جامبىل وبلىسى قورداي اۋدانىنىڭ بەتقاينار اۋىلدىق وكرۋگىندە قاتتى جاڭبىر سالدارىنان تاۋلى جەرلەردە سەل ءجۇردى. بۇل تۋرالى Abai.kz حابارلايدى.

"جاقىن ماڭداعى ەلدى مەكەندەرگە قاۋىپ جوق. كەيىنگى مالىمەتتەر بويىنشا، جەكە اۋلا اۋماقتارىن، سونىمەن قاتار تۇرعىن ۇيلەردى سۋ باسۋ فاكتىلەرى تىركەلگەن جوق" – دەلىنگەن حابارلامادا.

الدىن الا مالىمەتتەر بويىنشا، "بەرەكە" شارۋا قوجالىعى اۋماعىنان 671 باس ۇساق مال مەن 10 باس جىلقى سۋعا كەتكەن. بۇگىن بۇل ماسەلەنى ارنايى كوميسسيا ناقتىلايدى

اعىن سۋ سالدارىنان "سوعاندى-بەتقاينار" اۆتوجولىنداعى كوپىر بۇلىنگەن. جەرگىلىكتى اتقارۋشى ورگاندار مەن پوليتسيا قىزمەتىنىڭ كۇشىمەن بەكەتتەر قويىلىپ، جول ءجۇرۋ قامتاماسىز ەتىلدى.

سونىمەن قاتار قورداي اۋدانىنىڭ بىرقاتار ەلدى مەكەندەرىندە 17 شىلدە ساعات 18.00-دەن باستاپ قاتتى جەل تۇرعان. جەلدىڭ جىلدامدىعى - 18-20 م/س، ەكپىنى 25 م/س دەيىن جەتكەن.

بەرىكتاس اۋىلىندا ەكپىنى 43,5 م/س دەيىنگى قاتتى جەل تىركەلدى. قاتتى جەل سالدارىنان 18 جاستاعى تۇرعىنعا ەسكى سارايدىڭ قابىرعاسى قۇلاعان. ول اۋداندىق اۋرۋحاناعا جاتقىزىلدى.

قورداي اۋدانىنداعى جاعداي جامبىل وبلىسى اكىمىنىڭ جەكە باقىلاۋىندا.

سۋرەت: eldala.kz

Abai.kz