انا رەتىندە شالىس باسقان جاستاردىڭ بولاشاعىنا الاڭدايمىز! بۇل بيشىمباەۆتىڭ سوتىندا ەسىمى ەلگە تانىلعان پروكۋرور ايجان ايماعانوۆانىڭ پىكىرى.

بۇگىن استانا قالاسىنداعى دوستىق ۇيىندە قازاقستان حالقى اسسامبلەياسى انالار كەڭەسىنىڭ 10 جىلدىعىنا ارنالعان رەسپۋبليكالىق فورۋم ءوتتى. وسى جيىندا قۋاندىق بيشىمباەۆتىڭ ىسىندەگى مەملەكەتتىك ايىپتاۋشى بولعان ايجان ايماعانوۆا ءسوز سويلەدى.

ايجان ايماعانوۆا:

– ەڭ الدىمەن، بارشاڭىزدى قازاقستان حالقى اسسامبلەياسى جانىنداعى انالار كەڭەسىنىڭ 10 جىلدىق مەرەيتويىمەن قۇتتىقتايمىن. وسى 10 جىل ىشىندە انالار كەڭەسى ەلىمىزدەگى بەدەلدى قوعامدىق ينستيتۋتتاردىڭ بىرىنە اينالدى. ۇيىمنىڭ وڭىرلەردە ءوز كوشباسشىلارى مەن قولداۋشىلارى قالىپتاستى. بۇگىندە ولاردىڭ باسىن بىرىكتىرەتىن ءبىر عانا مۇددە بار. ول – ۇلتتىڭ ساۋلىعى مەن تاربيەسى، ىنتىماعى مەن بىرلىگى.

سىزدەردىڭ وتباسى ينستيتۋتىن ساقتاۋ مەن نىعايتۋعا، وسكەلەڭ ۇرپاقتى تاربيەلەۋگە، جاستار اراسىنداعى قۇقىق بۇزۋشىلىقتىڭ الدىن الۋعا ارنالعان باستامالارىڭىزدىڭ ماڭىزىن ەرەكشە اتاپ وتكىم كەلەدى. انالار كەڭەسىنىڭ مۇشەلەرى ارقاشان قوعامداعى وزەكتى ماسەلەلەرگە ءۇن قوسىپ، ونى شەشۋگە بەلسەنە قاتىسۋدا. ونىڭ ىشىندە قۇقىقتىق تاربيە بەرۋ ماسەلەسى دە بار.

وزدەرىڭىزگە ءمالىم، كەيىنگى كەزدەرى جاستار اراسىنداعى قۇقىق بۇزۋشىلىقتىڭ كوبەيۋى بايقالادى. زورلىق-زومبىلىق، ۆانداليزم، بۇزاقىلىق فاكتىلەرى، بالالارعا قاتىستى قىلمىستاردىڭ ارتۋى الاڭداتادى.

مەن پروكۋراتۋرا قىزمەتكەرى رەتىندە كۇن سايىن وسىنداي ىستەردىڭ كۋاسىمىن. بۇل بىزگە مورالدىق-پسيحولوگيالىق تۇرعىدان وتە اۋىر. ءبىر جاعىنان انا رەتىندە اياعىن شالىس باسقان جاستاردىڭ بولاشاعىنا ۋايىمدايمىز، ەكىنشى جاعىنان زاڭگەر رەتىندە جانىڭ اۋىرادى. قالاي دەسەك تە، زاڭدى شەشىم شىعارىپ، جاستاردى تۋرا جولعا سالۋعا تىرىسامىز.

بىراق، نەگە ءبىزدىڭ بالالار زاڭ بۇزادى؟ نەگە قاتىگەزدىك تانىتادى؟ وسى ويلار كوپ مازالايدى مەنى، وسى ويلاردان ءبىر تۇيگەنىم، وتباسىندا تاربيە قۇلدىراپ تۇر. «ەل بولامىن دەسەڭ بەسىگىندى تۇزە» دەپ ايتقان مۋحتار اۋەزوۆ. ەندەشە، وتباسىنا بەت بۇرايىق.

وتباسىنىڭ ۇيىتقىسى – انا. بۇگىنگى فورۋمعا جينالعان بارشا انالاردى قوعامدا قۇقىقتىق مادەنيەتتى ناسيحاتتاۋعا بەلسەندى اتسالىسۋعا شاقىرامىن. وسى ورايدا، انالار كەڭەسى اياسىندا «ءتارتىپتى وزىڭنەن باستا!» قوعامدىق اكتسياسىن باستاۋعا شاقىرامىن. ونىڭ باستى ماقساتى – جاستار اراسىندا قۇقىقتىق مادەنيەتتى قالىپتاستىرۋعا ۇندەۋ، قۇقىق بۇزۋشىلىقتار مەن تارتىپسىزدىكتىڭ الدىن الۋ، قوعامدا زاڭ مەن ءتارتىپ ۇستەمدىگىن ناسيحاتتاۋ.

وسى ارقىلى جاستاردى قۇقىقبۇزۋشىلىق كەسەلدەردەن اۋلاق بولۋعا تاربيەلەيمىز. «تارتىپكە باعىنعان قۇل بولمايدى، ءتارتىپسىز ەل بولمايدى»، - دەگەن داڭقتى قولباسشى باۋىرجان مومىشۇلى. سوز سوڭىندا زاڭ مەن ءتارتىپتى باستى قۇندىلىق رەتىندە ۇستانىپ، مەملەكەتىمىزدە ادىلەتتىلىك پەن تۇراقتىلىقتى بيىك قويۋعا ءار ازامات، ءار وتباسى ءوز ۇلەسىن قوسۋعا مىندەتتى ەكەنىن اتاپ وتكىم كەلەدى.

Abai.kz