ءماجىلىس توراعاسى ەرلان قوشانوۆ مىرزانىڭ نازارىنا!

سونىمەن، ءماجىلىس ءبىراۋىزدان ماقۇلداپ جىبەرگەن «حالىقتىڭ كوشى-قونى تۋرالى» زاڭنىڭ جوباسىن سەنات 18 ءساۋىر كۇنى ەكىنشى وقىلىمدا تومەنگى پالاتاعا كەرى قايتارىپتى.

سەنات وتە دۇرىس شەشىم جاسادى.

اتالعان زاڭنىڭ، وزگەسىن ايتپاعاندا، 20-بابىنىڭ 5) تارماعى اتاجۇرتقا ءوز بەتىمەن كوشىپ كەلىپ، قازاقستان رەسپۋبليكاسىنىڭ ازاماتتىعىن العىسى كەلەتىن اعايىننىڭ تۇرعىلىقتى جەرىن ەركىن تاڭداۋ قۇقىعىن جانە قازاقستان ازاماتتىعىن الۋىن شەكتەپ تاستاعانىن ايتىپ، وتكەن جىلدىڭ 22 قىركۇيەگىنەن بەرى ماسەلە كوتەرىپ كەلە جاتقان بولاتىنبىز.

بۇل نورمانى 2023 جىلى 19 ساۋىردە سەناتتىڭ ماقۇلداعانىن دا سان مارتە قايتالاپ ايتىپ كەلدىك.

التى اي بويى ءماجىلىس توراعاسى ەرلان قوشانوۆ پەن سەنات توراعاسى ماۋلەن اشىمباەۆتىڭ اتىنا جازعان حاتتاردا ەسەپ بولعان جوق. پرەزيدەنت اكىمشىلىگى مەن قۇزىرلى مينيسترلىك باسشىلارىنا دا توقتاۋسىز حات جازۋمەن بولدىق...

سوعان قاراماستان، ءماجىلىس بۇل نورمانى ەش وزگەرىسسىز قابىلداي سالدى.

اشەيىندە «ۇلتىم!»، «حالقىم!» دەپ وڭەشى جىرتىلعانشا ايعايلاپ كەلە جاتقان ماجىلىسمەندەر دە ءۇنسىز قولداي سالعان ەدى.

شىنىن ايتساق، ءبىز ماجىلىستەن تۇڭىلگەنبىز!

ەندى سەنات تا سول سارىنمەن قابىلداپ جىبەرسە، وندا بۇكىل دۇنيەجۇزىنە ماسقارا بولاتىن بولدىق-اۋ، پرەزيدەنتىمىزدى تاعى دا ۇياتقا قالدىراتىن بولدى-اۋ دەپ، قاتتى ابىرجىدىق. تاعى دا سەناتقا حاتتار جازدىق. تۇرسىنحان زاكەن ەكەۋمىز سەناتورلارمەن كەزدەسىپ شىقتىق…

جاسىراتىنى جوق، «بۇل نورمانى قابىلداعان ءبىز ەمەس، ءوز بوعىڭدى ءوزىڭ تازالا!» - دەپ، ءماجىلىس زاڭ جوباسىن سەناتقا ادەيى جىبەرە سالعان شىعار دەگەن دە ويعا كەلگەنبىز.

ەگەر، سەنات بۇل زاڭ جوباسىن سول بەتى وزگەرىسسىز قابىلداي سالسا، «قايعىڭا ورتاقپىز، كوشى-قون!» - دەگەن ماقالا جازىپ، جاريالاعانعا دا تاس-ءتۇيىن دايىن وتىرعانبىز...

قۇدايعا تاۋبە، سەنات، تاعى قايتالاپ ايتايىن، وتە دۇرىس شەشىم قابىلداپ، قانداستارىمىزدى التى اي بويى قان سيگىزگەن زاڭنىڭ جوباسىن ماجىلىسكە كەرى قايتاردى.

