ۇكىمەتتىڭ ءباسپاسوز قىزمەتى پرەمەر-مينيستر ولجاس بەكتەنوۆتىڭ سۋ تاسقىنىنان كەيىن تۇرعىن ۇيلەر مەن ينفراقۇرىلىمدى قالپىنا كەلتىرۋ ماسەلەلەرى بويىنشا كەڭەس وتكىزگەنىن حابارلادى.

كەڭەستە ونەركاسىپ جانە قۇرىلىس ءمينيسترى قانات شارلاپاەۆ، ەنەرگەتيكا ءمينيسترى الماسادام ساتقاليەۆ، كولىك ۆيتسە-ءمينيسترى ساتجان ابلاليەۆ اعىمداعى جاعداي مەن اتقارىلىپ جاتقان جۇمىستار تۋرالى باياندادى. سونىمەن قاتار باتىس قازاقستان، اقتوبە، اتىراۋ، اقمولا، سولتۇستىك قازاقستان جانە قوستاناي وبلىستارىنىڭ اكىمدەرى تىڭدالدى.

سۋ تاسقىنى سالدارىنان بارلىعى 19 342 جىلجىمايتىن مۇلىك زاقىمداندى. ونىڭ 8 578-ءى قالپىنا كەلتىرۋگە جارامسىز دەپ تانىلدى. بۇگىنگى تاڭدا 2 578 ءۇي قۇرىلىسى مەن 6 مىڭ جىلجىمايتىن مۇلىك ساتىپ الۋ جۇمىستارى جۇرگىزىلىپ جاتىر.

"قالپىنا كەلتىرۋ جۇمىستارىنىڭ قارقىنىن جەدەلدەتۋ قاجەت. قۇرىلىس ماتەريالدارىن جەتكىزۋگە، ەڭبەك رەسۋرستارى مەن ارنايى تەحنيكانى الاڭداردا جۇمىلدىرۋعا بايلانىستى بارلىق ماسەلەنى جىلدام شەشۋ قاجەت. كەستەدەن كەشىگۋگە اكەلىپ سوعاتىن بارلىق پروبلەما تۋرالى دەرەۋ ورتالىققا حابارلاۋ كەرەك. قاجەت بولسا، ءبىز رەسۋرستاردى قايتا ءبولىپ، تەحنيكا مەن ادامداردى كوبەيتەمىز. بارلىق قۇرىلىس نورماسى مەن قاۋىپسىزدىك تالاپتارىنىڭ ساقتالۋىن قامتاماسىز ەتۋ ماڭىزدى. بۇل ماسەلەلەر ازاماتتاردى الاڭداتپاۋى كەرەك. وڭىرلەردىڭ اكىمدەرى ۇيلەردىڭ ساپاسىنا جەكە جاۋاپ بەرەدى", – دەپ اتاپ وتكەن ولجاس بەكتەنوۆ، ونەركاسىپ جانە قۇرىلىس مينيسترلىگىنە قۇرىلىس جۇمىستارىنىڭ ساپاسىن قاتاڭ باقىلاۋدى تاپسىردى.

جەرگىلىكتى جولداردى جوندەۋگە جانە رەكونسترۋكتسيالاۋعا ۇكىمەت رەزەرۆىنەن 22,7 ميلليارد تەڭگە ءبولىنىپ، زارداپ شەككەن وڭىرلەردەگى مەكتەپتەردى قالپىنا كەلتىرۋگە 7,5 ميلليارد تەڭگە باعىتتالدى. بارلىق مەكتەپ وقۋ جىلى باستالعانعا دەيىن قالپىنا كەلتىرىلەدى.

Abai.kz