قىرعىزستاننىڭ بۇرىنعى پرەزيدەنتى اسقار اقاەۆ جوعورعى كەنەشكە حات جازىپ، ەكس-پرەزيدەنت ستاتۋسىن قالپىنا كەلتىرۋدى ءوتىندى. بۇل تۋرالى Mezgil.kz اقپاراتتىق پورتالى جازدى.

بۇل حاتقا قاتىستى قىرعىزستاننىڭ دەپۋتاتتارى نە دەيدى؟

جوعورعى كەنەشتىڭ كونستيتۋتسيالىق زاڭناما، مەملەكەتتىك قۇرىلىم، سوت-قۇقىقتىق ماسەلەلەر جانە رەگلامەنت كوميتەتىنىڭ توراعاسى، «يشەنىم» فراكتسياسىنىڭ مۇشەسى چولپون سۇلتانبەكوۆا: «مەن حاتتى بۇگىن الدىم. ازىرگە ءوزىمنىڭ بۇعان قاتىستى ناقتى ويىم جوق. جوعورعى كەنەشتىڭ ۇجىمدىق ورگان ەكەنىن بىلەسىزدەر، ياعني دەپۋتاتتارمەن بىرلەسە وتىرىپ شەشەتىن بولامىز. ەندى بارلىق فراكتسيالارمەن كەڭەسىپ، ماسەلەنى كۇن تارتىبىنە شىعارامىز با، جوق پا، دەپۋتاتتىق كوميسسيا قۇرامىز با، جوق پا، سونى شەشەمىز. كەلىسسوزدەر مەن كونسۋلتاتسيالاردىڭ ناتيجەسىندە نە ىستەيتىنىمىز بەلگىلى بولادى», - دەيدى.

«اتا جۇرت» فراكتسياسىنىڭ مۇشەسى مەدەربەك ساققاراەۆ بۇل ماسەلەنى ەل باسشىسى شەشەتىنىن ايتتى. ول بىلاي دەيدى: «بۇل سۇراقتى ەلىمىزدىڭ باسشىسى قاراستىراتىن بولادى. حالىقتىڭ بۇل ماسەلەگە قاتىستى نە ويلايتىنىن بىلمەيمىن. الايدا ونىڭ ەلىمىزدىڭ دامۋىنا قانداي دا ءبىر ۇلەس قوسقانىن دا ەسكەرۋىمىز كەرەك. اسقار اقاەۆتىڭ كوپ دۇنيە جاساعانىن ءسىز بىلەسىز عوي. بۇل ماسەلەدە «يا» نەمەسە «جوق» دەپ جاۋاپ بەرۋگە قاتىستى ءالى ويلانبادىم، ويتكەنى اتالمىش حات جايلى ەندى ءبىلىپ تۇرمىن», - دەيدى.

«ءبۇتىن، قىرعىزستان» فراكتسياسىنىڭ ليدەرى يسحاك ماساليەۆ بولسا ەكس-پرەزيدەنت ستاتۋسىن انىقتاۋعا قاتىستى ناقتى زاڭ جوق دەيدى. ءوز پىكىرىن بىلاي جەتكىزدى: «جالپى بىزدە ەكس-پرەزيدەنت ستاتۋسىن رەتتەۋگە قاتىستى ناقتى زاڭ جوق. پرەزيدەنت ءوزىنىڭ الدىنداعى پرەزيدەنتكە ستاتۋستى بەرىپ جاتادى. المازبەك اتامباەۆ روزا وتىنباەۆاعا ەكس-پرەزيدەنت ستاتۋسىن بەردى. جەەنبەكوۆ — اتامباەۆقا، جاپاروۆ — جەەنبەكوۆكە دەگەندەي. اسقار اقاەۆتىڭ 2005 جىلى ەلدەن قاشىپ كەتۋى ونىڭ ەكس-پرەزيدەنت ستاتۋسىنا كۇمان تۋعىزارى انىق. بۇل ستاتۋسقا قاتىستى بارلىق وزگەرىستەر 2023 جىلى قابىلداندى، ال وعان دەيىنگى مەرزىمگە بۇل وزگەرىستەر جۇرمەيدى.

ەگەر سادىر نۇرقوجاۇلى قالاسا ارنايى بۇيرىقپەن ستاتۋستى بەرە الادى. اڭگىمە ستاتۋس بەرۋ جانە سول ارقىلى مەديتسينالىق، ترانسپورتتا ءجۇرۋ سياقتى جەڭىلدىكتەردى يەمدەنىپ، مەملەكەتتىك رەزيدەنتسيادا تۇرۋ تۋرالى عوي. بىراق مەن تۇبەگەيلى قارسىمىن. مەن ونىڭ قىرعىز كەڭەستىك سوتسياليستىك رەسپۋبليكاسىن قۇلاتۋىنا جول بەرىپ، ەكونوميكانىڭ تولىق كۇيرەۋىنە جول اشىپ، ءدال وسى ساياساتىنىڭ كەسىرىنەن ميلليوننان استام ادامنىڭ شەتەلگە كەتكەنىن كەشىرە المايمىن. ال قازا بولعان ادامداردىڭ قانى ونىڭ ار-ۇجدانىندا دەپ بىلەم»، - دەيدى.

«اليانس» فراكتسياسىنىڭ مۇشەسى، دەپۋتات نيلۋفار اليمجانوۆا بىلاي دەپ پىكىرىن ايتتى: «مەن وعان ەكس-پرەزيدەنت ستاتۋسىن بەرۋدىڭ قاجەتى جوق دەپ ويلايمىن، ويتكەنى بۇل بيۋدجەتتەن قوسىمشا قارجى مەن شىعىندى تالاپ ەتەدى. ال ونىڭ بارلىعى حالىقتىڭ اقشاسى», - دەپتى.

«ەلديك» دەپۋتاتتار توبىنىڭ مۇشەسى كۋبانىبەك ساماكوۆ: «بۇل ءوتىنىش تۋرالى مەن بۇگىن ءبىلىپ تۇرمىن. ەگەر قۇقىقتىق تۇرعىدان قارايتىن بولساق، اسقار اقاەۆتىڭ ەكس-پرەزيدەنت ستاتۋسىن الۋعا تولىق قۇقىعى بار. قاتەلەسپەسەم، وعان اشىلعان قىلمىستىق ىستەر جابىلدى. سول سەبەپتى دە بۇل ماسەلەنى قۇقىقتىق سيپاتتا قاراستىرۋ قاجەت. ياعني زاڭدىق تۇرعىدان قانداي دا ءبىر كەدەرگىنى كورىپ تۇرعانىم جوق. ال ار-ۇجدان تۇرعىسىنان قاراستىرساق، وندا مەن بىلمەدىم. حالىقتىڭ الدىندا جاۋاپكەرشىلىك بولۋ كەرەك. بىراق زاڭ بويىنشا كەدەرگى جوق»، - دەيدى.

Abai.kz