نەمەسە شىرايلى شاھاردا جەر جەتىسپەيدى دەگەنگە كىم سەنەدى؟!

ميلليونەر قالانىڭ ميلليون ماسەلەسى بار ەكەنى داۋسىز. سونىڭ ەڭ باستىسى – جەر ماسەلەسى دەر ەدىك. ەگەمەن ەلىمىزدىڭ ءۇشىنشى ءىرى مەگاپوليسى – شىمكەنت شاھارىنىڭ قازىرگى اۋماعى 117 مىڭ شاقىرىمدى قۇرايدى. مۇنى – تاۋەلسىز مەملەكەتتەر دوستاستىعىنىڭ كوپتەگەن قالالارىندا كەزدەسپەيتىن قۇبىلىسقا بالاۋىمىزعا بولادى.  

قالالىق ساۋلەت، قالا قۇرىلىسى جانە جەر قاتىناستارى باسقارماسىنىڭ باسشىسى نۇربول ءابدىراحمانۇلى جۇنىسبەكوۆتىڭ مالىمدەۋىنشە، بۇگىندە 183 مىڭ ادام ۇيىرگەلىك جەر الۋ كەزەگىندە تۇر. ەڭ سوڭعى رەت 2002 جىلى كەزەككە تۇرعان ازاماتتارعا 2008 جىلى «دوستىق» شاعىناۋدانىنان جەر تەلىمى ۇلەستىرىلگەن. مىنە، سودان كەيىن «جەر بەرۋگە ماراتوري جاريالانعان»، «ينفراقۇرىلىم جۇمىستارىن جۇرگىزىپ بولعاننان كەيىن جەر تەلىمدەرىن ۇلەستىرەتىن بولامىز»، تاعى باسقا سىلتاۋلارمەن بىردە-ءبىر ادامعا تەگىن جەر تەلىمى بەرىلمەي كەلەدى.

قالانىڭ جاڭا باس جوسپارىنا سايكەس 15 گەكتار جەردەگى 2500-گە جۋىق جەر تەلىمىن مەملەكەت مۇقتاجدىعىنا الۋ كوزدەلگەن. بۇعان قوسا-قابات قازاقستان پارلامەنتىندە «ەگەمەن ەلىمىزدەگى ءۇش مەگاپوليستە جەر كەزەگىن الىپ تاستاۋ تۋرالى» زاڭ جوباسى قارالىپ جاتقان كورىنەدى. مۇنى قالاي تۇسىنۋگە بولادى؟!

جەر داۋى – شىمكەنتتىڭ ماڭگىلىك شەشىمىن تاپپايتىن ماسەلەسىنە اينالعان. ماسەلەن، مەنىڭ ءوزىم  2007 جىلدىڭ جەلتوقسان ايىندا قالالىق اكىمدىككە بارىپ، قازاقستان رەسپۋبليكاسىنىڭ ازاماتى رەتىندە ءوزىمنىڭ كونستيتۋتسيالىق قۇقىعىمدى پايدالانىپ، تەگىن جەر الۋ كەزەگىنە تۇرعانمىن. ءبىر تەكسەرتكەنىمدە العاشقى 50 مىڭ ادامنىڭ اراسىندا بولعانمىن. تاعى ءبىر تەكسەرتكەنىمدە 50 مىڭ ادامنان تىسقارى شىعىپ قالىپپىن. وسىلايشا بيلىكتەگىلەرگە دەگەن سەنىمىم جوعالعاندىقتان، كەيىننەن كەزەكتى تەكسەرۋدى مۇلدە جيناستىرىپ قويعانمىن.

بۇگىندە شىمكەنتتە تەگىن جەر جوق دەگەنگە اكىمدەردەن باسقا ەشكىمدى سەندىرە المايسىزدار. قالا، اۋدان اكىمدىكتەرىندەگىلەردەن جەر سۇراساڭ: «جەر جوق»، - دەپ اۋىزدارىن قۋ شوپپەن سۇرتەدى. بىراق، جەر ساتىپ الىپ، ءۇي سالىپ جاتقان ادامداردىڭ قاراسى كۇن وتكەن سايىن كوبەيە تۇسۋدە. ماسەلەن،  بوزارىق جاقتان ءۇي سالۋ ءۇشىن جەر ساتىپ العان قانداستارىمىزدان سۇراساڭ: «بۇل جەردى 10 ميلليون تەڭگەگە الدىم»، - دەگەندى ايتادى.

شىرايلى شاھاردا باسشىلىق قىزمەت اتقارعان كەزىندە اكىمدەر وزدەرىنىڭ يەلىگىندەگى جەرلەرىن تامىر-تانىستارى ارقىلى بولشەكتەپ ساتىپ وتىرعان جوق پا ەكەن، ونى كىم ءبىلسىن؟! مىنە، وسىلاردىڭ ءبارىن ەگجەي-تەگجەيلى زەرتتەپ-زەردەلەيتىن، تەرگەپ-تەكسەرەتىن ۇكىمەت، سىبايلاس جەمقورلىققا قارسى ءىس-قيمىل اگەنتتىگى نەلىكتەن دارمەنسىزدىك كورسەتىپ وتىرعانى تۇسىنىكسىز. الدە، ولار ءۇشىن 183 مىڭ ادامنىڭ تاعدىرى ويىنشىق پا ەكەن؟!

ءابدىساتتار ءالىپ،

جۋرناليست، اقىن، اۋدارماشى، قازاقستان جۋرناليستەر جانە حالىقارالىق جازۋشىلار وداقتارىنىڭ مۇشەسى.

شىمكەنتت قالاسى.

Abai.kz