ۇلتتىق قۇرىلتايدىڭ ءۇشىنشى وتىرىسىندا مەملەكەت باسشىسى اۋە قورعانىسى كۇشتەرىنىڭ اۆيابازاسىن اتى اڭىزعا اينالعان ۇشقىش كەڭەس وداعىنىڭ ەكى مارتە باتىرى اۆياتسيا گەنەرال-مايورى سەرگەي لۋگانسكيدىڭ ەسىمىمەن اتاۋدى ۇسىنعان بولاتىن.

ونوماستيكالىق كوميسسيانىڭ وڭ شەشىمىنەن سوڭ اسكەري بولىمدە قورعانىس مينيسترلىگىنىڭ باسشىلىعى مەن جەتىسۋ وبلىسى اكىمدىگىنىڭ، اۋە قورعانىسى كۇشتەرى قولباسشىلىعىنىڭ، اسكەري قىزمەتشىلەر مەن قارۋلى كۇشتەر ارداگەرلەرىنىڭ قاتىسۋىمەن سالتاناتتى ءىس-شارا ءوتتى.

اسكەري ءبولىمنىڭ اۋماعىندا سەرگەي لۋگانسكيدىڭ ءبيۋستى اشىلدى. ونىڭ اشىلۋ سالتاناتىنا قورعانىس ءمينيسترى گەنەرال-پولكوۆنيك رۋسلان جاقسىلىقوۆ، وبلىس اكىمى بەيبىت يساباەۆ، كەڭەس وداعىنىڭ باتىرى، حالىق قاھارمانى اۆياتسيا گەنەرال-مايورى توقتار اۋباكىروۆ جانە حالىق قاھارمانى اۆياتسيا گەنەرال-مايورى ايدىن ايىمبەتوۆ جانە پارلامەنت دەپۋتاتتارى قاتىستى. ولار باتىردىڭ بيۋستىنە گۇل شوقتارىن قويىپ، ءبىر مينۋت ۇنسىزدىكپەن ەسكە الدى.

– ۇلى وتان سوعىسى جىلدارىندا بەس جۇزدەن استام قازاقستاندىق كەڭەس وداعىنىڭ باتىرى اتاعىنا يە بولدى. ونىڭ ىشىندە لەونيد بەدا، تالعات بيگەلدينوۆ، سەرگەي لۋگانسكي جانە يۆان پاۆلوۆ باتىر اتاعىن ەكى مارتە الدى. قارۋلى كۇشتەردىڭ جەكە قۇرامى مەملەكەت باسشىسىنىڭ ەرجۇرەك ۇشقىشتىڭ ەسىمىن ماڭگىلىك ەستە قالدىرۋ تۋرالى ۇسىنىسىن قۋانا قابىلدادى. بۇگىن ءبىز تالدىقورعان اۆيابازاسىنا سەرگەي دانيلوۆيچ لۋگانسكيدىڭ ەسىمىن بەرىپ وتىرمىز، - دەدى قورعانىس ءمينيسترى گەنەرال-پولكوۆنيك رۋسلان جاقسىلىقوۆ.

قورعانىس ۆەدومستۆوسىنىڭ باسشىسى پرەزيدەنت ارميانىڭ جوعارى جاۋىنگەرلىك دايىندىعىن قولداۋ جانە مەملەكەتتىڭ قورعانىس قابىلەتىن قامتاماسىز ەتۋ ىسىندەگى جەتىستىكتەرىنە جوعارى باعا بەرگەنىن اتاپ ءوتتى. "بۇل بىزگە ۇلكەن جاۋاپكەرشىلىك جۇكتەيدى", – دەگەن قورعانىس ءمينيسترى ءبولىمنىڭ جەكە قۇرامى باتىردىڭ ەسىمىن لايىقتى الىپ جۇرەتىنىنە سەنىم ءبىلدىردى.

ءىس-شارالار اياسىندا س. لۋگانسكيدىڭ ءومىرى مەن ەرلىگى تۋرالى فيلم كورسەتىلىپ، فوتوسۋرەت جانە كىتاپ كورمەلەرى ۇيىمداستىرىلدى. قارۋلى كۇشتەر شىعارماشىلىق ۇجىمدارىنىڭ كۇشىمەن كونتسەرتتىك باعدارلاما دايىندالدى.

