قر مادەنيەت جانە اقپارات مينيسترلىگىندە شىعارماشىلىق ماماندىققا مەملەكەتتىك ءبىلىم بەرۋ گرانتتارىن ءبولۋ بويىنشا وتىرىس ءوتتى. بۇل تۋرالى Abai.kz حابارلايدى.

قر مادەنيەت جانە اقپارات مينيسترلىگىنىڭ ءباسپاسوز قىزمەتىنىڭ حابارلاۋىنشا وتىرىسقا مادەنيەت جانە اقپارات مينيسترلىگىنىڭ، وقۋ-اعارتۋ مينيسترلىگىنىڭ، عىلىم جانە جوعارى ءبىلىم مينيسترلىگىنىڭ، «اتامەكەن» ۇلتتىق كاسىپكەرلەر پالاتاسىنىڭ وكىلدەرى، جوو باسشىلارى جانە ت. ب. قاتىسقان.

قازىرگى تاڭدا ەلىمىزدىڭ 10 وقۋ ورنىندا شىعارماشىلىق مامانداردى دايارلايدى. ولار 4 جوعارى وقۋ ورنى، 4 كوللەدج جانە 2 ارنايى مەكتەپ.

كەزدەسۋ قورىتىندىسى بويىنشا، 2024-2025 وقۋ جىلىنا 895 – باكالاۆريات، 166 – ماگيستراتۋرا جانە 26 – دوكتورانتۋراعا ءبىلىم گرانتىن ءبولۋ تۋرالى شەشىم قابىلداندى.

كاسىپتىك جانە تەحنيكالىق ءبىلىم بەرۋ مەكەمەلەرى اراسىندا 550 بيۋدجەتتىك ورىن ءبولىندى. بۇل وتكەن وقۋ جىلىمەن سالىستىرعاندا 50 گرانتقا ارتىق.

ساراپشىلار شەشىم قابىلداۋ بارىسىندا ەڭ الدىمەن ەڭبەك نارىعىنىڭ قاجەتتىلىكتەرىن ەسكەردى. ناتيجەسىندە مۋزىكالىق تەاتر رەجيسسەرلەرىنە، مۋزىكاتانۋشىلارعا، رەستاۆراتور-سۋرەتشىلەرگە جانە ستسەناريستەرگە دەگەن جوعارى سۇرانىستى انىقتادى. وسىعان بايلانىستى جاڭا ءبىلىم بەرۋ باعدارلامالارىن اشىپ، گرانتتار سانىن كوبەيتۋ ارقىلى وسى ماماندىقتار بويىنشا كادرلار دايارلاۋعا نازار اۋدارۋ ۇسىنىلدى.

Abai.kz