كەلەر جىلدارى فەرمەرلەرگە بولىنەتىن نەسيە 1,5 ترلن تەڭگەگە جەتكىزىلەدى. بۇل تۋرالى ەلوردادا «ازىق-تۇلىك قاۋىپسىزدىگى – ۇلتتىق قاۋىپسىزدىكتىڭ نەگىزگى قۇرامداس بولىگى» تاقىرىبىندا ءوتىپ جاتقان پارلامەنتتىك تىڭداۋدا پرەمەر-ءمينيسترىنىڭ ورىنباسارى سەرىك جۇمانعارين ءمالىم ەتتى.

- ازىق-تۇلىك قاۋىپسىزدىگىنىڭ نەگىزگى اسپەكتىلەرى «ۇلتتىق قاۋىپسىزدىك تۋرالى» زاڭدا كورسەتىلگەن جانە مەملەكەتتىڭ حالىقتى ساپالى جانە قاۋىپسىز ازىق-تۇلىك ونىمدەرىمەن قامتاماسىز ەتۋ قابىلەتىمەن ايقىندالادى. بۇل رەتتە ەلدىڭ ازىق-تۇلىك تاۋەلسىزدىگى حالىقتىڭ جىلدىق تۇتىنۋ قاجەتتىلىگىنىڭ كەمىندە 80 پايىزىنىڭ ءوز ءوندىرىسى ەسەبىنەن قامتاماسىز ەتۋ ارقىلى جۇزەگە اسادى. قازاقستان اگروونەركاسىپتىك كەشەندە زور الەۋەتكە يە. 27,1 ملن گا ەگىستىك جانە 183,2 ملن گا جايىلىمدى قوسا العاندا، بارلىعى 219 ملن گا اۋىل شارۋاشىلىعى جەرى بار ءوڭىردىڭ اگرارلىق سەكتورىنداعى كوشباسشى سانالادى. جىل سايىن ەلىمىزدە 18 ملن توننادان استام استىق ءوندىرىلىپ، ونىڭ 7 ملن توننادان استامى ەكسپورتتالادى، سونداي-اق 1 ملن تونناعا جۋىق ەت وندىرىلەدى»، - دەدى س. جۇمانعارين.

ونىڭ ايتۋىنشا، ەلىمىز ىشكى نارىقتى ازىق-تۇلىك تاۋارلارىمەن 80%-دان 100%-عا دەيىنگى قامتاماسىز ەتەدى. ەت، ءسۇت، جۇمىرتقا، كوكونىس، ۇن – بۇلاردىڭ بارلىعى ىشكى نارىق قاجەتتىلىكتەرىن قاناعاتتاندىرۋ ءۇشىن جەتكىلىكتى كولەمدە وندىرىلەدى.

- الايدا بىرقاتار تاۋار بويىنشا يمپورتقا تاۋەلدىلىك ساقتالىپ وتىر (قۇس ەتى – 73%، شۇجىق ونىمدەرى – 60%، بالىق – 54%، ىرىمشىك جانە سۇزبە – 57%، قانت – 42%). بۇل ماسەلە بىزگە بەلگىلى جانە ونى شەشۋ ماقساتىندا ءسۇت تاۋارلى فەرمالاردى، وڭدەۋ كاسىپورىندارىن، قۇس فابريكالارىن سالۋ بويىنشا ينۆەستيتسيالىق جوبالار جۇزەگە اسىرىلىپ، جەڭىلدەتىلگەن قارجىلاندىرۋ تەتىكتەرى ەنگىزىلىپ وتىر، - دەدى ۇكىمەت باسشىسىنىڭ ورىنباسارى.

ونىڭ سوزىنە قاراعاندا، ۇكىمەت اۋىل شارۋاشىلىعى تاۋارىن وندىرۋشىلەرگە نەسيە ءبولۋ پروتسەسىن پايىزدىق مولشەرلەمەلەردى سۋبسيديالاۋدىڭ كۇردەلى سحەماسىنان باس تارتۋ ارقىلى جەتىلدىرىپ جاتىر.

- ەندى فەرمەرلەر كوكتەمگى دالا جۇمىستارى مەن ەگىن جيناۋ ءۇشىن 5% تومەندەتىلگەن مولشەرلەمەمەن تىكەلەي جەڭىلدەتىلگەن كرەديتتەر الا الادى. مۇنداي كرەديتتىڭ كولەمى العاش رەت 580 ملرد تەڭگەدەن استى (بۇعان دەيىن 180 ملرد تەڭگە), ال بولاشاقتا بۇل كورسەتكىشتى 1,5 ترلن تەڭگەگە جەتكىزۋ جوسپارلانىپ وتىر. 2025 جىلعى كوكتەمگى دالا جۇمىستارىنا جەڭىلدەتىلگەن كرەديت بەرۋدى بيىل قاراشانىڭ سوڭىندا باستادىق، بۇل فەرمەرلەرگە جانارماي، قوسالقى بولشەكتەر جانە باسقا دا قاجەت رەسۋرستاردى الدىن الا ساتىپ الۋعا مۇمكىندىك بەرەدى، - دەدى پرەمەر-ءمينيستردىڭ ورىنباسارى.

Abai.kz