مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە قىلمىستىق-اتقارۋ جۇيەسى سالالارىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى دەپ حابارلايدى تەلەگرامداعى اقوردانىڭ ءباسپاسوز قىزمەتى.

ەڭ الدىمەن ەلگە ايتار قۋانىشتى حابارىمىز، ەندى بۇدان بىلاي زاڭ بويىنشا مەملەكەتتىك ءتىلدى بىلمەگەندەر قازاقستان ازاماتى بولا المايدى!

قر پارلامەنتى ءماجىلىسى قابىلداعان زاڭ بويىنشا:

قاراپايىم دەڭگەيدە مەملەكەتتىك ءتىلدى بىلمەۋ، قازاقستان كونستيتۋتسياسىنىڭ نەگىزدەرىنەن، عىلىم جانە جوعارى ءبىلىم سالاسىنداعى ۋاكىلەتتى ورگان ايقىندايتىن دەڭگەيدە ءتول تاريحىمىزدان حاباردار بولماۋ قازاقستان ازاماتتىعىن بەرۋدەن جانە قالپىنا كەلتىرۋدەن باس تارتۋ ءۇشىن قوسىمشا نەگىز بولادى.

مەملەكەتتىك تىلدەن ەمتيحان تاپسىراتىن بۇل تالاپ ەتنيكالىق قازاقتارعا قولدانىلمايدى.

«اق جول» دەموكراتيالىق پارتياسى پارلامەنتتە 2017 جىلدان بەرى كوتەرىپ كەلە جاتقان مەملەكەتتىك جانە ۇلتتىق مۇددەنى قورعاۋداعى ماڭىزى وتە زور بۇل ازاماتتىق الۋ ءۇشىن مەملەكەتتىك تىلدەن ەمتيحان تاپسىراتىن تالاپتى زاڭعا ەنگىزگەن قر پارلامەنتى ءماجىلىسى دەپۋتاتى قازىبەك يسا.

ءيا، 2017 جىلى ءماجىلىس دەپۋتاتى، «اق جول» دەموكراتيالىق پارتياسىنىڭ توراعاسى ازات پەرۋاشەۆ قازاقستان ازاماتتىعىن العىسى كەلەتىندەر ءۇشىن مەملەكەتتىك ءتىل مەن كونستيتۋتسيا نەگىزدەرىنەن جانە ەل تاريحىنان ەمتيحان تاپسىرۋدى ۇسىنعان بولاتىن.

«كەيبىر مەملەكەتتەردە ەمتيحانداردى ازاماتتىق العىسى كەلگەندەر عانا ەمەس، سونىمەن قاتار، ەڭبەك ميگرانتتارى نەمەسە ۇزاق مەرزىمگە ۆيزا الۋشىلار دا تاپسىرادى. مىسالعا گوللانديا مەن رەسەيدە. ونىڭ ماقساتى - ءتىلدى تۇسىنبەۋ نەمەسە قالىپتاسقان ءداستۇردى بىلمەۋدەن تۋىندايتىن جەرگىلىكتى حالىقپەن جانجالداردى بولدىرماۋ»، - دەگەن ەدى ول دەپۋتاتتىق ساۋالدا.

2022 جىلى 27 ساۋىردە قازىبەك يسا جاريالاعان مەملەكەتتىك ءتىلدى مىندەتتەيتىن زاڭ مەن شۇعىل ۇلتتىق يدەولوگيا كونتسەپتسياسىن قابىلداۋدى تالاپ ەتكەن دەپۋتاتتىق ساۋالدا دا: «ءبىزدىڭ ەلگە باسقا ەلدەردەن قونىس اۋدارۋشىلار اعىلىپ كەلىپ جاتقاندىقتان، ۇلتتىق قاۋىپسىزدىك ماقساتىندا 2017 جىلى «اق جول» فراكتسياسى ۇسىنعانداي، قازاقستان ازاماتتىعىن الۋ ءۇشىن مەملەكەتتىك ءتىل مەن ەل تاريحىنان ەمتيحان تاپسىرۋى تيىستىگىن زاڭمەن بەكىتۋىمىز كەرەك. ەگەر مەملەكەتىمىزگە شەگارامىز قورعان بولا الماسا، مەملەكەتتىك ءتىلىمىز قورعان بولۋى ءتيىس!»، - دەگەن ۇسىنىس تاعى جاسالدى.

