حالىقتىق قۇقىقتىق ساۋاتتىلىعىنىڭ تومەندىگىنەن كەيبىر تۇرعىندار الاياقتارعا الدانىپ، بەلگىسىز ادامدارعا قارجى اۋدارىپ سان سوعىپ قالىپ جاتىر. اسىرەسە الەۋمەتتىك جەلىدەگى جارناماعا دا سەنىم ارتىپ، اقشاسىنان ايىرىلعاندار بار. Abai.kz ءتىلشىسى  قۇقىقتىق ماسەلەگە قاتىستى سۇراقتاردى الماتى قالاسىنداعى ادۆوكاتتار القاسىنىڭ زاڭگەرى دارىن جانباتىروۆقا قويىپ كوردى.

- دارىن بەكجانۇلى, تاجىريبەلى زاڭگەر رەتىندە ايتىڭىزشى حالىقتىڭ قۇقىقتىق ساۋاتتىلىعىن قالاي باعالايسىز؟

- مەنىڭ ويىمشا، ەلىمىزدىڭ ءاربىر ازاماتى ءوز قۇقىقتارى مەن بوستاندىقتارىن جوعارى دەڭگەيدە ءبىلۋى كەرەك. قۇقىقتىق ساۋاتىڭ تومەن بولسا، اسىرەسە قازىرگى زاماندا وندا كوپ نارسەدەن ءوزىڭدى شەكتەگەنىڭ. بۇرىنعىعا قاراعاندا حالىقتىڭ قۇقىقتىق ساۋاتى جاقسارىپ كەلەدى. وعان ءبىر جاعىنان عالامتوردىڭ دا اسەرى بار. قازىر جەلىنى اشىپ قالساڭ الاياقتىقتىڭ تۇرلەرى، ونىمەن كۇرەسۋ جولدارى، قالاي ارەكەت ەتۋ كەرەكتىگى ەگجەي- تەگجەي جازىلادى. بۇل تاقىرىپ قوعامدا ءالى كۇنگە دەيىن قىزۋ تالقىدا. ودان بولەك، باق ارقىلى دا الاياققا الدانباۋدىڭ جولدارى ناسيحاتتالۋدا. ارينە بۇل جۇمىستار ءوز كەزەگىندە ءوزىنىڭ تيىمدىلىگىن كورسەتۋدە. ادامنىڭ قۇقىقتىق ساۋاتتىلىعى تومەن بولۆعن سايىن، ول ءۇشىن زاڭدار ءتيىمسىز جۇمىس ىستەيتىندەي كورىنەدى. سەبەبى ول قاراپايىم العى شارتتاردى بىلمەيدى. ادام ءوزىن ۇنەمى دامىتىپ، ىزدەنىپ، بىلمەگەنىن ۇيرەنۋى كەرەك دەپ ويلايمىن.

- سىزگە زاڭگەر رەتىندە الماتى تۇرعىندارى كوبىنەسە قانداي ماسەلە بويىنشا ءجيى جۇگىنەدى؟

- ارينە زاڭگەرلىك كەڭەسكە  جۇگىنەتىندەردىڭ قاتارى كوپ. وزدەرىڭىز بىلەسىزدەر قازىر كەڭەستى ونلاين رەجىممەن دە بەرە بەرەمىز. ەڭ باستىسى ءاربىر ادامنىڭ سۇرانىسى جاۋاپسىز قالمايدى. كوبىنە قۇقىقتىق كەڭەس الادى. بىرنەشەۋىن ايتاتىن بولسام، ايەلدەر قاۋىمى اليمەنتتى ءوندىرۋ، ودان بولەك ميكروقارجى مەن بانك الدىنداعى بەرەشەگىن دۇرىس وتەۋ، جەكە سوت ورىنداۋشىنىڭ بۇعاتىن شەشۋ سىندى ماسەلەلەرمەن جۇگىنەدى. بۇگىندە وزەرىڭىز بىلەسىزدەر،  الەۋمەتىك جەلىنى اشىپ قالساڭىز سچەتتى ارەستتەن شىعارىپ بەرەمىن، نەسيە بويىنشا گرافيك قويىپ بەرەمىن دەگەن قىزمەت كوپ. كەيبىرى جوعارى ءبىلىمى بار زاڭگەر دە ەمەس. ازاماتتارىمىز وسىنداي قىزمەت تۇرىنە قوسىمشا اقشا شىعىنداپ جاتادى. ەگەر ونىڭ قۇقىقتىق ساۋاتتىلىعى بولسا، ول ادام ءوزى سول ماسەلەنى شەشىپ الار ەدى.