سەرگەي دانيلوۆيچ لۋگانسكي 1918 جىلى 1 قازاندا ۆەرنىي قالاسىندا (قازىرگى الماتى) شارۋانىڭ وتباسىندا دۇنيەگە كەلگەن. 1938 جىلى ورىنبور اسكەري اۆياتسيالىق مەكتەبىن بىتىرگەننەن كەيىن لەنينگراد اسكەري وكرۋگىنىڭ 49-شى جاۋىنگەرلىك اۆياتسيالىق پولكىندە، سودان كەيىن بالتىق جاعالاۋىندا قىزمەت ەتكەن. 1941 جىلى مامىردا سولتۇستىك كاۆكاز اسكەري وكرۋگىنىڭ 271-ءشى جويعىش اۆياتسيالىق پولكى ەسكادريليا كومانديرىنىڭ ورىنباسارى قىزمەتىنە تاعايىندالدى.

1941 جىلدىڭ قازان ايىنان باستاپ ۇلى وتان سوعىسى مايداندارىندا سوعىسقان. 1942 جىلى مامىردا ول 270-ءشى جاۋىنگەرلىك اۆياتسيا پولكىنىڭ ەسكادريلياسىن باسقاردى. 1944 جىلى ماۋسىمدا لۋگانسكي پولك كومانديرى بولىپ تاعايىندالدى. ول وڭتۇستىك، سولتۇستىك كاۆكاز، ۆورونەج، دالالىق، 2-ءشى جانە 3-ءشى ۋكراين مايداندارىندا سوعىسقان. دونداعى روستوۆتاعى، كۋرسك دوعاسىنداعى شايقاستارعا، دنەپردى، ۋكراينا كسر-ءى مەن پولشانى ازات ەتۋگە قاتىستى.

سوعىس كەزىندە، رەسمي مالىمەتتەر بويىنشا، سەرگەي دانيلوۆيچ لۋگانسكي 390 جاۋىنگەرلىك ميسسيا جاساعان. جەكە ءوزى 36, توپ قۇرامىندا 2 جاۋ ۇشاعىن اتىپ ءتۇسىردى.

سوعىس اياقتالعاننان كەيىن اسكەري-اۋە اكادەمياسىن ءبىتىرىپ، گروزنىي قالاسىنا قىزمەتكە جىبەرىلەدى. ول كومانديردىڭ ۇشۋ جونىندەگى ورىنباسارى، كەيىن سولتۇستىك كاۆكاز اسكەري وكرۋگى 42-ءشى جاۋىنگەرلىك اۆياتسيا ديۆيزياسىنىڭ كومانديرى بولدى.

1956-1957 جىلدارى بەلارۋس كسر-ءىنىڭ بارانوۆيچ قالاسىندا ورنالاسقان اۋە شابۋىلىنا قارسى قورعانىس اسكەرلەرىنىڭ 39-شى جاۋىنگەرلىك اۆياتسيالىق ديۆيزياسىن باسقاردى. 1957-1960 جىلدارى تۇرىكمەن كسر-ءنىڭ كراسنوۆودسك قالاسىنداعى 72-ءشى گۆارديالىق جاۋىنگەرلىك اۆياتسيالىق كورپۋسىنىڭ كومانديرى بولدى. 1964 جىلى اۆياتسيا گەنەرال-مايورى لۋگانسكي زاپاسقا شىعارىلىپ، تۋعان قالاسىنا ورالادى.

1977 جىلى 16 قاڭتاردا قايتىس بولدى. الماتى قالاسىنىڭ ورتالىق زيراتىنا جەرلەنگەن.

جاۋىنگەرلىك ەرلىگى ءۇشىن سەرگەي لۋگانسكيگە ەكى رەت  كەڭەس وداعىنىڭ باتىرى اتاعى بەرىلىپ، لەنين وردەنى مەن "التىن جۇلدىز" مەدالى تاپسىرىلدى. ول سونداي-اق ەكى الەكساندر نەۆسكي، قىزىل تۋ، قىزىل جۇلدىز وردەندەرىمەن جانە كوپتەگەن مەدالدارمەن ماراپاتتالعان.

ءىس-شارا اسكەري ءبولىم اسكەري قىزمەتشىلەرىنىڭ سالتاناتتى شەرۋىمەن اياقتالدى.

Abai.kz