2024 جىلعى قازاننىڭ 30-31 كۇندەرى قازاقستان رەسپۋبليكاسى مادەنيەت جانە اقپارات مينيسترلىگىنىڭ قولداۋىمەن، قازاق ۇلتتىق ونەر ۋنيۆەرسيتەتىندە بەلگىلى جازۋشى، دراماتۋرگ، قازاقستاننىڭ ەڭبەك سىڭىرگەن قايراتكەرى،قازاقستان رەسپۋبليكاسىنىڭ اباي اتىنداعى مەملەكەتتىك سىيلىعىنىڭ لاۋرەاتى، فرانتس كافكا مەدالىنىڭ يەگەرى، پروفەسسور روزا قاجىعالىمقىزى مۇقانوۆانىڭ 60 جاس مەرەيتويىنا ارنالعان «روزا مۇقانوۆا شىعارماشىلىعى: ادەبيەت، تەاتر، كينو» حالىقارالىق عىلىمي-پراكتيكالىق كونفەرەنتسياسى وتەدى.

ءىس-شاراعا شەتەلدىك عالىمدار، ادەبيەت جانە ونەر قايراتكەرلەرى شاقىرىلىپ وتىر. ولاردىڭ قاتارىندا اۋدارماشى، فيلولوگيا عىلىمدارىنىڭ كانديداتى، اسۋان ۋنيۆەرسيتەتى «شەت تىلدەر» فاكۋلتەتىندەگى «ورىس ءتىلى» كافەدراسىنىڭ مەڭگەرۋشىسى مۇحاممەد رياد (ەگيپەت), جازۋشى، دراماتۋرگ، وزبەكستان جازۋشىلار وداعىنىڭ مۇشەسى جاۆلون جوۆليەۆ (وزبەكستان), اۋدارماشى، PhD دوكتورى، قاجى بايرام ۋالي ۋنيۆەرسيتەتىنىڭ پروفەسسورى جەميلە قىناجى (تۇركيا), حادجەتتەپە ۋنيۆەرسيتەتىنىڭ «ادەبيەت» فاكۋلتەتىندەگى «قازىرگى تۇرىك ديالەكتىلەرى مەن ادەبيەتى» كافەدراسىنىڭ عىلىمي قىزمەتكەرى، ونەر ماگيسترى سابينا سايد (تۇركيا) جانە ونەر ماگيسترى، فرايبۋرگ ۋنيۆەرسيتەتىنىڭ دوكتورانتى، ادەبيەتتانۋشى ۆەرەنا تسابەل (گەرمانيا).

كونفەرەنتسياعا وتاندىق قوعام قايراتكەرلەرى مەن جازۋشىلارى، الماتى قالاسىنان ونەرتانۋ كانديداتى، تەاترتانۋشى، م.و. اۋەزوۆ اتىنداعى ادەبيەت جانە ونەر ينستيتۋتى «تەاتر جانە كينو» ءبولىمىنىڭ مەڭگەرۋشىسى امانكەلدى مۇقان، ونەرتانۋ كانديداتى، ت.ق. جۇرگەنوۆ اتىنداعى قازاق ۇلتتىق ونەر اكادەمياسىنىڭ پروفەسسورى، «تەاتر ونەرىنىڭ تاريحى مەن تەورياسى» كافەدراسىنىڭ مەڭگەرۋشىسى انار ەركەباي، ادەبيەتتانۋشى، فيلولوگيا عىلىمدارىنىڭ كانديداتى، م.و. اۋەزوۆ اتىنداعى ادەبيەت جانە ونەر ينستيتۋتى «اۋەزوۆ ءۇيى» عىلىمي-مادەني ورتالىعىنىڭ عىلىمي قىزمەتكەرى ەرمەك حانكەي، رەجيسسەر، ع. مۇسىرەپوۆ اتىنداعى قازاق مەملەكەتتىك اكادەميالىق بالالار جانە جاسوسپىرىمدەر تەاترىنىڭ كوركەمدىك جە­تەكشىسى، مەملەكەتتىك «دارىن» جاس­تار سىي­لىعىنىڭ لاۋرەاتى فارحات مولداعالي جانە رەجيسسەر، قازاقستاننىڭ ەڭبەك سىڭىرگەن قايراتكەرى، ق. قۋانىشباەۆ اتىنداعى قازاق ۇلتتىق مۋزىكالىق دراما تەاترىنىڭ كوركەمدىك جەتەكشىسى گۇلسينا ميرعاليەۆا شاقىرىلدى.

كونفەرەنتسيا اياسىندا شاقىرىلعان قوناقتاردىڭ شەبەرلىك ساباقتارى، رەجيسسەر س. نارىمبەتوۆتىڭ ر. مۇقانوۆانىڭ اڭگىمەسى نەگىزىندە تۇسىرىلگەن «قىزجىلاعان» ءفيلمىنىڭ كورسەتىلىمى، ر. مۇقانوۆانىڭ شىعارماشىلىعى نەگىزىندە تۇرىك تىلىندە جازىلعان سابينا سايدتىڭ (تۇركيا) كىتابىنىڭ تۇساۋكەسەرى، ۇجىمدىق مونوگرافيا مەن فوتوكورمەنىڭ تۇساۋكەسەرى جانە روزا مۇقانوۆانىڭ وقۋلارى وتكىزىلەدى. سونىمەن قاتار كونفەرەنتسيا قاتىسۋشىلارىنىڭ نازارىنا قر ۇلتتىق ءارحيۆىنىڭ ۇيىمداستىرۋىمەن «روزانىڭ ادەبيەت الەمى» اتتى جەكە قورىنان جاسالىنعان قۇجاتتار كورمەسى ۇسىنىلادى.

