ەلوردادا جۇمىسسىز قالا تۇرعىندارىنىڭ جۇمىس تاۋىپ، قارجىلىق جاعدايىن جاقسارتۋعا مۇمكىندىك بەرەتىن «JOLTAP» جوباسى جالعاسىپ جاتىر.

ماسەلەن بۇگىنگى كۇننىڭ زاماناۋي ماماندىعى باريستانى دا جوبا ارقىلى تەگىن وقۋعا بولادى. بۇل ماماندىقتى تاڭداعان جاندار ءيىسى اڭقىپ، ءدامى ءتىل ۇيىرەتىن كوفە جاساۋدى ۇيرەنەدى. ال نارىقتا بۇل ماماندىققا قىزىعۋشى ادامدار كوپ. «JOLTAP» جوباسىنىڭ وقىتۋشىسى تۇرار ءىلياستىڭ سوزىنشە، الەۋمەتتىك جوبا ارقىلى وسى ۋاقىتقا دەيىن «باريستا» كۋرسىن 500-دەن استام ەلوردالىق تامامداعان.

«بىلتىر ەلوردادا «ۇزدىك باريستا» جارىسى ءوتتى. سول كەزدە «JOLTAP» جوباسى تۋرالى ەستىدىم. كەيىن جوبا ۇيىمداستىرۋشىلارىنان كۋرسقا وقىتۋشى بولۋعا ءوتىنىش ءتۇستى. جالپى وعان دەيىن شەف-باريستا بولىپ جۇمىس ىستەپ ءجۇرىپ 100-دەن اسا ادامعا كوفە جاساۋدى ۇيرەتكەن ەدىم. وسىلايشا 5 كۇندىك باريستا وقۋىن باستاپ كەتتىك. بۇگىندە بۇل كۋرستى 500-دەن استام ستۋدەنت ءتامامدادى. ءبىر توپتا 10 ادام بولادى. اپتاسىنا 20-30 ستۋدەنت باريستا كۋرسىن مەڭگەرىپ شىعادى»،- دەيدى كۋرس وقىتۋشىسى.

ايتا كەتەيىك، «JOLTAP» جوباسى بويىنشا وقىتۋ باعدارلامالارى ماماندىققا بايلانىستى 2 اپتادان 1 ايعا دەيىن بارىنشا قىسقا مەرزىمدە ناقتى داعدىلاردى مەڭگەرۋگە باعىتتالعان.

Abai.kz