احمەت جۇبانوۆ الماتىعا الدىرماق بولعان

تارباعاتايدا رايىمبەكتىڭ كەرىمبايى دەگەن ءانشى ءوتىپتى. اۋەزدى ءانى تارباعاتايدىڭ تەرىسكەيى مەن كۇنگەيىن الديلەگەن دەسەدى. ەۋروپانىڭ تالعامپاز تىڭداۋشىسىن ءتانتى قىلىپ، سىرباز ساحناسىن سەرپىلتكەن امىرەدەن كەرىمبايدىڭ داۋىسى كەم ەمەس دەگەن اڭگىمە بار. بۇل تۋرالى قارپىق ەگىزبايۇلى «تاعىلىم» اتتى كىتابىندا (سەمەي، 2001) جازادى: «...الدىنا جىلقى سالماعان بايگە كۇرەڭ سياقتى جۇيرىك ات، قىران بۇركىت، جۇيرىك تازى ۇستاعان رايىمبەكتىڭ كەرىمبايى (1891 – 1949) وسى ايماقتىڭ اقانى مەن ءبىرجانى بولعان...
...1933 جىلى ەل ارالاپ ءجۇرىپ، كوكپەكتىنىڭ «شۇبارشي» كولحوزىندا الماتىدان كەلىپ ونەر كورسەتىپ جۇرگەن امىرە قاشاۋباەۆپەن كەزىگەدى. كەرىمبايعا: ء«سىزدىڭ انشىلىگىڭىز مەنەن ارتپاسا، كەم ەمەس ەكەن» – دەپتى امىرە. «جوق، ءسىز ۇكىمەت ءانشىسىسىز، سىزبەن تەڭەسە المايمىن» – دەدىم» دەپ ايتىپ كەلدى كەكەڭ (جۇرت قۇرمەتپەن كەكە دەيتىن).

...الماتىعا تەاترعا شاقىرىپ، اتاقتى ءارتىس قۋان لەكەروۆ ەكى رەت كەلىپ كەتىپتى. سوعان بارام دەپ جۇرگەندە 1938 جىلى «حالىق جاۋى» رەتىندە ۇستالىپ، جازىقسىز جازالانعان ايتۋلى ونەر يەسى سول ساپاردان قايتپادى».
مىنە، كەرىمباي تۋرالى وسى از ءسوزدىڭ ءوزى ساز دۇنيەگە جەتەلەيدى.

احمەت جۇبانوۆ الماتىعا الدىرماق بولعان

تارباعاتايدا رايىمبەكتىڭ كەرىمبايى دەگەن ءانشى ءوتىپتى. اۋەزدى ءانى تارباعاتايدىڭ تەرىسكەيى مەن كۇنگەيىن الديلەگەن دەسەدى. ەۋروپانىڭ تالعامپاز تىڭداۋشىسىن ءتانتى قىلىپ، سىرباز ساحناسىن سەرپىلتكەن امىرەدەن كەرىمبايدىڭ داۋىسى كەم ەمەس دەگەن اڭگىمە بار. بۇل تۋرالى قارپىق ەگىزبايۇلى «تاعىلىم» اتتى كىتابىندا (سەمەي، 2001) جازادى: «...الدىنا جىلقى سالماعان بايگە كۇرەڭ سياقتى جۇيرىك ات، قىران بۇركىت، جۇيرىك تازى ۇستاعان رايىمبەكتىڭ كەرىمبايى (1891 – 1949) وسى ايماقتىڭ اقانى مەن ءبىرجانى بولعان...
...1933 جىلى ەل ارالاپ ءجۇرىپ، كوكپەكتىنىڭ «شۇبارشي» كولحوزىندا الماتىدان كەلىپ ونەر كورسەتىپ جۇرگەن امىرە قاشاۋباەۆپەن كەزىگەدى. كەرىمبايعا: ء«سىزدىڭ انشىلىگىڭىز مەنەن ارتپاسا، كەم ەمەس ەكەن» – دەپتى امىرە. «جوق، ءسىز ۇكىمەت ءانشىسىسىز، سىزبەن تەڭەسە المايمىن» – دەدىم» دەپ ايتىپ كەلدى كەكەڭ (جۇرت قۇرمەتپەن كەكە دەيتىن).

