ءماجىلىس دەپۋتاتى مۇرات ابەنوۆ سالاعا جاۋاپتى مينيسترلىكتەردىڭ مونوپولياعا جول بەرگەنىنىڭ كەسىرىنەن ەلدە اۋە بيلەتىنىڭ باعاسى نەگىزسىز ءوسىپ جاتقانىن ايتتى.

«اۋە بيلەتتەرىنىڭ باعاسى وتە جوعارى. ءبىز اۆياكومپانيالاردى ءجيى سىنايمىز. بىراق ءىس جۇزىندە نەگىزگى كىنالىلەردىڭ ءبىرى – ەنەرگەتيكا مينيسترلىگى مەن «قازمۇنايگاز». بۇگىنگى تاڭدا «كۋرسيۆ» پورتالىنىڭ ماتەريالدارى بويىنشا اۆياوتىن باعاسى 600 مىڭ تەڭگە بولعان. وزبەكستاندا ول 200 دوللاردان ارزان. الەمدە وتىن باعاسى، ونىڭ ىشىندە تمد ەلدەرىندە 300 مىڭ تەڭگە. بۇل مونوپوليالىق جاعداي. قازمۇنايگاز باعانى جوعارى ۇستاپ تۇرۋعا ءماجبۇر ەتەدى. ءبىز ءوزىمىز 600 مىڭ توننا ءوندىرىپ، رەسەيدەن 200 مىڭ توننا ساتىپ الامىز. بۇل ماسەلەنى قالاي شەشەمىز؟ مونوپوليانىڭ ءتيىمسىز ۇيىمداستىرۋدىڭ كەسىرىنەن جاساندى تاپشىلىق جاساپ وتىرسىزدار. بۇگىنگى تاڭدا باعا جوعارى. ويتكەنى اۋە بيلەتى قۇنىنىڭ 30%-ىن جانارماي باعاسى قۇراپ وتىر»، - دەدى دەپۋتات.

مينيستر الماسادام ساتقاليەۆ اۆياوتىن يمپورتىن ءارتاراپتاندىرۋ ءۇشىن قىتاي جانە تۇرىكمەنستان ەلدەرىمەن كەلىسسوز ءجۇرىپ جاتقانىن ايتتى.

«ىشكى نارىقتاعى تاپشىلىققا كەلسەك، ۇكىمەتتىڭ شەشىمىنە سايكەس وپەراتور بەلگىلەندى. ءسىز نارىقتى مونوپولياعا اينالدىردىڭدار دەپ وتىرسىز. «قازمۇنايگازدان» باسقا ەشكىم اۆيا وتىن وندىرمەيدى. باعانىڭ وسۋىنە، باسەكەلەستىككە جاتپايتىن تاسىلدەرگە جول بەرمەۋ ءۇشىن مونوپولياعا قارسى ورگاندار تاراپىنان بىرىڭعاي وپەراتور قۇرىلدى. ول «قازمۇنايگاز-اەرو» دەپ اتالادى. بۇل كاسىپورىن اۆياتاسىمالداۋشىلارعا عانا كولىك مينيسترلىگىنىڭ شەشىمىنە سايكەس اۆياوتىن جەتكىزەدى. باسقا حالىقارالىق اۆياتاسىمالداۋشىلار يمپورتتىق اۆياوتىن ساتىپ الادى. نەگىزىنەن رەسەيدەن الادى. بىراق باسقا بالامالار بار. ءبىز قىتايدان، تۇرىكمەنستاننان يمپورتتاۋ مۇمكىندىگىن قاراستىرىپ جاتىرمىز»، - دەدى ۆەدومستۆو باسشىسى.

ءمينيستردىڭ سوزىنشە اۋە بيلەتىنىڭ باعاسى اۋەجايلار جۇرگىزگەن ساياسات ارقىلى قالىپتاسادى.

«بيلەت باعاسىنا كەلسەك، كولىك مينيسترلىگى تۇسىنىكتەمە بەرەدى. دەگەنمەن، اۆيابيلەت باعاسىن «قازمۇنايگاز-اەرو» تاراپىنان اۆيا كەروسيندى جەتكىزۋ باعاسى قالىپتاستىرمايدى. بۇل باعا اۋەجايلاردىڭ جانارمايدى ۇشاققا قۇيۋ قىزمەتىنىڭ باعاسىنان قالىپتاسادى. بۇل باعانىڭ ايتارلىقتاي ايىرماشىلىعى بار. اۋەجايلاردىڭ ءوز ماركەتينگ ساياساتى بار. ياعني، ساقتاۋ، جەتكىزۋ، يمپورتتان اكەلۋ قىزمەتىنىڭ قۇنىن قوسادى. وسى اقپاراتتى سىزدەرگە دە كورۋ كەرەك. ونىڭ ءبارىن كەيىن ۇسىنامىز»، - دەدى الماسادام ساتقاليەۆ.

Abai.kz