- قازىر كاسىبي ءارى ساۋاتتى زاڭگەرلەردى قالاي اجىراتامىز؟ ويتكەنى عالام توردى اشىپ قالساق ەكى ادامنىڭ  ءبىرى زاڭگەر؟ بىلىكتى ماماندى قالاي تانيمىز؟

- قازىر عالامتور جۇمىسىمىزدى ءبىرشاما جەڭىلدەتتى. عالامتوردان كەز كەلگەن قاجەتتى ماماندى جىلدام تاباسىڭ. سوندىقتان زاڭگەردى تاڭداماس بۇرىن، الدىمەن ونىڭ بىلىكتىلىگىن ەكسەرۋ كەرەك. ول تۋرالى جازىلعان پىكىرلەردى وقۋ كەرەك. زاڭگەرلەرگە، ادۆوكاتتارعا جۇگىنگەن كەزدە ىسپەن تانىسپاي جاتىپ 100 پايىز كەپىلدىك بەرەتىندەرىنەن قورقۋ كەرەك. ويتكەنى بىلىكتى زاڭگەرلەر تەك قانا ىقتيمال ناتيجەنى عانا ايتادى. ودان بولەك زاڭگەردىڭ قىزمەتى ءوزى تاراپىنان رەسمي قۇجاتسىز تولەنبەۋى كەرەك. ياعني ونىڭ قىزمەتىن قولما قول تولەسەڭىز تولەم تۇبىرتەگىن تالاپ ەتىڭىز. بۇل دا قىزمەت كورسەتۋدىڭ نەگىزگى شارتتارى. سىزدە ەرتەڭگى كۇنى دالەلدەي الاتىن قاعاز بولۋى شارت.

-حالىقتىڭ قۇقىقتىق مادەنيەتتىن ارتتىرۋ ءۇشىن نە ىستەۋىمىز كەرەك؟ مامان رەتىندە پىكىرىڭىزبەن بولىسسەڭىز.

- مەنىڭ ويىمشا، قۇقىقتىق مادەنيەت ول مەكتەپ تابالدىرىعىنان قالىپتاسادى. ويتكەنى ءار ادام قۇقىق ۇعىمىمەن مەكتەپتە تانىسادى. العاشقى تۇسىنىك قالىپتاسادى. سوڭعى كەزدە قۇزىرلى ورگاندار تاراپىنان حالىقتىڭ قۇقىقتىق ساۋاتتىلىعن ارتتىرۋعا باعىتتالعان سەمينا، ترەنينگتەر ءجيى وتۋدە. ادىلەت دەپارتامەنتى، پروكۋراتۋرا،  پوليتسيا دەپارتامەنتى تاراپىنان بىرقاتار ىستەر قولعا الىنىپ جاتقانىن بىلەمىن. قۇقىقتىق مادەنيەتتى ءار ادام ءوزى قالىپتاستىرادى. ول ونىڭ بىلىمىنە، وي ءورىسىنىڭ دامۋىنا تىكەلەي قاتىستى. قۇقىقتىق مادەنيەتتى قالىپتاستىرۋدا ەڭ الدىمەن حالىقتىڭ قۇقىقتىق ساۋاتىن ارتتىرۋعا ءمان بەرۋىمىز كەرەك.

Abai.kz