الگىندە عانا ءوزىنىڭ بەسىنشە مارتە تاققا وتىرعان ءراسىمىن ۇلىقتاپ وتكىزگەن رەسەي پرەزيدەنتى ۆلاديمير پۋتين ۇكىمەتتە ازدى-كەم اۋىس-ءتۇيىس جاسادى. بۇل تۋرالى Mezgil.kz اقپاراتتىق پورتالى جازدى. 

رەسەي باسشىسى جاساعان اۋىس-تۇيىستەر ايتارلىقتاي بولا قويعان جوق. پرەمەر-مينيستر ميحايل ميشۋستين باستاعان ۇكىمەتتىڭ كوپ مۇشەسى ءوز قىزمەتتەرىن ساقتاپ قالدى. قىزمەتىندە قالعانداردىڭ ءبىرى – سەرگەي لاۆروۆ.

ۆلاديمير پۋتين رەسەيدىڭ ءسىم باسشىسى لاۋازىمىنا قايتا تاعايىنداۋ ءۇشىن سەرگەي لاۆروۆتىڭ كانديداتۋراسىن ۇسىندى. وسى تاعايىنداۋ كەزىندە لاۆروۆ بۇرىنعى جۇرىسىنەن جاڭىلماي، باتىسقا جۋان جۇدىرىعىن بىلەدى. سوندا لاۆروۆ نە دەدى؟

«ەگەر باتىس ەلدەرى ۋكراينا داعدارىسىن ۇرىس الاڭىندا شەشكىسى كەلسە، وندا ماسكەۋ وعان دايىن. بۇل جولدى تاڭداۋ – ولاردىڭ قۇقىقتارى»، - دەدى ەكىلەنىپ، ەكپىندەتىپ. بۇل لاۆروۆتىڭ مينيستر مىندەتىن اتقارۋشى دەگەن ۋاقىتشا ستاتۋستا ايتقاندارى.

ماۋسىم ايىندا الەمنىڭ 160-تان استام مەملەكەتى شۆەيتساريادا جيىلىپ، ۋكراينا بويىنشا «بەيبىتشىلىك كونفەرەنتسياسىن» وتكىزەتىنى بەلگىلى. بۇل القا-قوتان جيىنعا رەسەي شاقىرىلمادى. شەتقاقپايلداندى. وسىعان وكپەلەگەندەي، سەرگەي لاۆروۆ: «ولاردىڭ رەسەيدى شاقىرماۋى – وقۋشىعا سوگىس بەرگەنى سەكىلدى»، - دەپ سويلەدى. دەپ سويلەپ توقتاعان جوق. ءارى قاراي جالعاپ: «شۆەيتساريا كۇن تارتىبىندە نە قويىلسا دا، بەيبىت كەلىسسوزدەر وتكىزىلەتىن ورىن رەتىندە تۇككە تۇرعىسىز»، - دەدى سەرگەي لاۆروۆ.

ايتا كەتەيىك، اتالعان كونفەرەنتسيا جۇمىسى ۋكراينا پرەزيدەنتى ۆلاديمير زەلەنسكي ۇسىنعان فورمۋلاعا نەگىزدەلگەن. وندا قىتاي تاراپى ۇسىنعان «بەيبىتشىلىك فورمۋلاسى» دا تالقىلانباق.

ونان ءارى: «شۆەيتساريانى ءبىز وسىعان دەيىن بەيتاراپ ەل دەپ اتاپ كەلسەك، ءدال قازىر شۆەيتساريا ۋكراينانىڭ سويىلىن سوعۋشىعا اينالىپ، ءداستۇرلى ۇستانىمىنان ايىرىلدى»، - دەپ كىجىندى. كىجىندى دە: «رەسەي شاقىرىلماعان بۇل كونفەرەنتسيا تەك ماسكەۋگە ۋلتيماتۋم قويۋعا قاۋقارلى»، - دەپ سويلەدى.

لاۆروۆ وسىلاي دەپ جاتقاندا، رەسەيدىڭ فەدەرالدىق كەڭەسى «رەسەيباسىنىڭ سەنىمدى سەرىگى بولعان سەرگەيدى» ءسىم باسشىسى قىزمەتىنە قايتا تاعايىنداپ ۇلگەردى.

ال رەسەيلىك باق ءبىر-ءبىرىنىڭ اۋزىنا تۇكىرىپ قويعانداي: «ناتو ەلدەرى قاقتىعىسقا تىكەلەي ارالاسۋعا قۇلىقتى. بۇل وتپەن ويناۋ»، - دەگەن تەزيستى تارقاتىسىپ جاتىر.

سەرگەي لاۆروۆ: «ۋكرايناعا ارنالعان قارۋ-جاراق تيەلگەن كەز كەلگەن جۇك - رەسەي ءۇشىن زاڭدى ماقساتتى نىسانعا اينالادى»، - دەپ قۇقايلاندى.

لاۆروۆتىڭ ايتۋىنشا، ناتو مەن اقش ءتۇبى بۇل سوعىسقا ارالاسادى. جانە اقش پەن ناتو قاقتىعىسقا تەك قارۋ-جاراق جەتكىزۋمەن عانا ەمەس، ۇلىبريتانيا، گەرمانيا، يتاليا جانە باسقا دا ەلدەر اۋماعىندا كادرلار دايارلاۋمەن دە تىكەلەي قاتىسادى-مىس.

Abai.kz