بۇل شەشىمى ءۇشىن سەناتقا جانە ونىڭ توراعاسى ماۋلەن اشىمباەۆ مىرزاعا ءوز اتىمنان جانە مۇددەلى قاۋىمنىڭ اتىنان راحمەت ايتامىن.

ايتپاقشى، «توقاەۆتى الداماعان كىم قالدى ءتىرى جاندا؟!» - دەگەن سەنات توراعاسى ماۋلەن اشىمباەۆتىڭ اتىنا جازعان سوڭعى حاتىمىزعا سەناتتان: «ءسىزدىڭ وتىنىشىڭىزدە كوتەرىلىپ وتىرعان ماسەلە «حالىقتىڭ كوشى-قونى تۋرالى» قازاقستان رەسپۋبليكاسى زاڭىنىڭ 20-بابى 5-تارماعىن الىپ تاستاۋ تۋرالى ۇسىنىسىڭىز نازارعا الىنىپ، قازىرگى ۋاقىتتا بۇل ماسەلە ءتيىستى مەملەكەتتىك ورگاندارمەن پىسىقتالۋدا. سىزگە كوشى-قون سالاسىنداعى زاڭنامانى جەتىلدىرۋگە باعىتتالعان ۇسىنىستارىڭىز ءۇشىن العىسىمىزدى بىلدىرەمىز...» - دەگەن جاۋاپ الدىق.

«قازاقستان ازاماتتىعىن الۋ جانە جوعالتۋ تارتىبىنە بىرقاتار تۇزەتۋلەر ەنگىزىلدى...» - دەپتى، اتالعان زاڭ جوباسىن كەرى قايتارىپ جاتىپ، سەنات توراعاسى ماۋلەن اشىمباەۆ تۋىسىمىز.

ماۋلەن ساعاتحانۇلى بۇل ءسوزىن سول اتىشۋلى 20-باپتىڭ 5) تارماعىنا قاراتا ايتقان بولۋى كەرەك دەپ قابىلدادىق.

كوشى-قون ساياساتىمەن ون بەس جىل بويى توقتاۋسىز اينالىسىپ كەلە جاتقان تاجىريبەلى مامان رەتىندە، كوشى-قون ءۇردىسىن رەتتەۋگە ارنالعان زاڭنامالاردى ودان ارى جەتىلدىرە ءتۇسۋ ماقساتىندا ءماجىلىس پەن سەنات دەپۋتاتتارىنا جيىرماعا تارتا ۇسىنىستار ۇسىنعان بولاتىنبىز.

ول ۇسىنىسىمىز ەرمۇرات باپي مەن قازىبەك يسا باستاعان ءبىراز دەپۋتاتتاردىڭ قورجىنىندا جاتىر.

اللا قالاسا، كەرى قايتقان زاڭ جوباسىن قايتا قاراۋ بارىسىندا ول ۇسىنىستارىمىز ەسكەرىلەدى دەپ سەنەمىز. ءسوزسىز ەسكەرىلۋى كەرەك!

ءسوز سوڭىندا ايتارىم:

قۇرمەتتى ەرلان جاقانۇلى!

سىزگە ءوتىنىش، ءبىزدى ەندى قاقساتا بەرمەڭىز!

ەڭ قۇرىعاندا، قۇداي مەن حالىقتان قورىقپاساڭىز دا، پرەزيدەنتىمىزدەن ۇيالىڭىز!

ماڭگىلىك ەشتەڭە جوق، بۇل ءماجىلىس تە تارايدى. رينات زايىتوۆ پەن امانجول التاەۆتى جەتەلەپ الىپ، ەرتەڭ داۋىس سۇراپ، سول حالىقتىڭ الدىنا تاعى باراسىز. سوندا بەتىڭىزبەن جەر باسىپ قالماۋ جاعىن دا ءبىر ءسات ويلانىپ قويعانىڭىز ءجون!

اۋىت مۇقيبەك

Abai.kz