ءماجىلىس دەپۋتاتى رينات زايتوۆ قر ۇكىمەت باسشىسى ولجاس بەكتەنوۆتىڭ اتىنا دەپۋتاتتىق ساۋال جولداپ، تاسقىن سۋعا قاتىستى ادامي فاكتورلاردى انىقتاپ، جاۋاپقا تارتۋ جانە سۋ تاسقىنىنان زارداپ شەككەن ازاماتتارعا وتەماقى تولەۋدىڭ الگوريتمى جايلى ماسەلەلەردى ءسوز ەتىپتى.

ءبىز اتالعان دەپۋتاتتىق ساۋالدى قاز-قالپىندا وقىرمان تالقىسىنا ۇسىنعاندى ءجون سانادىق.

دەپۋتاتتىق ساۋال قازاقستان رەسپۋبليكاسى پرەمەر-ءمينيسترى ولجاس ابايۇلى بەكتەنوۆكە جولدانادى!

قۇرمەتتى ولجاس ابايۇلى!

«اپات ايتپاي كەلەدى» - دەپ اتام قازاق ايتقانداي ءبىزدىڭ ەلگە تاعى ءبىر ۇلكەن سىناقتىڭ كەلگەنىن ءبارىڭىز بىلەسىزدەر. ءبىر توپ دەپۋتاتتار بۇل حاباردى ەستي سالا وڭىرلەرگە اتتاندىق. ونداعى ماقساتىمىز حالىقتىڭ جاعدايىن كوزبەن كورىپ، ارىز-تالابىن ءوز اۋزىنان ەستىپ ۇكىمەتكە جەتكىزۋ ەدى.

بۇگىنگى دەپۋتاتتىق ساۋال مەنىڭ ءسوزىم ەمەس، اۋلەتىمەن اۋرەگە ءتۇسىپ، باسپاناسى مەن مال-مۇلكىنەن ايىرىلىپ، ءتىلسىز جاۋمەن تايسالماي كۇرەسىپ جاتقان ەرجۇرەك قازاق حالقىنىڭ ءسوزى دەپ بىلگەيسىزدەر.

بىرىنشىدەن، توسىننان كەلگەن توپان سۋدى قانشا جەردەن تابيعي قۇبىلىس دەسەك تە، اپاتقا كىنالى ادامي سالعىرتتىقتار دا بار. دالەلىمەن ايتساق، اتىراۋ وبلىسى مەن قۇلسارى قالاسىنىڭ ماڭىنان زاڭسىز سالىنعان سۋ بوگەتتەرى، جەرگىلىكتى بيلىكتىڭ كوكتەمگى سۋ تاسقىنىنا ءالسىز ازىرلەنگەنى، سىن ساعاتتا ابدىراعان جۇرتتىڭ ارەكەتىن ۇيلەستىرە الماۋى دا وسىنداي سالدارعا اكەلىپ سوقتى.

جەرگىلىكتى بيلىكپەن جاۋاپتى مينيسترلىكتەر وعان دەيىن دابىل قاققان ارىپتەستەرىم د. تۇرعانوۆ، ب. بازاربەك جىلوي اۋداندىق ءماسليحاتىنىڭ دەپۋتاتى س. سارسەنباەۆتاردىڭ دەپۋتاتتىق ساۋالدارىنا بەي-ءجاي قاراعانى دا بۇل اپاتتىڭ ءبىر سەبەبى دەۋگە ابدەن بولادى.

«بورەنەدەن اتتايمىز» - دەپ ەسەپ بەرىپ، سىرىڭكەگە سۇرىنە بەرەتىن مەملەكەتتىك ورگانداردىڭ شالاعايلىعى جاۋاپقا تارتپاسا جالعاسا بەرەدىعوي.

سوندىقتان، پرەزيدەنتىمىز ايتقانداي جاۋاپكەرشىلىك الۋدان قاشىپ، جۇمىستى ءبىر-بىرىنە سىلتەپ وتىراتىن قىزمەتكەرلەر مەن جەرگىلىكتى ءىرى كومپانيالار ارەكەتتەرى جازالانۋى ءتيىس.

ەكىنشىدەن، اپات سالدارىنان زارداپ شەككەن حالىق ءوز شىعىندارىنىڭ قالاي ەسەپتەلىپ، قالاي وتەلەتىنىن ءالى دە تولىق بىلمەيدى، ويتكەنى، شارالاردىڭ ناقتى الگوريتمى جاسالماعان، كوميسسيا قالاي قۇرىلىپ، قالاي جۇمىس جاسايتىنى جايلى حالىققا دۇرىس حابارلانباعان. سول سەبەپتەن كوميسسيا جۇمىسىن جەڭىلدەتىپ، حالىقپەن تىكەلەي بايلانىستىرۋ ماقساتىندا ونىڭ قۇرامىنا ەل سەنىمىنە يە بولعان جەرگىلىكتى بەلسەندى ازاماتتاردى قوسۋ كەرەك دەپ ەسەپتەيمىز.

ۇشىنشىدەن، اپات بولعان ايماقتاردىڭ تۇرعىندارىنا ۋاقىتشا نەسيەلىك كانيكۋلداردى جان-جاقتى قاراستىرۋدى سۇرايمىز.

سونىمەن قاتار، باسپاناسىنان ايىرىلعان ازاماتتاردى وڭتايلى ورنالاستىرۋدى جەدەلدەتۋدى سۇرايمىز.

قۇرمەتتى ولجاس ابايۇلى!

قادىرلى ارىپتەستەر!

اباي مەن قوستانايدا بولعان وتتى وپاتتا دا، بۇگىنگى بولىپ جاتقان توپان سۋ توپالاڭىندا دا قازاقستان حالقى ءوزىنىڭ باعالى بىرلىگى مەن تەمىردەي ءتوزىمىن تانىتتى.

مىنە، وسى ءتوزىم مەن بىرلىكتىڭ ارقاسىندا ءبىز ءبارىمىز بۇرىنعى بيلىكتىڭ جاقتاستارى جاساعان قاستاندىقتى دا، مەملەكەت تۇتاستىعىن بۇزعىسى كەلەتىن سايقال ساياساتتارىن دا ىسكە اسىرۋعا جول بەرمەي كەلەمىز.

بۇل – ۇلى ەرلىك!

ەندىگى كەزەكتە ارسىز ارانداتۋدىڭ جەتەگىندە كەتپەي، جۇدىرىقتاي جۇمىلىپ، تاۋەلسىزدىكتى ساقتاۋ جولىندا مالىن دا، جانىن دا قۇربان ەتىپ جاتقان، حالىقتىڭ تالاپ-تىلەگى ءتيىستى دەڭگەيدە ورىندالادى دەگەن ۇمىتتەمىز.

قۇرمەتپەن، پارلامەنت ءماجىلىسى دەپۋتاتتارى

ر. زايتوۆ

Abai.kz