جاڭا زاڭ: دارىگەردىڭ قاتەلىگى ءۇشىن ناۋقاسقا اقى تولەنەدى
مەديتسينا قىزمەتكەرلەرىنىڭ كاسىپتىك جاۋاپكەرشىلىگىن ساقتاندىرۋ تۋرالى زاڭ كۇشىنە ەندى.
دەنساۋلىق ساقتاۋ سۋبەكتىلەرى (مەديتسينالىق ۇيىمدار جانە جەكە مەديتسينالىق پراكتيكامەن اينالىساتىن جەكە تۇلعالار) مەديتسينا قىزمەتكەرلەرىنىڭ كاسىپتىك جاۋاپكەرشىلىگىن ساقتاندىرۋعا جانە بىرىڭعاي ساقتاندىرۋ پۋلىمەن ساقتاندىرۋ شارتىن جاساسۋعا مىندەتتى. ساقتاندىرۋ شارتى Medpul.kz ەلەكتروندىق اقپاراتتىق جۇيە ارقىلى جۇزەگە اسىرىلادى.
ساقتاندىرۋ تولەمدەرى دارىگەرلەردىڭ بايقاۋسىزدا جاساعان كاسىبي قاتەلىكتەرىنەن زارداپ شەككەن پاتسيەنتكە تولەنەدى. ءومىرى مەن دەنساۋلىعىنا زيان كەلتىرۋ فاكتىسىن راستاۋ جانە ساقتاندىرۋ تولەمىن الۋ ءۇشىن پاتسيەنتكە نەمەسە ونىڭ جاقىن تۋىستارىنا (زاڭدى وكىلدەرىنە) دەنساۋلىق ساقتاۋ مەكەمەسىنە جۇگىنۋ قاجەت.
مەديتسينالىق قىزمەتتى جۇزەگە اسىرۋ ناتيجەسىندە پاتسيەنتتىڭ ءومىرى مەن دەنساۋلىعىنا زيان كەلتىرۋ فاكتىسىنىڭ بولۋ-بولماۋى تۋرالى شەشىمدى تاۋەلسىز ساراپتاما كوميسسياسى قابىلدايدى. ونىڭ قۇرامىندا ساراپشىلار، كاسىبي مەديتسينالىق قاۋىمداستىقتاردىڭ جانە بىرىڭعاي ساقتاندىرۋ پۋلىنا قاتىسۋشى ساقتاندىرۋ ۇيىمىنىڭ وكىلدەرى رەتىندە تارتىلاتىن بەيىندى ماماندار بولادى.
Abai.kz