«زاڭعا «مەملەكەتتىك ءتىلدى بىلمەگەندەر قازاقستان ازاماتى بولا المايدى!» - دەگەن ۇسىنىس ەنگىزىپ، ول قابىلدانعانىنا قاتتى قۋانىپ وتىرمىز. بۇل مەملەكەتتىك-ۇلتتىق مۇددەنى قورعاۋداعى ۇلكەن بەتبۇرىس! «اق جول» پارتياسى بۇل ۇسىنىستى 2011 جىلعى پارتيا قۇرىلتايىندا جاسالعان ساياسي باعدارلاماسىنان بەرى كوتەرىپ كەلەدى.

زاڭ جوباسىن تالقىلاۋدا ەلىمىز ءۇشىن ءمانى زور بۇل ۇسىنىسىمىزدى قر پارلامەنتى ءماجىلىسىنىڭ زاڭناما كوميتەتى مۇشەلەرى باستاعان دەپۋتاتتار ءبىر اۋىزدان قولدادى.

كەڭ بايتاق جەر كولەمى الەمدە 9-شى ورىن الاتىن، حالقىنىڭ سانى از، اينالاسىن الىپ ەلدەر قورشاعان تاۋەلسىز مەملەكەتتىڭ ۇلتتىق قاۋىپسىزدىگى ءۇشىن ازاماتتىق الۋدا مەملەكەتتىك تىلدەن ەمتيحان تاپسىرۋ زور قورعان بولارى انىق.

بۇدان باسقا دا قانداستارىمىز جانە وڭتۇستىكتەن سولتۇستىككە قونىس اۋدارۋشىلار ءۇشىن ءتيىمدى كوپتەگەن ۇسىنىستارىمىز دا زاڭعا ەندى»، - دەيدى دەپۋتات قازىبەك يسا.

سونىمەن قاتار، وسىدان 7 جىل بۇرىن جاسالعان «اق جولدىڭ» دەپۋتاتتىق ساۋالىندا «كونستيتۋتسيانىڭ 10-شى بابى بويىنشا رەسپۋبليكا ازاماتتىعى ەرەكشە قاسيەتكە يە، سوندىقتان دا تەرروريزممەن اينالىسقاندار جانە ۇلتتىق مۇددەلەرگە اۋىر زارداپ اكەلگەندەر ءۇشىن ازاماتتىقتان ايىرۋ جانە ازاماتتىق بەرىلمەۋ، ولاردىڭ ەلگە كىرۋىنە تىيىم سالۋدى قاراستىرۋ قاجەت»، - دەپ جازىلعان بولاتىن. زاڭعا بۇل ۇسىنىستار دا كىردى.

اتاپ ايتقاندا:

ۇكىمەت ايقىنداعان وڭىرلەرگە قونىس اۋداراتىن ادامدار ءۇشىن شارۋا نەمەسە فەرمەر قوجالىعىنا جەر ۋچاسكەلەرىن بەرۋ كوزدەلگەن;

-قونىس اۋدارۋشىلارعا جانە ولاردىڭ وتباسى مۇشەلەرىنە مەملەكەتتىك قولداۋ رەتىندە كوشۋگە سۋبسيديا، تۇرعىن ءۇي جالداۋ، كوممۋنالدىق قىزمەت تولەمدەرىنىڭ شىعىندارىنا وتەماقى، سونداي-اق ەكونوميكالىق موبيلدىلىك سەرتيفيكاتتارى سەكىلدى ماتەريالدىق كومەك كورسەتۋ كوزدەلگەن;

-قازاقستاندا تۇراقتى تۇرۋعا رۇقسات الۋ قۇقىعىن بەرەتىن ينۆەستورلارعا ارنالعان كوپرەتتىك ۆيزا جانە سۇرانىسقا يە كاسىپ يەلەرى ءۇشىن ۆيزا ەنگىزىلگەن;

-ەكسترەميستىك نەمەسە تەرروريستىك ۇيىمعا قاتىسى بار، قايتادان قىلمىس جاساعان، ۇيىمداسقان توپتىڭ (قىلمىستىق ۇيىمنىڭ) «سەركەسى» سانالاتىن، كامەلەتكە تولماعانداردىڭ جىنىستىق تيىسپەۋشىلىگىنە قارسى قىلمىستار جاساعان، سونداي-اق قازاقستاندا اۋىر نەمەسە اسا اۋىر قىلمىس جاساعان جانە حالىقارالىق شارتتار نەگىزىندە ءوز ازاماتتىعى بار ەلگە بەرىلگەن ادامداردىڭ ەلىمىزگە كىرۋىنە تىيىم سالىنعان.

سونىمەن قاتار زاڭدا حالىقتىڭ كوشى-قونىنا قاتىستى زاڭنامانى ودان ءارى جەتىلدىرۋگە باعىتتالعان باسقا دا تۇزەتۋلەر كوزدەلگەن.

زاڭنىڭ ءماتىنى باسپاسوزدە جاريالانادى.

Abai.kz