قازاقستانعا رەسمي ساپارمەن كونگو رەسپۋبليكاسىنىڭ پرەزيدەنتى دەني ساسسۋ-نگەسسون كەلدى.  «اقوردا» رەزيدەنتسياسىندا سالتاناتتى قارسى الۋ ءراسىمى ءوتتى.

ونان سوڭ مەملەكەت باسشىسى قاسىم-جومارت توقاەۆ كونگو رەسپۋبليكاسىنىڭ پرەزيدەنتىمەن شاعىن قۇرامدا كەلىسسوز جۇرگىزدى.

قاسىم-جومارت توقاەۆ دەني ساسسۋ-نگەسسوعا ءىلتيپات ءبىلدىرىپ، ونىڭ ەلىمىزگە بۇل ساپارىنىڭ تاريحي ماڭىزى زور دەپ باعالادى.

– قازاقستانعا قوش كەلدىڭىز! ءسىزدىڭ بۇل العاشقى ساپارىڭىز ەكى ەل بايلانىستارىن دامىتۋعا تىڭ سەرپىن بەرەتىنىنە سەنىمدىمىن. قازاقستان مەن كونگو اراسىنداعى ىقپالداستىقتى ودان ءارى دامىتۋعا مول الەۋەت بار دەپ ەسەپتەيمىن، – دەدى مەملەكەت باسشىسى.

دەني ساسسۋ-نگەسسو قۇرمەت كورسەتكەنى ءۇشىن قاسىم-جومارت توقاەۆقا العىس ايتىپ، قازاقستاننىڭ قازىرگى ساياسي جانە ەكونوميكالىق دامۋداعى جەتىستىكتەرىن جوعارى باعالادى.

– ەلدەرىمىز اراسىنداعى ديپلوماتيالىق قاتىناستاردىڭ 25 جىلدىعى قارساڭىندا استاناعا كەلۋ – ءبىز ءۇشىن زور مارتەبە. بۇل ساپار ساياسات، ديپلوماتيا جانە ەكونوميكا سالالارىنداعى بايلانىستاردى ودان ءارى نىعايتا تۇسەتىنىنە، ال ەكى ەل حالىقتارىنىڭ دوستىق قاتىناستارىن جاڭا دەڭگەيگە كوتەرەتىنىنە سەنەمىن، – دەدى كونگو پرەزيدەنتى.

كەلىسسوز بارىسىندا تاراپتار قازاقستان مەن كونگو اراسىنداعى ەكىجاقتى ىنتىماقتاستىقتىڭ دامۋ پەرسپەكتيۆالارىن تالقىلادى. سونداي-اق حالىقارالىق جانە ايماقتىق كۇن تارتىبىندەگى وزەكتى ماسەلەلەر جونىندە جان-جاقتى پىكىر الماستى.

وسىدان سوڭ قازاقستان مەن كونگو پرەزيدەنتتەرى كەڭەيتىلگەن قۇرامدا كەلىسسوز جۇرگىزدى.

مەملەكەت باسشىسى كونگو پرەزيدەنتىنىڭ قازاق جەرىنە العاشقى ساپارى ەكى ەل اراسىنداعى ديپلوماتيالىق قارىم-قاتىناستىڭ 25 جىلدىعىمەن تۇسپا-تۇس كەلىپ وتىرعانىن اتاپ ءوتتى.

– ءبىز كونگو رەسپۋبليكاسىن افريكا قۇرلىعىنداعى ماڭىزدى سەرىكتەس رەتىندە قاراستىرامىز. ەكى ەل ءبىر-بىرىنەن قاشىقتا ورنالاسقان. سوعان قاراماستان ءوزارا بايلانىستى جان-جاقتى دامىتۋعا مۇددەلىمىز. قازاقستان مەن كونگو ىنتىماقتاستىعىنىڭ الەۋەتى وتە جوعارى. اسىرەسە، ساۋدا-ەكونوميكا، اۋىل شارۋاشىلىعى، كولىك-لوگيستيكا، تاۋ-كەن، ءوندىرىس پەن ينۆەستيتسيا، جاڭا تەحنولوگيالار مەن عارىشتى يگەرۋ باعىتتارى بويىنشا ەكى ەل اراسىنداعى ىقپالداستىقتى جانداندىرۋ قاجەت. بۇگىنگى قول قويىلاتىن قۇجاتتار ساياسي جانە ەكونوميكالىق ىنتىماقتاستىقتى دامىتۋعا تىڭ سەرپىن بەرەدى دەپ سەنەمىن. وسى نيەتىمىزدىڭ ايعاعى رەتىندە ءبىز كونگوعا ەلشى تاعايىندايمىز، – دەدى پرەزيدەنت.

دەني ساسسۋ-نگەسسو قاسىم-جومارت توقاەۆتىڭ كونگوعا ديپلوماتيالىق وكىل تاعايىنداۋ تۋرالى شەشىمى ءوزارا ىنتىماقتاستىقتى نىعايتا تۇسەتىنىن ايتتى.

– شىن مانىندە، ءسىزدىڭ بۇل شەشىمىڭىز قازاقستان مەن كونگو اراسىنداعى ءوزارا ىقپالداستىقتى دامىتۋعا دەگەن ۇمتىلىسىڭىزدى انىق كورسەتەدى. ءبىز جۇزەگە اسىرۋعا كەلىسكەن جوبالار بويىنشا ەكى ەل ۇكىمەتتەرى بىرقاتار كەلىسىم ازىرلەدى. مۇنىڭ ەكى ەلگە دە پايدالى بولارى ءسوزسىز. كەيىنگى جىلدارى قازاقستان دامۋ جولىندا زور تابىسقا جەتكەنىن اتاپ وتكىم كەلەدى. ءبىز ءسىزدىڭ ەلىڭىزبەن ەكونوميكالىق ىنتىماقتاستىقتى نىعايتۋعا مۇددەلىمىز، – دەدى كونگو پرەزيدەنتى.

مەملەكەتتەر باسشىلارى قازاقستان-كونگو سەرىكتەستىگىنىڭ دامۋ پەرسپەكتيۆالارىن تالقىلادى. اتاپ ايتقاندا، تاراپتار ساۋدا-ەكونوميكا، ەنەرگەتيكا، كولىك-لوگيستيكا، قارجى، تسيفرلاندىرۋ، تاۋ-كەن ءوندىرىسى جانە مادەني-گۋمانيتارلىق سالالارداعى ءوزارا ىقپالداستىقتى كەڭەيتۋ ماسەلەلەرىنە ايرىقشا نازار اۋداردى.

كەلىسسوز سوڭىندا دەني ساسسۋ-نگەسسو قاسىم-جومارت توقاەۆتى كونگو ەلىنە ساپارمەن كەلۋگە شاقىردى.

Abai.kz