جۋرناليستيكا ءار سالانىڭ  جىلىگىن شاعىپ، سول سالانى تەرەڭ زەرتتەۋدى قاجەت ەتەدى. بىراق بۇگىندە قالام تەربەگەن جۋرناليستەردىڭ اراسىندا بەلگىلى ءبىر سالا بويىنشا ماشىقتانعاندارى از. ويتكەنى بىزدە جوعارى وقۋ ورىندارى جۋرناليست ماماندىعىن دايىنداعاندا بەلگىلى ءبىر سالاعا ماشىقتاندىرمايدى.

سوندىقتان بىزگە جەتىسپەيتىنى - سالالىق جۋرناليستيكا. سوڭعى ۋاقىتتا اقپارات جانە مادەنيەت مينيسترلىگى دە اتالعان ماسەلەنى ءجيى كوتەرىپ ءجۇر. سەبەبى پاندەميا كەزىندە مەديتسينا تاقىرىبىن قوزعاپ، تەرەڭىنەن جازاتىن جۋرناليستەردىڭ ازدىعى بايقالدى. ارينە ەلىمىزدە مادەنيەت، سپورت، ەكونوميكا، ساياسات تاقىرىبىندا قالام تەربەپ جۇرگەن كاسىبي جۋرناليستەردىڭ قاتارى كوپ. بىراق بۇگىنگى زاماننىڭ تالابى سالالىق جۋرناليستيكانى دامىتتۋعا سەرپىن بەرۋ. سالالىق جۋرناليستيكانى دامىتۋ جايلى الماتى قالاسىنداعى ءال-فارابي اتىنداعى قازۇۋ -ءنىڭ جۋرناليستيكا فاكۋلتەتى فيلولوگيا عىلىمدارىنىڭ كانديداتى، قاۋىمداستىرىلعان پروفەسسور، تالاي شاكىرت تاربيەلەگەن بىلىكتى مامان قارلىعا مىساەۆا بىلاي دەيدى:

«جۋرناليستيكا سالاسى ىزدەنىستى تالاپ ەتەدى. ول قانداي دا ءبىر ماسەلەنى جازباس بۇرىن ەڭ الدىمەن زەردەلەپ، زەرتتەپ تالقىلاپ ءتىپتى تالداپ جازۋى كەرەك. ويتكەنى سەن اقپاراتتىڭ ماڭىزدىلىعىن، پايداسىن  وقىرمان  قاۋىمعا ۇعىنىقتى تىلمەن ءتۇسىندىرۋىڭ ماڭىزدى. قازىر اقپاراتتىڭ كوپتىگىنەن ونىڭ قايسىسى دۇرىس، قايسىسى بۇرىس ەكەنىن انىقتاي الماي قالدىق. قاراپايىم مىسال كەلتىرەيىن، قازىر ءبىر اقپاراتتىق پورتال ماتەريال جاريالاسا، سول ءماتىندى 100 دەگەن اقپاراتتىق پورتالدان كورەمىز. بۇل وقىرماندى الىستاتادى. سەبەبى ادام ءبىر نارسەنى قايتا- قايتا كورگىسى كەلمەيدى. سوندىقتان اقپارات وزگەشە بولىپ، باسقالارعا ۇقساماي ەرەكشەلىپ تۇرۋى كەرەك. ارينە بۇل سالالىق جۋرناليستيكاعا دا قاتىسى بار. ەگەر جۋرناليست  بەلگىلى ءبىر سالانى مەڭگەرىپ، سول سالاعا قاتىستى ماڭىزدى دۇنيەلەر جازسا ونىڭ ەڭبەگى كورىنە باستايدى. ول سول سالاعا ماشىقتانۋ ارقىلى كاسىبي مامان اتانادى. قازىر ءبىز ستۋدەنتتەرىمىزگە پراكتيكا جۇزىندە وزدەرىن قىزىقتىرعان سالاعا تەرەڭ بويلاۋىن ماشىقتاندىرىپ جاتىرمىز».

قازىرگى تاڭدا بايقاساق جۋرناليستەر امبەباب بولۋ كەرەك دەگەن ءۇردىستى العا تارتىپ، ءار سالانى ءبىر قوزعاپ ءجۇر. ارينە بۇل زامان تالابى دەپ سانايمىز.

دەگەنمەن سالا ماماندارىن دايىنداپ باعىت -باعدار بەرۋدە ۋنيۆەرسيتەت تە ۇلەس قوسۋى كەرەك.

قارلىعا ناقىسبەكقىزى، جوعارى كۋرس  ستۋدەنتتەرى ديپلوم الاتىن كەزەڭگە كەلگەندە قاي سالاعا قاراي باعىت الاتىنىن باعدارلاپ الۋى كەرەك دەگەندى ايتادى.

ول: «ارينە ءبىز ءار سالا بويىنشا اكادەميالىق ءبىلىمدى ۇسىنا المايمىز، سەبەبى جۋرناليستيكا گۋمانيتارلىق سالا.  بىراق ءبىز ستۋدەنتتەردىڭ قارىم-قابىلەتىنە قاراي باعىت بەرەمىز. نەگىزگى سالا بىزدەگى تەلەۆيدەنيە، راديو، مەرزىمدى ءباسپاسوز.  ستۋدەنتتەر اراسىندا تەك گازەت ءجۋرناليسى بولامىن، بولماسا تەلەارنادا ىستەيتىن ءتىلشى بولعىم كەلەدى دەيتىندەر بار.  ولار 4 جىل بويى جۋرناليستيكانىڭ بازالىق ءبىلىمىن الادى. جازۋعا بەيىمدەرى گازەتتى، ەكراننان كورىنگىسى كەلەتىندەر تەلەارناعا بارادى. ال ونىڭ ىشىندە ناقتى ءبىر سالا بويىنشا ءبىلىمىن جەتىلدىرگىسى كەلەتىندەر از. مەن تاجىريبە الماسۋ بارىسىندا فرانتسيا، امەريكا سىندى ەلدەردە بولدىم. ول جاقتا سالالىق جۋرناليستيكاعا اسا ءمان بەرىلەدى. بەلگىلى ءبىر سالانى جەتىك مەڭگەرگىسى كەلگەن جۋرناليست سول باعىتتا ىزدەنەدى. بىزدە بىرتىندەپ وسى ءۇردىستى ەنگىزۋىمىز كەرەك. ستۋدەنتتەرىمىزگە پراكتيكالىق جۇمىس رەتىندە ءبىر سالا ماشىقتانۋدى ۇيرەتۋىمىز كەرەك»، - دەدى.

بىزگە دە وسى ءبىر باعىتتى دامىتۋ كەرەك. سەبەبى سالالىق جۋرناليستيكا – ساپالى اقپارات كەپىلى.

Abai.kz