...الماتىعا تەاترعا شاقىرىپ، اتاقتى ءارتىس قۋان لەكەروۆ ەكى رەت كەلىپ كەتىپتى. سوعان بارام دەپ جۇرگەندە 1938 جىلى «حالىق جاۋى» رەتىندە ۇستالىپ، جازىقسىز جازالانعان ايتۋلى ونەر يەسى سول ساپاردان قايتپادى».
مىنە، كەرىمباي تۋرالى وسى از ءسوزدىڭ ءوزى ساز دۇنيەگە جەتەلەيدى.

كەرىمبايدىڭ ۇلى رامازان اقساقال بۇگىندە الماتىدا تۇرادى. توقسانعا تاياپ قالعان قاريانىڭ شاڭىراعىنا ءوزىمىزدىڭ ەرەكەڭ، ەركىن شۇكىمانوۆ امانداسا بارىپ، ەسكىنىڭ كوزىنەن ءبىرشاما دەرەكتەردى تاسپاعا جازىپ العان ەكەن. وسى تاسپاعا جازىلعان رامازان قارتتىڭ اڭگىمەسىمەن بولىسەيىك. قۇندى دۇنيەنى بولىسكەن ەرەكەڭنىڭ رياسىز پەيىلىنە العىس ايتامىز.

– كەرىمباي ءوز ۋاقىتىندا ەل ارالاپ، حالىق الدىندا ءان سالىپتى. اكەمىز تۋرالى بۇرىنعىنىڭ ادامدارى ءبىلۋشى ەدى. ولاردىڭ قاتارى سيرەدى. سوندىقتان بىلەتىنىمدى سىزدەرگە ايتىپ بەرەيىن. مەن 1925 جىلى رامازان ايىندا دۇنيەگە كەلىپپىن، كوكتەم ۋاعى، ناۋرىز ايى بولسا كەرەك. ون ءۇش جاسقا تولعان كەزىمدە اكەمە «حالىق جاۋى»، «باي بالاسى»، «جاپون تىڭشىسى» دەگەن جازىقسىز ايىپتار تاعىپ، ۇيدەن الىپ كەتتى. ول سونشالىقتى باي ەمەس ەدى. ءبىر ءۇيىر جىلقىسى، ەكى جۇزگە تارتا قويى بار بولاتىن. ءان-جىرمەن ءجۇرىپ، دۇنيە جيماعان ادام. بىراق بايگە ات، قىران بۇركىتكە قۇمار بولدى. ۇيدە دومبىرانىڭ بىرنەشە ءتۇرى تۇراتىن. قۋرايدان جاسالعان سىبىزعى اسپاپتارىمەن، سىرنايمەن اۋىل بالالارىنا كۇي ويناپ، ءان ايتىپ بەرىپ وتىراتىن. قىلقوبىزدى دا ءوزى جاسايتىن، – دەپ باستادى اڭگىمەسىن رامازان كەرىمبايۇلى. – 1938 جىلى «حالىق جاۋى» دەپ الىپ كەتكەن سوڭ، سول جىلى 14 قاراشادا اتىلعان ەكەن. كگب مۇراعاتىنداعى قۇجاتتاردا «كەرىمبايدى تۇركىستان اسكەري وكرۋگىنىڭ تەرگەۋشىسى تەرگەگەن» دەپ جازىلعانىمەن، قاي جەردە اتىلعانى، كىمنىڭ كۋا بولعانى كورسەتىلمەگەن. وگپۋ ادامدارى اۋىلدان توعىز ادامدى الىپ كەتتى. توعىزى دا ءبىر كۇندە اتىلدى. بۇل جايتتان حابارسىز بولعاندىقتان ستالينگە، ۆوروشيلوۆقا اكەمنىڭ جاعدايىن بىلگىم كەلەتىنى تۋرالى حاتتار جازدىم. ولار جاۋاپ قاتپادى. كەڭەستىك ورگاندار «سوۆەت وكىمەتى ەشكىمدى جازىقسىز جازالامايدى» دەگەن سىڭايدا جاۋاپ جىبەردى. ون جىلدان اسا ۋاقىت وتكەن سوڭ، 1949 جىلى كگب-نىڭ سەمەيدەگى بولىمىنەن «كەرىمباي گيپەرتونيادان قايتىس بولدى» دەگەن جاۋاپ كەلدى. ەگەر گيپەرتونيادان قايتىس بولسا، وعان دەيىن بالا-شاعاسىنا ءبىر حات جازۋى كەرەك ەدى...