كونفەرەنتسياعا قازاقستان رەسپۋبليكاسىنىڭ مەملەكەت جانە قوعام قايراتكەرلەرى، بەلگىلى ادەبيەتتانۋشىلار، كينوتەلەدراماتۋرگتەر، كينوتانۋشىلار، تەاترتانۋشىلار، ونەرتانۋشىلار، ەلىمىزدىڭ جەتەكشى جوعارى وقۋ ورىندارىنىڭ پروفەسسور-وقىتۋشىلار قۇرامى، دوكتورانتتار، ماگيسترانتتار مەن ۋنيۆەرسيتەت ستۋدەنتتەرى قاتىسادى.

وتەتىن كۇنى: 30-31قازان، 2024 جىل

وتەتىن ورنى: قازاقستان رەسپۋبليكاسىنىڭ ۇلتتىق اكادەميالىق كىتاپحاناسى

مەكەن-جايى: استانا ق.، دوستىق داڭعىلى، 11

جاۋاپتىلار:

ۇلاربەك نۇرعالىم +7 (701) 789-88-80

گابدراشيتوۆا كاميلا اليمجانوۆنا +7 (702) 487-84-00

ابەن گۇلميرا سالىمگەرەيقىزى +7 (708) 672-62-11

قوسىمشا مالىمەت:

روزا قاجىعالىمقىزى مۇقانوۆا – 1964 جىلى 14 قازاندا شىعىس قازاقستان وبلىسى، ءۇرجار اۋدانى، كولدەنەڭ اۋىلىندا دۇنيەگە كەلگەن. 1987 جىلى ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن تامامدادى. 1987 جىلى ورتالىق مەملەكەتتىك مۇراعاتتىڭ «ادەبيەت جانە ونەر» بولىمىندە، 1989 جىلى قازاقستان جازۋشىلار وداعىنىڭاۋدارما كوللەگياسىندا اعا رەداكتور قىزمەتىن اتقاردى. 1998-2007 جج. − قر مادەنيەت، اقپارات جانە قوعامدىق دامۋ مينيسترلىگىندە باس مامان، استانا ق.، قر پارلامەنت سەناتىندا جاۋاپتى قىزمەتكەر (2007ج-2011ج), قازاق ۇلتتىق ونەر ۋنيۆەرسيتەتىنىڭ پروفەسسورى (2011ج), 2023 ج. باستاپ ونەر پروفەسسورى (جاك).

«جارىق دۇنيە» (1994, «جالىن»), «دۇنيە كەزەك» (1997, «جازۋشى»), «قۇدىرەت-كيە» (2000, «سوزدىك-سلوۆار»), «ساررا» (2022, «فوليانت»), «بوپاي حانىم» (2023, «فوليانت») اڭگىمەلەر جيناعى مەن درامالىق پوۆەستەر اۆتورى.2001 جىلى روزا مۇقانوۆا رابعۇزيدىڭ «قيسسا-ءسۇل-ءانبي-يا» كىتابىن قازاق تىلىنە اۋداردى.

1996 جىلى م. اۋەزوۆ اتىنداعى مەملەكەتتىك اكادەميالىق تەاترىندا «ماڭگىلىك بالا بەينە» اتتى پەساسى قويىلدى. 1997 جىلى ع. مۇسىرەپوۆ اتىنداعى مەملەكەتتىك اكادەميالىق بالالار مەن جاسوسپىرىمدەر تەاترىندا م. اۋەزوۆتىڭ «قارالى سۇلۋ» اڭگىمەسىنىڭ  جەلىسىمەن درامالىق قويىلىمى ساحنالاندى. 2016 جىلى استانا قالاسىنداعى قاليبەك قۋانىشباەۆ اتىنداعى قازاق مەملەكەتتىك اكادەميالىق مۋزىكالىق دراما تەاترىنىڭ ساحناسىندا  ر.مۇقانوۆانىڭ «ساررا» پەساسى قويىلدى.

2001 جىلى ش. ايمانوۆ اتىنداعى «قازاقفيلم» كينوستۋدياسىندا «قىزجىلاعان» اڭگىمەسىنىڭ جەلىسىمەن فيلم ءتۇسىرىلدى.

«مىسىقتار پاتشالىعى»، «شاتىر استىنداعى مەن»، «ەشكىمدە كىنالى ەمەس» درامالىق شىعارمالارىنىڭ اۆتورى. قازاقستان جازۋشىلار وداعى سىيلىعىنىڭ لاۋرەاتى، ت. ايبەرگەنوۆ (1989) اتىنداعى «جالىن» جۋرنالى سىيلىعىنىڭ لاۋرەاتى. «الاش»  حالىقارالىق ادەبي سىيلىعىنىڭ يەگەرى (2002, «قۇدىرەت-كيە»). 2011 جىلى پراگا قالاسىنداعى ەۋروپالىق قوعامداستىقتىڭ شەشىمىمەن، ادەبيەتكە قوسقان ۇلەسى ءۇشىن فرانتس كافكا مەدالىمەن ماراپاتتالدى.

قازاقستان رەسپۋبليكاسىنىڭ ەڭبەك سىڭىرگەن قايراتكەرى (2012), فرانس كافكا مەدالىنىڭ يەگەرى، «الاش» حالىقارالىق ادەبي سىيلىعىنىڭ يەگەرى، ت. ايبەرگەنوۆ اتىنداعى سىيلىقتىڭ لاۋرەاتى، «جاستار وداعى سىيلىعىنىڭ» يەگەرى، «ۇزدىك دراماتۋرگ» 2016-2019 جج.، «ساحناگەر-2019»،قازاقستان رەسپۋبليكاسىنىڭ اباي اتىنداعى مەملەكەتتىك سىيلىعىنىڭ لاۋرەاتى.

Abai.kz