پرەزيدەنت باتىس قازاقستان وبلىسىنىڭ سۋ باسقان اۋماقتارىن تىكۇشاقپەن ارالادى، دەپ حابارلايدى Abai.kz aqorda_resmi تەلەگرامم ارناسىنا سىلتەمە جاساپ.

مەملەكەت باسشىسى قاسىم-جومارت توقاەۆ باتىس قازاقستان وبلىسىنداعى قارعىن سۋ باسقان اۋماقتاردى تىكۇشاقپەن ارالاپ، تەرەكتى، سىرىم جانە قاراتوبە اۋداندارىنداعى قالىپتاسقان جاعدايمەن تانىستى.

«وبلىس اكىمى ناريمان تورەعاليەۆ پرەزيدەنتكە بۇگىندە 6 اۋدان مەن ورال قالاسىن سۋ باسقانىن باياندادى. قارعىن سۋ 552 تۇرعىن ۇيگە، 427 ساياجاي تەلىمىنە زيان كەلتىرگەن. ءوڭىر باسشىسىنىڭ ايتۋىنشا، سۋ تاسقىنىنا قارسى شارالارعا 1911 ادام، 332 تەحنيكا، 101 موتوپومپا، 1 تىكۇشاق جۇمىلدىرىلعان. سونىمەن قاتار قۇتقارۋ جۇمىستارىنا الماتى جانە ماڭعىستاۋ وبلىستارىنىڭ قۇتقارۋشىلارى اتسالىسىپ جاتىر. قارعىن سۋ باسقان اۋماقتاردان 7 مىڭعا جۋىق تۇرعىن كوشىرىلگەن، جەدەل-ەۆاكۋاتسيالاۋ پۋنكتتەرى قۇرىلعان. زارداپ شەككەندەرگە بىرجولعى ماتەريالدىق كومەك كورسەتۋ ءۇشىن جەرگىلىكتى بيۋدجەت ەسەبىنەن 63 ميلليون تەڭگە قارجى ءبولىندى. سۋ ايداۋ، نىسانداردىڭ جان-جاعىن توپىراقپەن قورشاۋ جانە سۋ جۇرەتىن قۇبىرلاردى كەڭەيتۋ جۇمىستارى جۇرگىزىلىپ جاتىر»، - دەپ جازىلعان حابارلاندىرۋدا.

Abai.kz