قازاقتىڭ قادىرمەندى اقساقالى ءجانابىل سىماعۇلۇلى توقسان جاستان اسقان شاعىندا ۇرىمجىدە دۇنيەدەن وزدى (2024 جىلدىڭ 22 قاراشاسىندا).

ءجانابىل سىماعۇلۇلى سانالى عۇمىرىن تۋعان حالقىنىڭ جان-جاقتىلى ءوسىپ وركەندەۋىنە جۇمساعان اسا كورنەكتى قوعام جانە مەملەكەت قايراتكەرى ەدى.

قىرىق جىلدان استام ۋاقىتقا جالعاسقان قىزمەتتىك ساپارىندا ول شىڭجاڭ ولكەلىك پارتيا كوميتەتىنىڭ ەكىنشى حاتشىسى، شىڭجاڭ ولكەلىك ۇكىمەتتىك ورىنباسار توراعاسى، شىڭجاڭ ولكەلىك ساياسي- ماسليحاتىنىڭ ەكى مارتە توراعاسى سىندى اسا جوعارى لاۋازىمدى قىزمەتتەردى اتقاردى.

سوناۋ ءبىر الاساپىران جىلداردا شىڭجاڭنىڭ پارتيا، ۇكىمەت، ارسەري – ءۇش بيلىگىنىڭ تىزگىنىن قاتار ۇستاعان كەزدەرى دە بولدى.

ءجانابىل سىماعۇلۇلى قانداي قىزمەتكە تاعايىندالسا دا، ودان شاشاۋ شىعارعان ەمەس. ەسەسىنە، قولىنا تيگەن بار مۇمكىندىكتى ءوزىنىڭ تۋعان حالقىنىڭ ۇلتتىق مۇددەسىنە پايدالانا بىلگەن تۇلعا.

ارينە، ونىڭ باسىپ وتكەن قىزمەتتىك ءومىر جولى تاقتاداي تەپ-تەگىس بولا قويعان جوق، كۇرەسپەن ءوتتى.

ءجانابىل سىماعۇلۇلىنىڭ 1970 جىلداردىڭ سوڭىندا شۇار پارتيا كوميتەتىنىڭ ءبىرىنشى حاتشىسى، شۇار توڭكەرىستىك كوميتەتتىڭ مەڭگەرۋشىسى، شۇار ساياسي كەڭەستىڭ توراعاسى، شىڭجاڭ اسكەري رايونىنىڭ ءبىرىنشى كوميسسارى، شىڭجاڭ اسكەري رايون پارتيا كوميتەتى ءبىرىنشى حاتشىسى بولىپ وتىرعان ۋاڭ فىڭمەن ايقاسىپ، ونى شىڭجاڭنان قۋىپ شىققانىن ءبىزدىڭ بالا كەزىمىزدە ارعى بەتتىڭ حالقى اڭىز قىلىپ ايتاتىن.

«شىرىلداعان شىندىقتى ايتقىزبايمىن دەسەڭىز، مەنىڭ اۋىلىما قايتۋىما بولادى! ەڭبەك ىستەي الامىن، مال باعا الامىن، تۇرمىس كەشىرۋدىڭ جولىن بىلەمىن...»، - دەگەن ءسوزدى جاكەڭ ۇلكەن جينالىستا قاسقايىپ تۇرىپ وسى ۋاڭ فىڭعا ايتقان بولاتىن.

1949 جىلى كوممۋنيستىك قىتاي ۇكىمەتى بيلىككە كەلگەن سوڭ، جاڭىلماسام، شىڭجاڭدى گەنارال ۋاڭ جىن باسقاردى.

ۋاڭ جىننەن كەيىن ۋاڭ ىنماۋ كەلدى.

ۋاڭ ىنماۋ ماو تسزەدۋننىڭ اتى شۋلى «مادەنيەت توڭكەرىسى» جىلدارىندا «ءتورت بانديتكە» توتەپ بەرە الماي، 1966 جىلى «ورتالىققا قايتارىلىپ» الىنادى.

ارادا جىلدار ءوتىپ، «مادەنيەت توڭكەرىسى» اياقتالىپ، بيلىك تىزگىنى دەن سياوپينگە تيەدى.

