قىزىلوردا قالاسىنداعى سالىنۋى كەرەك ءىرى كوپىردىڭ قۇرىلىسىنا قاتىستى ۇلكەن داۋ شىقتى. سەبەبى، اكىمدىك كوپىردىڭ ورنىندا ورنالاسقان قيراتىلۋى كەرەك ۇيلەردى دۇرىس باعالاماعان. ال جۇرت بولسا،  شەنەۋنىكتەر ۇسىنعان قاراجات جىلجىمايتىن مۇلىك تۇگىلى، جەر ۋچاسكەسىن دە ساتىپ الۋعا جەتپەيدى، دەپ دابىل قاعۋدا.  

قالا تۇرعىندارىنىڭ ءۇيى مەملەكەتكە ءالى ءوتىپ ۇلگەرمەگەندىكتەن، بيىل سالىنىپ ءبىتۋى ءتيىس كوپىردىڭ قۇرىلىس جۇمىسى ءالى باستالماعان. ۇيلەن بولسا نەبارى 2,5-3 ميلليون تەڭگەگە باعالانىپ وتىر.

"مەنىڭ ۇيىمە 2,5 ميلليون تەڭگە بەرەمىز دەيدى. مەن نە ساتىپ الامىن سوندا؟ ەشتەڭە الا المايمىن عوي. ءتىپتى بىرەۋ جامان سارايىن دا ساتپايدى ول اقشاعا. قازىر مەن زەينەتكەرمىن، ەشقايدا بارا المايمىن", – دەدى قىزىلوردا قالاسىنىڭ تۇرعىنى پولينا كروتوۆا. 

ياعني تۇرعىندار باعالاۋشى ۇيلەردىڭ قۇنىن شىعاراردا نارىقتاعى باعانى مۇلدە ەسكەرمەگەن دەپ اشىنادى. ءتىپتى باعانى بارىنشا تومەندەتۋ ءۇشىن كەي باسپانالاردىڭ شارشى مەترىن كەمىتىپ ەسەپتەگەن كورىنەدى.

"ەڭ سوراقىسى، مەنىڭ ءۇيىمنىڭ شارشى مەترى 280/281 ش/مەتر بولسا، ونى 240/241 دەپ ەسەپتەگەن. سول بولا ما؟ سۇمدىق قوي مىناۋ. مەنىڭ ءۇيىمنىڭ جارتىسىن الىپ تاستاپ تۇر عوي. ونىڭ ىشىندە ايتا بەرسەڭ، كەمشىلىكتەر كوپ", – دەدى قىزىلوردا قالاسىنىڭ تۇرعىنى ءامينا قۇلتاەۆا. 

"ول جەردە 27 ءۇي بار. كەيبىرەۋلەرى كەلىسىپ وتىر. كەلىسكەندەردى سول باعامەن الا بەرەمىز دە، ال قالعاندارىنا قاتىستى سوتتىڭ شەشىمى كۇشىنە ەنەدى. سوسىن عانا سۇرەمىز", – دەدى قىزىلوردا قالاسى اكىمىنىڭ ورىنباسارى عالىمجان ەركەباي. 

ون شاقتى وتباسى ماڭداي تەرىمىزبەن سالعان باسپاناعا ءوز قۇنىنا ساي وتەماقى تولەمەسە ەشقايدا كوشپەيمىز دەپ بەكىنىپ وتىر. ماسەلە شەشىلمەسە استاناعا دەيىن بارىپ، اكىمدىكتىڭ ۇستىنەن ارىزدانباق. ال شەنەۋنىكتەر سوتتىڭ شەشىمىنەن كەيىن كوپىردىڭ قۇرىلىسىن باستاي بەرەتىنىن جەتكىزدى. ولاردىڭ مالىمەتىنشە، جاڭا كوپىردىڭ قۇنى 5 ميلليارد تەڭگەگە جۋىقتايدى.

Abai.kz