ۋكراينا پرەزيدەنتى ۆلاديمير زەلەنسكي حاركوۆتە ورتالىق ازيادان كەلگەن جۋرناليستەرمەن كەزدەسىپ، ۋكرايناداعى سوعىس تۋرالى مالىمەتتەرىمەن ءبولىستى. سۇحباتتىڭ تولىق نۇسقاسى Orda.kz پورتالىندا جاريالاندى. 

ۋكراينا پرەزيدەنتى زەلەنسكيدىڭ ايتۋىنشا رەسەيدى ۋكراينا مايدانىندا توقتاتپاسا، ولاردىڭ كەلەسى قۇربانى - بالتىق جاعالاۋى ەلدەرى، مولدوۆا مەن قازاقستان بولماق.

زەلەنسكيدىڭ سۇحباتتا:

«سونىمەن ءبىز ولاردىڭ باسىمدىقتارى اراسىندا بالتىق ەلدەرى، مولدوۆا مەن قازاقستان ەكەنى تۋرالى اقپارات الدىق. بۇل رەسەي فەدەراتسياسىنىڭ جاقىن ماقساتتارى», - دەدى .

سونداي-اق زەلەنسكي: «مەن بۇل سوزىمەن ەشكىمدى قورقىتىپ، ۇرەيلەندىرىپ وتىرعان جوقپىن. جاي عانا، ۋكراينا جەڭىلىسكە ۇشىراسا، ءتۇبى بولماي قويمايتىن جاعدايدى ەسكەرتىپ وتىرمىن»، - دەدى.

ۋكراينا پرەزيدەنتى زەلەنسكي سۇحبات بارىسىندا ورتالىق ازيا جۋرناليستەرىنىڭ نازارىن رەسەيگە سەنۋگە بولمايتىندىعىنا اۋدارىپ، ءپۋتيننىڭ تەك ولاردىڭ ەلدەرىنە «دوس» بولىپ كورىنگىسى كەلىپ، بىراق ءىس جۇزىندە ءبىر ساۋساعى بۇگۋلى ەكەندىگىن ايتتى.

زەلەنسكي جينالعانداردى ۋكراينادا نە بولىپ جاتقانىن كورۋگە، جاعدايدى وزدەرى باعالاۋعا جانە ورتالىق ازيانىڭ ۋكرايناداعى اپات پەن گەنوتسيدتىڭ اۋقىمدىلىعىن تولىق ءتۇسىنۋى ءۇشىن ءوز كورەرمەندەرىنە سوعىس تۋرالى شىندىقتى جەتكىزۋگە شاقىردى.

داريعا اسقار

Abai.kz