ەكس-مينيستر قۋاندىق بيشىمباەۆتىڭ استانادا ونلاين-ترانسلياتسيامەن ءوتىپ جاتقان سوتى قازاق قوعامىن ەكىگە جاردى دەسەك ارتىق ايتپايمىز.

ورىستانعان كەيبىر قازاقتاردىڭ ۇلتقا جات قىلىقتارى اشىق ەفيردە جۇرتقا ايگىلى بولدى دەگەندى كوزى اشىق جۇرت اشىق ءسوز قىلا باستادى. وسىلايشا قاعىنان جەرىگەن قۇلىن بولىپ تابىلاتىن بۋىننىڭ ءبىر وكىلى بارشا جۇرت الدىندا اشكەرە بولدى.

جان-جارىن ايۋاندىقپەن ولتىرگەن ادام زاڭنان قولداۋ ىزدەپ، قاندى قول قىلمىسىنان قۇتىلماقشى بولعانىن ەشكىم جاقتىرعان جوق. بىراق ءبىر كەزدەگى بيلىكتە بولعانى ءوزىن اقتاپ شىعادى دەگەن دامە دە بولعانىن جاسىرىپ جابۋعا بولمايدى.

ايەلىن ءولتىرىپ، ەندى ءوزىن سۇتتەن اق، سۋدان تازا ەتىپ كورسەتپەكشى بولعان ەكس-مينيستر قۋاندىق بيشىمباەۆتىڭ سوتتا سويلەگەن سوڭعى ءسوزى كوپتىڭ جاعاسىن ۇستاتتى.

باستاپقىدا ادولف گيتلەرگە تيەسىلى بولعان: «ءبىزدىڭ وتىرىگىمىز قانشالىقتى قورقىنىشتى بولسا، ادامدار وعان سونشالىقتى وڭاي سەنەدى»، - دەگەندى كەيىن يوزەف گەببەلس جاعى تالماي قاقساعان. بيشىمباەۆ ءدال وسى دايەكسوزدى ايتتى.

«دايەكسوز ايتقىم كەلمەيدى، بىراق ايتايىن. 30-شى جىلدارى ناتسيستىك گەرمانيادا وسىنداي قايعىلى ۇگىت-ناسيحات ءمينيسترى بولعان. ونىڭ اتاقتى ءسوزى بىلاي بولدى: «ءبىزدىڭ وتىرىگىمىز قانشالىقتى قورقىنىشتى بولسا، ادامدار وعان سونشالىقتى وڭاي سەنەدى». مەنىڭ ءىسىم دە سولاي بولىپ شىعادى»، - دەدى دۇيسەنبى كۇنى سوتتا سوڭعى ءسوزىن ايتقان بيشىمباەۆ.

بيشىمباەۆ بۇنى قاعازدان وقىدى. سونداي-اق ءىس بويىنشا سوتتالۋشى ءىنىسى باقىتجان بايجانوۆ تا ورىس تىلىندەگى سوڭعى ءسوزىن قاعازدان وقىپ، نۇكەنوۆتەر وتباسىنان كەشىرىم سۇراپ، ءوز كىناسىن مويىنداعان جوق.

ەكس-مينيستر بيشىمباەۆ ءوزىن ازاماتتىق جۇبايى سالتانات نۇكەنوۆانىڭ ولىمىنە كىنالى دەپ ەسەپتەيتىنىن، بىراق قاساقانا كىسى ولتىرگەندىگىن تاعى دا مالىمدەدى.

«ەگەر سەندەر جوعارعى باستاۋعا، قۇدايعا سەنەسىڭدەر، ال مەن وعان سەنسەم، ول ءبىزدى سىنايدى، تۇسىنەمىز بە، تۇسىنبەيمىز بە... ءبىز ونىڭ تەستىنەن كۇن سايىن وتەمىز. ەڭ جوعارى ادامگەرشىلىك قۇندىلىقتارعا سىناق، بۇل. سول كۇنى، 8-9 قاراشاعا قاراعان ءتۇنى مەن بۇل تەستىلەۋدەن وتە المادىم. مەن وزىمدە بار جاقسىلىقتىڭ ءبارىن، ءار ادامدا بار نارسەنىڭ ءبارىن قورلادىم. مەن مۇنى تەرەڭ تۇسىنەمىن، كۇن سايىن وكىنەمىن. مەنىڭ ءىس-ارەكەتتەرىم سۇيىكتى ادامىمنىڭ ولىمىنە، ونىڭ اتا-اناسىنىڭ، ونىڭ وتباسى مەن دوستارىنىڭ قايعىسىنا سەبەپ بولدى. مەن ولاردان تاعى دا كەشىرىم سۇرايمىن. بارلىق ازاماتتاردان كەشىرىم سۇرايمىن. مەن اتا-انامنان، تۋىستارىمنان، دوستارىمنان، بالالارىمنان كەشىرىم سۇرايمىن. مەنىڭ قاتەلىكتەرىم ولاردىڭ ومىرلەرىنە قايعى-قاسىرەت، قورقىنىش اكەلدى»، - دەدى سوتتالۋشى.

ول سونداي-اق «بارلىق مۇمكىندىكتەرى بولعانىمەن» جاسىرىنۋعا جانە جاۋاپكەرشىلىكتەن قۇتىلۋعا تىرىسپاعانىن اتاپ ءوتتى. بيشىمباەۆ ءوزىنىڭ سوڭعى سوزىندە الەۋمەتتىك جەلىلەردە وعان دەگەن وشپەندىلىكتى قوزدىرۋ ءۇشىن ۇيىمداستىرىلعان جانە اقىلى كامپانيا ءجۇرىپ جاتىر دەپ مالىمدەدى.

«قۇرمەتتى القابيلەر، سىزدەر باق پەن الەۋمەتتىك جەلىلەردىڭ قاتاڭ قىسىمى جاعدايىندا شەشىم قابىلداۋعا ءماجبۇر بولاسىزدار. وسىنىڭ ءبارى جاساندى، قاساقانا، شەبەر ۇيىمداستىرىلعان جانە تولەنگەن. سىزدەردەن وبەكتيۆتى جانە بەيتاراپ بولۋلارىڭىزدى سۇرايمىن. مەن سالتاناتتىڭ ولىمىنە قاتىستىمىن، ونىڭ ولىمىنە مەن كىنالىمىن. مەن بۇعان جاۋاپ بەرۋگە دايىنمىن»، - دەدى ول.

سوت 10 مامىردا ساعات 10:00-دە جالعاسادى. بيشىمباەۆتار اقتالسا، قازاق قوعامىن قارا باسقانى دەگەن ءسوزدى جۇرت اشىق ايتا باستادى.

Abai.kz