ەلىمىزدىڭ باسىم كوپشىلىگىندە ورىن الىپ جاتقان قارعىن  سۋ اپاتى سالدارىنان بقو-داعى 552 تۇرعىن ۇيگە، 427 ساياجاي تەلىمىنە زيان كەلتىرىلگەن.

مەملەكەت باسشىسىنىڭ باتىس قازاقستان وبلىسىنا جۇمىس ساپارى قارعىن سۋ باسقان اۋماقتاردى تىكۇشاقپەن ارالاپ كورۋدەن باستالدى.

"قاسىم-جومارت توقاەۆ تەرەكتى، سىرىم جانە قاراتوبە اۋداندارىنداعى قالىپتاسقان جاعدايمەن تانىستى. وبلىس اكىمى ناريمان تورەعاليەۆ پرەزيدەنتكە بۇگىندە 6 اۋدان مەن ورال قالاسىن سۋ باسقانىن باياندادى. قارعىن سۋ 552 تۇرعىن ۇيگە، 427 ساياجاي تەلىمىنە زيان كەلتىرگەن", – دەلىنگەن حابارلامادا. 

ءوڭىر باسشىسىنىڭ ايتۋىنشا، سۋ تاسقىنىنا قارسى شارالارعا 1911 ادام، 332 تەحنيكا، 101 موتوپومپا، 1 تىكۇشاق جۇمىلدىرىلعان. سونىمەن قاتار قۇتقارۋ جۇمىستارىنا الماتى جانە ماڭعىستاۋ وبلىستارىنىڭ قۇتقارۋشىلارى اتسالىسىپ جاتىر.

قازىرگى تاڭدا 7 مىڭعا جۋىق تۇرعىن جەدەل-ەۆاكۋاتسيالاۋ پۋنكتتەرىنە كوشىرىلدى. زارداپ شەككەندەرگە بىرجولعى ماتەريالدىق كومەك كورسەتۋ ءۇشىن جەرگىلىكتى بيۋدجەت ەسەبىنەن 63 ميلليون تەڭگە قارجى ءبولىندى. سۋ ايداۋ، نىسانداردىڭ جان-جاعىن توپىراقپەن قورشاۋ جانە سۋ جۇرەتىن قۇبىرلاردى كەڭەيتۋ جۇمىستارى جۇرگىزىلىپ جاتىر.

Abai.kz