تالعارداعى شەرزات بولاتتىڭ ولىمىنەن كەيىن قوعامدا جەرگىلىكتى جەردەن سايلانعان ءماجىلىس دەپۋتاتتارى قايدا دەگەن سۇراق تۋىندادى. الماتى وبلىسىنان تومەنگى پالاتاعا وتكەن دەپۋتاتتىڭ ءبىرى دانيار قاسقاراۋوۆ وسىنىڭ سەبەبىن ءتۇسىندىردى، دەپ حابارلايدى Qaz365.kz.

«ارتىق سويلەگىم كەلمەيدى. اياعىنا دەيىن بارۋعا دايىنمىن. ەشقانداي كۇمان بولماسىن. حالىق سايلاعان دەپۋتات بولەك. مەملەكەت سايلاعان دەپۋتات بولەك.  بۇل جۇمىسقا بارىمدى سالۋعا ەشقانداي ماندات  كەدەرگى ەمەس. وسىنداي شۋلى ىستەر ءادىل شەشىلۋى ءتيىس. باۋىرجان الەنوۆ (ىشكى ىستەر ءمينيسترىنىڭ ورىنباسارى – رەد) ءبىرىنشى بارعانىندا حالىققا ءتۇسىندىرىپ ايتۋى ءتيىس ەدى. «بارلىعىن باقىلاۋىمىزعا الامىز، ءادىل وتەدى، قوبالجىماڭىزدار» دەگەن سياقتى سوزدەر جەتىسپەدى. ونسىز دا دۇرلىگىپ تۇرعان قوعامعا الەنوۆتىڭ ايتقانى ۇركىتۋ سياقتى بولىپ كەتتى. ەلدىڭ نارازىلىعىن تۋدىردى»، - دەيدى دانيار قاسقاراۋوۆ.

ول قوناەۆتا وتكەن بريفينگ سياقتى اشىقتىق قاجەت ەكەنىن ايتتى. ەندى ءالىپتىڭ ارتىن باعۋىمىز قاجەت دەپ وتىر. سونداي-اق الماتى وبلىسىنان سايلانعان دەپۋتات نەگە بىردەن تالعارعا بارماعانىن ءتۇسىندىردى.

«ءبىز پوليتسەيلەر باقىلاۋعا الدى دەپ ويلادىق. سەبەبى جەرگىلىكتى باسشىلار بار. تەلەفون ارقىلى سۇرادىق. ءۇيىن ورتەگەننەن كەيىن بۇل داۋ ءورشىپ كەتتى. سول سەبەپتى ءىس ونسىزدا ناسىرعا شاۋىپ تۇرعاندا قايعى جۇتىپ وتىرعان وتباسىنىڭ مازاسىن العىم كەلگەن جوق.  كومەكشىم دياس نۇراقىندى جىبەرىپ، اقىرىن بارلىعىن باقىلاپ كەل دەدىم. شەرزاتتىڭ اكەسى مەنى جاقسى تانيدى ەكەن. تەلەفونىمدى بەرىپ، حابارلاسىپ وتىرمىز»، - دەيدى دەپۋتات.

Abai.kz