قازاقستاندىق دەلەگاتسيانىڭ اۋعانستانعا ساپارىنداعى نەگىزگى ماسەلەلەردىڭ ءبىرى – بىرلەسكەن كولىك مۇمكىندىكتەرىن كەڭەيتۋ. قازاقستان جانە اۋعانستان پرەمەر-مينيسترلەرىنىڭ ورىنباسارلارى سەرىك جۇمانعارين مەن ابدۋلاني باراداردىڭ 24 ساۋىردە وتكەن كەزدەسۋىندە تاراپتار ورتالىق جانە وڭتۇستىك ازيانى ينتەگراتسيالاۋ جوبالارىنداعى ىنتىماقتاستىقتى دامىتۋعا ءوزارا مۇددەلىلىك تانىتتى.

سۋرەت: primeminister.kz

اتاپ ايتقاندا، قازاقستاندىق تاراپتىڭ ترانساۋعاندىق ءدالىزدى دامىتۋ جوبالارىن: تەرمەز – مازاري-شاريف – كابۋل – پەشاۆار جانە گەرات – كانداگار – سپين-بۋلداك تەمىر جولدارىن سالۋ جونىندەگى جوبالاردى ىسكە اسىرۋعا قاتىسۋعا دايىندىعى بەلگىلەندى. جوبا ورتالىق جانە وڭتۇستىك ازيا ەلدەرى اراسىندا جۇكتەردى جەتكىزۋ ۋاقىتىن 10 ەسەگە قىسقارتۋعا، سونداي-اق جۇكتەردى تاسىمالداۋ قۇنىن تومەندەتۋگە مۇمكىندىك بەرەدى. قازاقستان تەمىر جولدىڭ جوعارعى قۇرىلىسىنا ارنالعان ماتەريالداردى، ءوز ءوندىرىسىنىڭ شپالدارى مەن بەكىتكىشتەرىن جەتكىزۋ ارقىلى ترانساۋعان ماگيسترالىنىڭ قۇرىلىسىنا قاتىسۋعا دايىن.

سوڭعى ءۇش جىلدا قازاقستاننان اۋعانستانعا ەكسپورتتىق تاسىمالداۋ كولەمى تۇراقتى تۇردە ءوسىپ كەلەدى: 2023 جىلى تەمىر جول ارقىلى تاسىمالداۋ كولەمى 2,7 ملن توننانى قۇرادى، ونىڭ 1,5 ملن تونناسى – ۇن جانە استىق. بۇل 2021 جىلعى دەڭگەيمەن سالىستىرعاندا 14%-عا كوپ. الداعى جىلدارعا ارنالعان بولجام – ەكسپورتتىڭ 40%-عا ۇلعايۋى. بۇل رەتتە 2030 جىلعا قاراي تاسىمالداردىڭ 3 ەسە ءوسۋى كۇتىلۋدە.

سۋرەت: primeminister.kz

تاراپتار سونداي-اق ەلدەر اراسىنداعى اۋە قاتىناسىن قالپىنا كەلتىرۋ مۇمكىندىكتەرىن تالقىلادى. قازاقستان مەن اۋعانستاننىڭ اۆياتسيالىق بيلىگى اراسىنداعى ءوزارا تۇسىنىستىك تۋرالى مەموراندۋم شەڭبەرىندە تاراپتاردىڭ اۆياتاسىمالداۋشىلارى اپتاسىنا 3 تۇراقتى جولاۋشىلار جۇك رەيستەرىن ورىنداۋعا قۇقىلى. قازاقستاندىق تاراپ بۇل ماسەلەنى اۋعان اۆياكومپانيالارىنان وتىنىمدەر تۇسكەن كەزدە قاراۋعا دايىن.

وتكەن كەزدەسۋدە «قتج» ۇك» اق وكىلدەرى ەكسپورتتىق جانە ترانزيتتىك جوبالاردى تانىستىردى.

«بۇگىندە قازاقستاننان وزبەكستان، اۋعانستان، پاكىستان ارقىلى جانە ودان ءارى تەڭىز ارقىلى ءباا-دەگى دجەبەل-الي پورتىنا دەيىن جاڭا مۋلتيمودالدى ەكسپورتتىق باعىتتاردى ۇيىمداستىرۋ بويىنشا پيلوتتىق جوبا باستالدى. جاڭا باعىت KTZ Express-ءتىڭ قاتىسۋىمەن ۇيىمداستىرىلدى. ەكسپورتتاۋشى – قازاقستاندىق Bio Synergy co, جۇكتەردى جەتكىزۋ بويىنشا سەرىكتەس – پاكىستاندىق National Logistics Cell (NLC). قازىرگى ۋاقىتتا پاۆلودار وبلىسىندا جۇك تيەۋ باستالدى. بۇل – اليۋميني سيليكاتتى قۋىس ميكروسفەرا. الماتىدا جۇك كونتەينەرلەرگە تيەلىپ، پاكىستاندىق سەرىكتەس ماشينالارىنا اۋىستىرىلادى. ءارى قاراي اۆتوكولىكپەن وزبەكستان مەن اۋعانستان ارقىلى پاكىستاننىڭ كاراچي پورتىنا دەيىن جەتكىزىلەدى. ول جەردەن ەكى كونتەينەر تەڭىز ارقىلى ءباا-دەگى دجەبەل-الي پورتىنا دەيىن جونەلتىلەدى», — دەدى «قتج» ۇك» اق باسقارۋشى ديرەكتورى باۋىرجان ورىنباساروۆ.

ونىڭ ايتۋىنشا، جۇكتەردى مەجەلى جەرگە جەتكىزۋدىڭ كۇتىلەتىن مەرزىمى-شامامەن 20-25 كۇن. پيلوتتىق جوبانى ءساتتى ىسكە اسىرۋ كەزىندە وسى باعىتتىڭ بەلسەندى دامۋى جانە جاڭا باعىت بويىنشا جۇك اعىنىنىڭ ەداۋىر كولەمىن تارتۋ كۇتىلەدى.

سول كۇنى سەرىك جۇمانعاريننىڭ اۋعانستاننىڭ سىرتقى ىستەر ءمينيسترى امير مۋتتاكيمەن جانە ساۋدا جانە ونەركاسىپ ءمينيسترى نۇريددين ازيزيمەن كەزدەسۋلەرى ءوتتى.

Abai.kz