رەسەيدە سەرگەيلەردىڭ ساۋ ميلىسى قالماعانعا ۇقسايدى. اتاقتى بوقتامپاز لاۆروۆتارى ءبىر توبە بولسا، جاتىپ-جاتىپ، شوۆينيستىك دەرتى اسقىنعاندا قۇتىرىپ كەتەتىن، ءسويتىپ قازاققا ءبىر، وزبەك، قىرعىز، تاجىككە ەكى سوقتىعا كەتەتىن ميرونوۆ دەگەن سەرگەيلەرى ەكى توبە ەدى. ەندى ولاردىڭ قاتارىنا كاراگانوۆ دەگەن سەرگەي قوسىلدى.

جاسى 72-دەن اسسا دا اۋىزى اقىلىنا باعىنبايتىن بۇل سەرگەي - جۇرگەن ءبىر ءجاي سەرگەي ەمەس. كرەملدىڭ توڭىرەگىن تورۋىلداپ جۇرگەن، رەسەي پرەزيدەنتىمەن جاقسى سىيلاس دەپ سيپاتتالاتىن سەرگەي (كاراگانوۆ).

سول بۇيدەدى: «يادرولىق قارۋ – بۇل قۇدايدىڭ بىزگە بەرگەن سىيى. ونى قولدانباۋ – كۇنا! بىزدە وسى قارۋدىڭ پايدا بولۋى تەگىن ەمەس. جوعارعى تىلسىم كۇشتىڭ كومەگى بار. قۇداي ەلدەن بۇرىن يادرولىق قارۋ جاساعىسى كەلگەن نەمىستەردىڭ جولىنا توسقاۋىل بولدى. ءسويتىپ، قۇداي وپپەنگەيمەرلەر مەن فۋكستەردىڭ قولىمەن يادرولىق قارۋدى بىزگە بەردى. وسىلايشا قۇداي ادامزاتتى اپاتتان امان الىپ قالدى. ءبىز دە قۇدايدى اشۋلاندىرماي، بۇل قارۋدى بەلسەندى قولدانۋىمىز كەرەك. بۇل قارۋ بىزگە ءوزىمىزدى قۇتقارۋ ءۇشىن بەرىلگەن»، - دەدى.

2023 جىلى: «رەسەي پولشاعا يادرولىق سوققى جاساۋى كەرەك»، - دەپ مالىمدەمە جاساعان دا وسى سەرگەي ەدى...

ءاسىلى بۇل ويناپ وتىرىپ، ويىنا تۇسكەنىن ايتا سالعان جوق. سوڭعى جىلدارى پرەزيدەنت پۋتيننەن تارتىپ، يادرولىق ريتوريكانى كوپ ايتىپ ءجۇر. وسىدان ەكى كۇن بۇرىن عانا رەسەي يادرولىق قارۋدى قولدانۋ بويىنشا جاتتىعۋ وتكىزدى. پۋتين ونى تىكەلەي ەفيردە كورىپ وتىردى.

رەسەي اسكەرى شارتتى قارسىلاسقا يادرولىق سوققى جاساۋ جاتتىعۋىندا «سينەۆا»، «يارس»، «بۋلاۆا» بالليستيكالىق زىمىراندارىن قولداندى.

«يادرولىق قارۋدى قولدانۋ – مەملەكەت قاۋىپسىزدىگىن قورعاۋدىڭ ەڭ اقىرعى امالى.يادرولىق تريادا – رەسەي تاۋەلسىزدىگىنىڭ، تەرريتوريالىق تۇتاستىعىنىڭ ەڭ سەنىمدى كەپىلى!»، - دەپ سويلەدى سوڭىندا پۋتين.

كورشىنىڭ كوڭىلىندەگىسى وسى بوپ تۇر، قازىر... ۇزاققا سوزىلعان سوعىستىڭ نۇكتەسى - نە پۋتين الادى، نە ءپۋتيندى الادى دەگەنگە كەلە جاتقان سىڭايلى...

نۇرگەلدى ابدىعاني

Abai.kz