كەرىمباي 1925 جىلدارى استانا بولىپ تۇرعان قىزىلوردادا ءان ايتىپتى. جاز بويى اۋىلدا بولىپ، قىستا قايتادان قىزىلورداعا كەتىپ قالادى ەكەن. ەلىمىزدىڭ تۇكپىر-تۇكپىرىنەن جينالعان انشىلەردىڭ ىشىندە استانادا ونەر كورسەتۋگە كەرىمباي ماقاجانوۆ، ماناربەك ەرجانوۆ، قۋان لەكەروۆ، جۇسىپبەك ەلەبەكوۆ سىندى دۇلدۇلدەر ىرىكتەلىپ الىنعان.
1935 جىلى ماۋسىم ايىنىڭ ىشىندە اياگوز وزەنىنىڭ بويىنداعى تۇبەكتە كيىز ۇيدە وتىرعان ەدىك. اكەم ۇيگە ات اربامەن احمەت جۇبانوۆ پەن قۋان لەكەروۆتى الىپ كەلدى. احاڭ الدىنا دوڭگەلەك ۇستەلدى قويدىرىپ، ۇستىنە قاعازدارىن جايىپ تاستادى. قاسىنداعىلارعا قايتا-قايتا ءان ايتقىزىپ، كۇي تارتقىزىپ الدەنەنى جازىپ وتىردى. ون جاسار بالا كۇنىمىز عوي، نە جازىپ وتىرعانىن بىلمەيمىز. باعانالى ساياتولەكوۆ مەن ماتكارىم ەسەنعۇلوۆتى ون بەس كۇن بويى جانىندا ۇستادى. اقسۋاتتان دومبىراسىمەن بىرگە ارنايى الدىرعان ەدى. ولاردان ءان مەن كۇي جازىپ العاننان كەيىن احاڭ الماتىعا قايتىپ كەتتى. احاڭنىڭ كەرىمبايدى الماتىعا شاقىرتۋىنىڭ سەبەپتەرى بولعان سياقتى... ويتكەنى 1938 جىلى الماتىعا كوشەمىز دەپ وتىرعان كەزدە اكەم ۇستالىپ كەتتى. الماتىدان ءۇي تابا الماي كىدىرىپپىز.
1935 جىلى اقجال اتتى جاراتىپ، قازاقستاننىڭ 15 جىلدىعى كەزىندە اقسۋاتقا الىپ باردى. اقجال بايگەدەن ءبىرىنشى كەلدى. اۋداندىق اتقارۋ كوميتەتىنىڭ وكىلدەرى مەن اۋدان حالقى جينالىپ، كەرىمبايعا توبەنىڭ باسىندا، كلۋبتا ءان سالدىردى. سول كەزدە مەنى قاسىنا ەرتىپ ءجۇردى. اراسىندا مەن دە شىرىلداپ ءان سالامىن...

گازەتتەگى سۋرەت

توبە باسىندا «اعاشاياقتى» ايتقان ءساتى گازەتكە شىققان. گازەتتى كيىز ءۇيدىڭ كەرەگەسىنە ءىلىپ قوياتىنبىز. وگپۋ ادامدارى كەلگەندە گازەتتى دە وزدەرىمەن بىرگە الىپ كەتتى. وسى سۋرەت ەسىمنەن شىقپايتىن. الماتىداعى مۇراعاتتاردان ەسكى گازەتتەردىڭ بۋماسىن قارادىم. مۇراعات قىزمەتكەرلەرى كونە گازەتتەردى بەرگەنىمەن، اۋدارىستىرىپ قاراي باستاعانىمدا «ۋاقىتىڭىز ءبىتتى» دەپ قايتا الىپ كەتەدى. ەشتەڭەنى ءجوندى قاراي الماعاندىقتان، بۇل شارۋانى عىلىمي ىزدەنىستە جۇرگەن جيەنىم گۇلميراعا تاپسىردىم. ول ءبىر كۇنى اكەمنىڭ سۋرەتى شىققان گازەتتى الىپ كەلدى. «قاراسۋ كولحوزى، ءۇشارال اۋىلى، اقسۋات اۋدانى. ءانشى كەرىمبايدىڭ كوركەمونەرپازدار ۇيىمىندا ءان سالعان ءساتى» دەپ وبلىستىق گازەتكە شىعىپتى. بۇگىندە اكەمنەن قالعان بار بەلگى – وسى.