1980 جىلى ءجانابىل سىماعۇلۇلى دەن سياوپينگە بارىپ، ۋاڭ ىنماۋدى شىڭجاڭعا پارتياكوميتەتىنىڭ ءبىرىنشى حاتشىلىعىنا ات-تۇيەدەي قالاپ، سۇراپ الادى.

ءجانابىل سىماعۇلۇلىنىڭ جۇلدىزى جانىپ، دەسىنىڭ ورلەۋى، مىنە، وسى جىلدارى باستالدى.

قاراپ وتىرساق، ءجانابىل اعا سول كەزدە 46-اق جاستا ەكەن عوي.

ەلۋگە جەتپەگەن جاپ-جاس جىگىتتىڭ بۇكىل دۇنيەنى ءدۇر سىلكىندىرگەن دەن سياوپينگە بارىپ، شىڭجاڭعا كەرەكتى باسشىنى ورتالىقتان ءوزى اۋىستىرىپ الىپ كەلۋى – ناعىز كورەگەندىك ءارى ەرلىك ەمەس پە؟!

ۋاڭ ىنماۋ شىڭجاڭعا ءبىرىنشى حاتشى بولىپ كەلگەن سوڭ، جاكەڭ ولكەنىڭ وقۋ-اعارتۋ، دەنساۋلىق ساقتاۋ، مادەنيەت، ءباسپاسوز، مال شارۋاشىلىعى، ديحانشىلىق، جوسپارلى تۋىت سالاسىن تۇگەل ءوزى باسقاردى.

دەمەك، ءجانابىل سىماعۇلۇلى ەلۋگە جەتپەي جاتىپ-اق ءبىر ولكەنىڭ كوسەمىنە اينالعان وتە ىقپالدى تۇلعا بولاتىن...

ءوزىنىڭ تۋعان حالقىنىڭ ورتاسىندا ءجۇرىپ كوسەم بولۋ – قالىپتى جاعداي. ال، وزگە ەلدىڭ قول استىندا ءجۇرىپ ۇلتتىڭ كوشباسشىنا اينالۋ – وتە سيرەك كەزدەسەتىن قۇبىلىس.

ءجانابىل سىماعۇلۇلى – وزگەنىڭ قول استىندا ءجۇرىپ، ءوزىنىڭ دە، ءوزىنىڭ تۋعان حالقىنىڭ دا كەۋدەسىن ەشكىمگە باستىرماعان ۇلى تۇلعا!

سونىمەن، توقسانعا كەلگەن ابىز اقساقالىمىزدىڭ ومىردەن وزۋىمەن بىرگە، شىڭجاڭ قازاعىنىڭ دا باسىنان ءبىر ءداۋىر بىرگە كوشتى.

ارداقتى اعامىزدىڭ اللا الدىنان جارىلقاسىن! بالالارى مەن جاقىن تۋىستارىنا سابىر تىلەيمىن!

اۋىت مۇقيبەك

الاتاۋدىڭ ءبىر شىڭى - ارعى بەتتە

رەدەكتسيادان: Abai.kz اقپاراتتىق پورتالىنىڭ ۇجىمى قىتاي قازاقتارىنىڭ تىزگىنىن ۇستاعان باسشىلاردىڭ ءبىرى - ءجانابىل سىماعۇلۇلىنىڭ قازاسىنا بايلانىستى مارقۇمنىڭ تۋعان-تۋىسع اعايىن-جۇرتىنا كوڭىل ايتامىز!

سۋرەت Abai.kz سكرينى.

Abai.kz اقپاراتتىق پورتالىندا قازاقتىڭ اردا تۋعان ازاماتى ءجانابىل سىماعۇلۇلى تۋرالى «الاتاۋدىڭ ءبىر شىڭى - ارعى بەتتە» اتتى ماقالا 2014 جىلدىڭ ماۋسىم ايىندا جاريالانعان ەدى. پورتال وقىرماندارىنىڭ نازارىنا اتالعان ماقالانى قايتا ۇسىنعاندى ءجون سانادىق...

Abai.kz