڭىزدى.

فوتو س.مايلىباەۆ

Abai.kz