اكەم ءۇيدى قوراسىمەن بىرگە ءتورت بولمەلى قىلىپ كىرپىشتەن سالدىرعان. 1929 جىلى كامپەسكە ءجۇرىپ، وتىزىنشى جىلدارى اشارشىلىق باستالعاندا شەتكى بولمەنى قايىرجان ەسىمدى اۋىل سوۆەتتىڭ توراعاسى كونتور جاسادى. ودان كەيىنگى بولمەدە ساۋدانىڭ باستىعى كەرىمباي ەسالين دەگەن كىسى (ونى نوعاي كەرىمباي دەپ اتايتىن) وتىردى. ءۇشىنشى بولمەدە قارپىقتىڭ اكەسى ەگىزباي، شەتكى بولمەسىندە ءبىز تۇردىق. ويدا تارى، استىق ساقتايتىن قويما بار ەدى. قايىرجاننىڭ ايەلى قاسقاتاي بىزگە اپاي بولادى. ول قويماشى بولىپ، اۋىلدارعا شاي، كەزدەمە، تارى ۇلەستىرەتىن. وسى ۇيلەردىڭ ءۇش قىز، ءۇش ەر بالاسى بىرگە وينايتىنبىز.

بايگە كۇرەڭ

بىردە مەنى اكەم كوكپەكتىگە ەرتىپ باردى. قۇدايبەرگەن اعامدى دا جورعا تورى تايعا مىنگىزىپ الدى. جانىندا قاپتاماسى بار دومبىرا. كوكپەكتىدە ءبىر نوعايدىڭ ۇيىنە ءتۇسىپ ەدىك، دوستارى بولىپ شىقتى. ول كەزدە ءبىزدىڭ ءۇيدىڭ ەدەنى اعاش بولعانىمەن، توبەسى شاتىرلى ەمەس ەدى. ال نوعايلاردىڭ ءۇيى شاتىرلى، ەدەندى. مونشاسى بار. قوراسىندا جەتى اربا تۇردى. ولار اقسۋات وڭىرىندەگى مالشىلاردان ءجۇن-جۇرقا، تەرى-تەرسەك، مال جيناپ، قوياندى جارمەڭكەسىنە اپارادى ەكەن. جارمەڭكەدەن قايتقاندا ءبىر ارباعا مالايلارىنا بىلعارى، كيىم-كەشەك تيەسە، ءبىر ارباعا قىزدارىنا ءيىسسۋ، سىرعا، ساقينا سىندى اشەكەي بۇيىمداردى تيەيدى. قويان، بۇلعىن ىشىك دەگەندەردىڭ بارلىعىن ورىس كوپەستەرىنەن مالعا ايىرباستاپ الادى.

قارپىقتىڭ مەنەن ەكى-ءۇش جاس ۇلكەندىگى بار ەدى. ول دا اكەيدىڭ قاسىنان قالمايدى. كوكپەكتىدە نوعايدىڭ اسقان ءبىر بايى توي جاساپ جاتىر ەكەن. «بايگە اتتارىن جەتپىس شاقىرىمعا جىبەرەدى» دەگەن ءسوز شىقتى. اكەم «كۇرەڭدى قوسامىن، سەن جەلدىرتىپ كەل» دەدى. سوسىن سۋعا شومىلدىرىپ، سابىنداپ تۇرىپ جۋدى. سۇلىسىن بەردى. ماڭايداعى ەلدىڭ ءبارى جينالدى. ءان شىرقالدى. مەن ۇيىقتاپ قالىپپىن. ءبىر كەزدە «ات كەتتى» دەگەن شۋ ەستىلدى. ءبىر جۋان نوعاي تۇرىپ: ء«اي، قازاقتار! ماعان تالاساتىندارىڭ بار ما؟ 300 سوم تىگەمىن» دەپ باسكە شاقىردى. باس بايگەگە كىلەم جابىلعان اتان تۇيە باستاعان ءتورت قوماقتى جۇلدە تىگىلگەن ەكەن. «مەن بارمىن» دەپ اكەم ورتاعا شىقتى. الايدا، قالتاسىندا 150 سومى عانا بار ەكەن. قالعان اقشانى سول جەردەگى قىزىقشىل جۇرت قولما-قول جيناپ بەردى. ساسكەگە دەيىن ءجۇز قارالى ات بايگەگە كەتتى. اتتاردى جىبەرگەننەن كەيىن اكەمىز ءبىر قاۋىم ەلدىڭ ورتاسىندا ءان ايتتى. ءباس تىككەن نوعاي بايى نوكەرلەرىمەن بولەك توبەدە دۇربىسىمەن شولىپ وتىرعان. ءبىر كەزدە «انە، مەنىڭ اتىم ءبىرىنشى كەلە جاتىر» دەپ جار سالدى. اكەمىز نوعايدىڭ قولىنداعى ءدۇربىسىن جۇلىپ الىپ، قاراپ جىبەردى دە: «اكەڭنىڭ باسى، سەنىڭ اتىڭ» دەپ ءدۇربىنى لاقتىرا سالدى. ايتقانىنداي، ءبىر كەزدە كۇرەڭ دارا شىعا كەلدى. اكەم بايگە العان كۇرەڭدى ءارى-بەرى جەتەكتەپ ءجۇرىپ، ءباستىڭ اقشاسىن ۇستاپ وتىرعان ادامعا: «بارلىعىن تىلەۋىمدى تىلەگەن وسى ەلگە تاراتىپ بەر» دەدى.

