وليمپياداداعى ۇلتتىق قۇرامانىڭ ساتسىزدىگىنەن سپورتتاعى كەيبىر لاۋازىمدى تۇلعالاردىڭ ءوز مانسابىمەن قوش ايتىساتىندىعىن بولجاپ ءبىلۋ ءۇشىن كورىپكەل بولۋدىڭ دا ەش كەرەگى جوق.

كىمدەر جىلىكتىڭ مايلى باسىنان ايىرىلادى دەپ بال اشۋ عانا قالادى. بۇل جولى مانابىمەن قوش ايتىسقاندار دۇرمەگىن قر ۇوك باس حاتشىسى جانار وتەشەۆا باستادى.

جۇرتتىڭ ءبارى اعاش اتقا مىنگىزگەن قر ۇوك باس حاتشىسى جانار وتەشەۆا بۇل لاۋازىمدا وسى جىلدىڭ 28 اقپانىنان بەرى قىزمەت ەتىپ كەلەدى. ەندى جانار وتەشەۆا حانىمىنىڭ قالاي اعاش اتقا مىنگىزىلگەنىن ءسوز ەتە كەتەيىك.

قر ۇوك باس حاتشىسى جانار وتەشەۆا سەنىمىنىڭ جوعالۋىنا بايلانىستى قىزمەتىنەن شەتتەتىلەدى.

«سەنىمحات نەگىزىندە بەرىلگەن باس حاتشىنىڭ وكىلەتتىگى قازاقستان ۇلتتىق وليمپيادا كوميتەتى پرەزيدەنتىنىڭ بۇيرىعىنا سايكەس كەرى قايتارىپ الىندى»، - دەلىنگەن ۇوك رەسمي مالىمدەمەسىندە.

سونداي-اق، باس اسسامبلەيا مۇشەلەرىنىڭ قاراۋىنا وتەشەۆانى «سەنىمنىڭ جوعالۋىنا بايلانىستى» باس حاتشى رەتىندە اتقارۋشى كوميتەتتىڭ قۇرامىنان شىعارۋ تۋرالى ماسەلە شىعارىلاتىن بولادى. مۇنداي شەشىمگە ۇوك باسقا تۇسىنىكتەمە بەرمەيدى.

وسىعان دەيىن سپورت ءجۋرناليسى اسلان قاجەنوۆ: «سپورتتىڭ بارشا ءتۇرىن دامىتامىز دەپ، مەملەكەت قارجىسىن بوسقا شاشپاي، تەك سپورتشىلارىمىز الەمدىك دودادا جارىپ شىعاتىن سپورت تۇرلەرىن عانا بيۋدجەتتەن قارجىلانۋدى قولعا الۋىمىز كەرەك»، - دەگەن ەدى.

سونىمەن 206 مەملەكەتتىڭ ۇكىلەگەن ۇمىتتەرى قاتىسقان پاريج وليمپياداسى دا ءوز مارەسىنە جەتتى. العاشقى ۇشتىكتى اقش 40 التىن، 44 كۇمىس جانە 42 قولامەن جيىنى 126 جۇلدەمەن باستاسا، كەلەسى ورىنداردى قىتاي 40-27-24 (91) جانە جاپونيا 20-12-13 (45) يەلەندى.

وسى وليمپايادادا ورتالىق ازيا ەلدەرى قانداي بيىكتەردى باعىندىردى سول جايىندا ءسوز ەتەتىن بولساق. قازاقستان وزبەكستاننان 30 ساتى تۇركيا 51 ساتى تومەن ورنالاستى. قىرعىز، تاجىك جانە تۇركىمەندەردى اۋىزعا الماي-اق قويالىق.

قازاقستان قۇراماسى پاريج وليمپياداسىن 7 مەدالمەن اياقتادى.
پاريج وليمپياداسىندا قازاقستان قۇراماسىنىڭ 78 سپورتشىسى سپورتتىڭ 25 تۇرىنەن باق سىناستى. ونىڭ ىشىندە 54 سپورتشى وليمپياداعا العاش رەت قاتىستى.

تۋريزم جانە سپورت مينيسترلىگىندە قازاقستان قۇراماسىنىڭ ويىن قورىتىندىسى شىعارىلىپ: «وسىنداي اۋقىمدى ءىس-شارادا جۇلدەلى ورىندارعا يە بولعان بارلىق سپورتشىلاردى قۇتتىقتايمىن. ارينە، ءبىزدىڭ سپورتشىلارىمىزدىڭ بۇدان دا ۇلكەن جەتىستىكتەرگە جەتۋ مۇمكىندىگى بولدى، الايدا ءبىز توكيو وليمپياداسىنان كەيىن ساباق الىپ، پاريجدە ءوز كورسەتكىشتەرىمىزدى جاقسارتا الدىق. ءتورت جىلدان كەيىن ءبىز اقش وليمپياداسىندا بۇدان دا جوعارى ناتيجەلەرگە قول جەتكىزەتىنىمىزگە سەنىمدىمىن»، - دەدى مينيستر ەرمەك مارجىقپاەۆ.

ەگەر سپورت ءجۋرناليسى اسلان قاجەنوۆ پىكىرىنە قازاق بيلىگى قۇلاق اسار بولسا، كەلەسى وليمپيادادا قازاق ەلىنىڭ الار ورنى اسقاقتار ەدى-اۋ!

Abai.kz