قازاق پەن قىرعىزدىڭ رەسەيمەن ءبىر ەكونوميكالىق ارباعا جەگىلۋى - باتىستىڭ سالعان سانكتسياسىنا بايلانىستى ءوزىنىڭ كەرى اسەرىن تيگىزە باستادى. وزبەكتەر دە بۇدان تىس قالمادى. ەندى وسى توڭىرەگىندە ءسوز قوزعالىق.

اقش قارجى مينيسترلىگى 17 ەلدىڭ 275 ازاماتى مەن كومپانياسىنا سانكتسيا ەنگىزدى. ولاردىڭ قاتارىندا قازاقستان، وزبەكستان، تۇركيا، شۆەيتساريا، قىتاي، ءۇندىستان جانە باسقالارى بار.

سانكتسيالىق تىزىمگە رەسەيگە تاۋار جەتكىزىپ وتىر دەگەن قازاقستاندىق Kazstanex كومپانياسى دا كىردى. ول الەمنىڭ تۇكپىر-تۇكپىرىنەن، سونىڭ ىشىندە قىتايداعى ءوندىرۋشى زاۋىتتاردان ستانوكتاردى جەتكىزۋمەن اينالىسادى.

Egov.kz مالىمەتىنشە، كومپانيا 2014 جىلى تىركەلگەن. ونىڭ قۇرىلتايشىسى جانە ءبىرىنشى باسشىسى - ۆاسيلي ابراموۆ دەيتىن ادام.

اقش قارجى مينيسترلىگىنىڭ مالىمەتىنشە، Kazstanex جانە Uzstanex (وزبەكستان) كومپانيالارى ەۋروپادان ستانوكتار پارتيالارىن نومينالدى الۋشىلار رەتىندە ارەكەت ەتەدى. سودان كەيىن ولاردى قىتايلىق Shanghai Winsun كومپانياسىنا رەسەيگە جەتكىزۋ ءۇشىن جىبەرەدى.

ەندى وسى سانكتسيالىق قىسىم تاعى دا ءورشدى. اقش قارجى مينيسترلىگى رەسەيگە قارسى سانكتسيالاردى قاتاڭداتقان. رەسەيدى قوسا العاندا، بىرنەشە ەلدەن 400-گە جۋىق كومپانيا جانە «رەسەيگە قارسى سانكتسيالاردى اينالىپ وتۋگە كومەكتەسكە» 30-دان استام ادام سانكتسيا ارقالاعان.

تۇركيالىق كومپانيالار 2023-2024 جىلدارى رەسەيگە ميكروەلەكترونيكا كومپونەنتتەرىن، جارتىلاي وتكىزگىشتەردى، ءتۇرلى ەلەكتر جابدىقتارىن، مويىنتىرەكتەردى جەتكىزۋمەن اينالىسقان.

بۇدان باسقا، رەسەي، بەلارۋس، قىتاي، ءۇندىستان، تۇركيا ازاماتتارىنا دا سانكتسيا سالىنعان. ولاردىڭ اراسىندا رەسەي قورعانىس ءمينيسترىنىڭ ورىنباسارلارى - الەكساندر فومين، پاۆەل فرادكوۆ، اننا تسيۆيلەۆا بار.

بۇعان دەيىن وتاندىق باق اقش-تا قازاقستاننىڭ ۆتب-مەن ىنتىماقتاساتىن بانكتەر مەن كومپانيالارعا قارسى ەكىنشى رەتتىك سانكتسيالار ەنگىزۋ تۋرالى شەشىم قابىلدانعانىن جازعان بولاتىن.

ماۋسىم ايىنىڭ سوڭىندا قازاقستاندىق DA GROUP 22 كومپانياسى دا رەسەيگە كومەك كورسەتكەنى ءۇشىن ەۋرووداق سانكتسيالارىنىڭ 14-ءشى پاكەتىنە ەنگىزىلگەن.

بۇعان دەيىن ەۋرووداق پەن اقش Elem Group كومپانياسىنا ەكىنشى رەت سانكتسيا ەنگىزۋگە ۋادە بەرگەن بولاتىن. كەيىننەن قر ساۋدا جانە ينتەگراتسيا مينيسترلىگىندە وتاندىق باق بۇل كومپانيالار 2023 جىلدىڭ مامىر مەن ماۋسىمىنان باستاپ يمپورتپەن جانە ەكسپورتپەن اينالىسپايتىنىن، ال Elem Group تاراتۋ پروتسەسىندە ەكەنىن ايتتى.

تامىز ايىندا اقش سانكتسيالىق تىزىمگە تاعى 123 كومپانيانى ەنگىزدى، وعان قازاقستان مەن قىرعىزستاندا تىركەلگەن All Global Trading Elektron Dis Ticaret Ltd Sti تۇرىك فيرماسىنىڭ ەكى فيليالى كىردى.

رەسەي بيزنەسى قازاق پەن قىرعىزدى الىپ تا - سوعىپ، شالىپ تا - جىعىپ، ەكى جەپ بيگە شىقپاق بولعانىمەن، باتىس ماسەلەنىڭ انىعىنا جەتىپ، ادىمدارىن اشتىرماي كەلەدى.

Abai.kz