اكەم جاس كەزىندە كەرەي جۇرتىنداعى ناعاشىلارىنا بارادى. قايتارىندا: «جيەن، قالاۋىڭ نە؟ ات ءمىنىپ قايت» دەپ ءۇيىر جىلقىنى الدىنا توسقان ەكەن. سوندا ول ءۇيىردىڭ شەتىندە جاباعى ءجۇنى تۇسپەگەن ءبىر تايدى كورسەتىپتى. ناعاشىلارى ء«ىرى جىلقى تاڭدا، تاي العانىڭ ۇيات ەمەس پە؟» دەگەنىنە قاراماي، جەتەكتەپ كەتىپتى. سول تاي بايگە كۇرەڭ بولدى.
گپۋ-دىڭ باستىعى كەنەسارى باكين دەگەن ادام. ول ءالىبي جانگەلدينمەن بىرگە ىستەگەن ەكەن. باكين اكەيمەن دوس ەدى. ءبىر كۇنى «باندى قۋىپ ءجۇرمىن» دەپ بايگە كۇرەڭدى سۇرادى. كۇرەڭ «جات» دەسەڭ جاتاتىن، باقاندى توسىپ «قارعى» دەسەڭ قارعيتىن اقىلدى جانۋار بولاتىن. توڭىرەكتە ودان وزاتىن جىلقى جوق ەدى. اكەم دوسىنىڭ كوڭىلىن قيماي، اتتى بەرەدى. بىردە باكين ۇيىنە نوعايدىڭ بايلارىن قوناققا شاقىرعاندا، قۇيىپ وتىرعان اراعى ءبىتىپ قالىپتى. قىزىپ وتىرعان ول ايەلىنەن اقشا سۇرايدى. بىراق ۇيىندە اقشا بولمايدى. سودان نوعايلارعا: ء«اي، اقشا بار ما؟» دەسە، ولاردىڭ ءبىرى: «اتىڭدى ساتساڭ بەرەمىن» دەپتى. باكين جىلقىنى 30 مىڭعا باعالاپتى. قوناعى سول ساتتە ورامالعا تۇيگەن اقشانى لاقتىرىپ جىبەرىپ، اتتى جەتەكتەپ كەتىپ قالعان ەكەن. تاڭەرتەڭ اقشاسىن الىپ قايتا بارسا، اتتى سويىپ تاستاپتى. سوندا: «سەن اتتى سويعانشا، مىنا ەكى بالانىڭ ءبىرىن نەگە سويمادىڭ؟» دەپ رەنجىپتى. بەس كۇننەن كەيىن گپۋ-ءدىڭ ادامدارى باكيننىڭ ۇيىنە قونىپتى. ولار مىلتىقتىڭ وقشانتايىن بوساتپاعان ەكەن. ۇيدەگى ەكى بالا مىلتىقپەن ويناپ وتىرىپ، قارسىسىنداعى بالانى اتىپ تاستاپتى. «مىنە، اتتىڭ كيەسى» دەپ اكەم ايتقانى ەسىمدە.

