جاپوندىق ساراپشىلار كەلەسى جىلعى سۋ تاسقىنى كەزەڭىنە دايىندىق اياسىندا قازاقستاننىڭ 4 وبلىسىنداعى 13 گيدروتەحنيكالىق قۇرىلىسقا زەرتتەۋ جۇرگىزەدى. بۇل تۋرالى قر سۋ رەسۋرستارى جانە يرريگاتسيا مينيسترلىگى حابارلادى. 

سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ جاپونيانىڭ قازاقستانداعى ەلشىسى دجۋن يامادامەن جانە جاپونيا حالىقارالىق ىنتىماقتاستىق اگەنتتىگىنىڭ (JICA) وكىلدەرىمەن كەزدەسۋ بارىسىندا اتالعان ىنتىماقتاستىق ماسەلەلەرىن تالقىلادى.

اگەنتتىك ماماندارى بيىلعى سۋ تاسقىنى كەزىندە وتە ۇلكەن كولەمدە سۋ قابىلداعان گيدروتەحنيكالىق قۇرىلىستاردى تەكسەرەدى. بۇگىنگى تاڭدا قوستاناي، اقمولا، اقتوبە جانە اباي وبلىستارىنىڭ نىساندارىن الدىن الا ۆيزۋالدى تەكسەرىس ءوتتى.

«جاپوندىق ارىپتەستەرىمىزگە كومەك كورسەتكەندەرى ءۇشىن العىس ايتقىم كەلەدى. سۋ تاسقىنى كەزىندە ءبىزدىڭ گيدروتەحنيكالىق نىساندار ءتۇرلى اپاتتاردىڭ الدىن الىپ، ۇلكەن كولەمدە سۋعا توتەپ بەردى. بولاشاقتا بۇل نىسانداردىڭ تۇراقتى جۇمىسىن قامتاماسىز ەتۋ ءۇشىن ولاردىڭ جاي–كۇيىن مۇقيات زەردەلەپ، ىقتيمال وسالدىقتاردى انىقتاپ، ولاردى جويۋ جونىندە الدىن الا ءىس-شارالار قابىلداۋ قاجەت»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

سونداي-اق، تاراپتار سۋ تاسقىنىمەن ءتيىمدى كۇرەسۋ ءۇشىن گيدروتەحنيكالىق قۇرىلىستاردى اۆتوماتتاندىرۋ مەن تسيفرلاندىرۋ ماسەلەسىن تالقىلادى.

اتاپ ايتقاندا، سۋ جىبەرۋ دەڭگەيى مەن كولەمىن انىقتاۋ ءۇشىن ەسەپتەگىش قوندىرعىلاردى ورناتۋ جونىندە سويلەستى.

Abai.kz