جۇسىپبەك پەن ماناربەكتىڭ ۇستازى

1960 جىلدارى اۋىلعا جۇسىپبەك ەلەبەكوۆ كەلدى. مەن ول كەزدە كولحوز توراعاسىمىن. ونەر ادامدارى كەلگەن سوڭ كلۋب جاقتى جايعاستىرماق ويمەن شىعىپ كەتكەنمىن. ۇيگە كەلسەم جۇسەكەڭ الما اتتى قىزىما ءان سالىپ بەرىپ وتىر. «وۋ، جۇسەكە، مۇنىڭىز قالاي؟» دەپ سۇرادىم. «ادام بالاسىنىڭ ۇيىندە ءان سالماۋشى ەدىم، ديمەكەڭنىڭ (قوناەۆتىڭ) ۇيىندە عانا ءبىر كۇيشىمەن قوسىلىپ ءان ايتقانىم بار ەدى. قىزىڭىز سۇراعان سوڭ ايتىپ وتىرمىن. قىزىڭىز «اتا، كىمسىز؟» دەپ سۇرادى. «مەن – ءانشىمىن» دەپ ەدىم، ءبىر دومبىرانى سۇيرەپ الىپ كەلىپ «اتا، ءان سالىڭىزشى» دەدى. شەرتىپ كورسەم، ءان ايتاتىن ادامنىڭ دومبىراسى سياقتى. «قانداي ءان سالايىن؟» دەدىم. «اپام تويعا كەتكەندەگى ءاندى سالىڭىزشى» دەدى» دەيدى جۇسەكەڭ.

شىنىندا، ۇيگە كىرىپ كەلسەم، «اپاڭ تويعا كەتكەندە، نە دەپ كەتتى، جار-جار؟» دەپ جۇسەكەڭ بار داۋىسىمەن ءاندى اسپانداتىپ وتىر ەكەن. سودان قاي جەرگە بارسا دا «كەرىمباەۆتىڭ بالاسى ماعان ءان سالدىردى» دەپ ايتىپ ءجۇردى.
وسى جۇكەڭ، جۇسىپبەك ەلەبەكوۆ اكەم تۋرالى ەستەلىك ايتتى. «16-17 جاسار كەزىمىزدە كەرىمباي ءبىزدى قارقارالىدان شاقىرتىپ الىپ، ءان سالدىردى. ءوزى ايتقان ءاندى قايتالاتىپ ايتقىزادى. قايتا-قايتا ءان سالعان سوڭ تورتەۋىمىزدى الىپ قالدى. ونىڭ ىشىندە ماناربەك ەرجانوۆ تا بار. ءان ايتىپ وتىرعاندا كەكەڭنىڭ داۋىسى قاتتى شىقتى: ء«اي، ءاندى بايىبىنا بارىپ، ناقىشىنا كەلتىرىپ، دومبىراعا ىلەسىپ سالىڭدار. داۋىس دەگەن ايعىردا دا، بۇقادا دا بولادى. قۇر باقىرا بەرۋگە بولمايدى، داۋىستى كوتەرەتىن جەرىندە كوتەرىپ، تۇسىرەتىن جەرىندە ءتۇسىرۋ كەرەك» دەپ قايتا-قايتا ۇيرەتتى. مىنە، ءبىزدىڭ ارنايى وقۋىمىز جوق، كەرىمبايدىڭ ۇيرەتۋىمەن ونەرگە كەلگەن ەدىك. جانىمىزعا جاقىن اعامىز ەدى» دەپ سول ارادا جۇسەكەڭنىڭ كوڭىلى بوسادى. سونان سوڭ «فوتوكارتىشكەسى بار ما؟» دەپ سۇرادى. باسىمدى شايقادىم. «كەكەڭنىڭ سۋرەتى بولسا، احمەت جۇبانوۆتىڭ مۇراعاتىندا بولۋى مۇمكىن. بىراق ساعان ايتپايدى عوي. بار بولسا دا وسى كۇنى جوعالتىپ جىبەرگەن شىعار» دەدى جۇسىپبەك ەلەبەكوۆ.

P.S: مىنە، بۇل ءانشىنىڭ بىزگە جەتكەن قىرلارى عانا. بىلمەيتىنىمىز بۇدان دا كوپ. رامازان اقساقال كەرىمبايدىڭ بىرقاتار اندەرى كەيىن كەڭەستىك تسەنزۋرامەن بۇرمالانىپ، باسقا حالىق كومپوزيتورلارىنا تەلىنىپ كەتكەنى، ءتىپتى ماتىندىك تۇرعىدان وزگەرىسكە ۇشىراعانى تۋرالى دا ايتتى. ويعا قالدىرارلىق دۇنيە. بۇل تۋرالى الداعى ساندارىمىزدا جازامىز.

"ديدار" گازەتى