مىنا قىزىقتى قاراڭىز: ءىلياس جانسۇگىروۆ، ءسابيت مۇقانوۆ، عابباس توعجانوۆ، ءانۋار ءالىمجانوۆتار عايشا ەسىمدى ءبىر ايەلگە كوپ حات جازىپتى، سول حاتتاردىڭ قولجازبا نۇسقاسىن تاۋىپ ەدىم، سىزدەرمەن بولىسەيىن.

نەگە ولاردىڭ ءبارى تەك عايشاعا حات جازدى؟

عايشا حانىمعا جازىلعان حاتتار

حاتتار. نەشە ءتۇرلى تەرەڭ وي مەن سان قيلى كوڭىل كۇيدى سۋرەتتەيتىن وسى ءبىر سىرلى الەمدە كىمنىڭ جۇرەك ءسوزى ايتىلمادى دەيسىز؟ ادامزات بالاسى تەحنوكراتتىق زامانعا يەك سۇيەمەي تۇرعاندا قارىم-قاتىناستىڭ ەڭ كەرەمەتى اق قاعاز بەن قارا سيا بولعانى شىندىق. اسەم ويلاردى، اقجارما تىلەكتەر مەن اعىل-تەگىل سەزىمدەردى جەردىڭ مىنا بەتىنەن انا شەتىنە جەتكىزەتىن حاتتار لەگى كەشەگى كۇندەردىڭ كۋاگەرى ەكەنىن ۇمىتقان جوقپىز. ۇلى تولستوي چەحوۆقا جازعان ءبىر حاتىندا: «ءبارىن ويلاپ تابۋعا بولادى، تەك پسيحولوگيزمدى ويلاپ تابا المايمىز»، - دەپ جازعانى بار-دى. وسى ءبىر سالماقتى ءسوزدى، ارينە، ءبىر دانىشپان كەلەسى ءبىر تالانت يەسىنە حاتپەن جەتكىزدى. بۇل دا بولسا قۇسني حاتتاردىڭ كوكجيەگىنىڭ كەڭدىگىن، ونىڭ ويدى تۇساماي، ەركىن سامعاتاتىنىن بىلدىرمەك.

عىلىم ورداسىنداعى ورتالىق عىلىمي كىتاپ­­حاناعا ورنالاسقان «سيرەك كەزدەسەتىن كىتاپ­تار، قولجازبالار جانە ۇلتتىق ادە­بيەت» بولىمىنە باس سۇققانىمىزدا، وندا­ ساقتالعان ۇلتىمىزدىڭ ءبىرتۋار ازا­ماتتارىنىڭ ءوز قولىمەن جازعان حات­تارىنىڭ تۇپنۇسقاسىنا كەزدەستىك. الدى­مىزدا جاتقان سارعايعان پاراقتار كەشەگى ءىلياس جانسۇگىروۆ، ءسابيت مۇقا­نوۆ، عابباس توعجانوۆ، ءانۋار ءالىم­جا­نوۆ­تار­دىڭ عايشا ەسىمدى كىسىگە جازعان حاتتار لەگى­ ەدى. بۇل حاتتاردا نە جازىلدى، نەلەر اي­تىل­دى ەكەن دەگەن سۇراق ءبىزدى ءارى قاراي جەتە­لەي بەردى. ەندى سول حاتتاردى پاراقتاپ كورەلىك.

جازۋشى ءسابيت مۇقانوۆ عايشاعا جازعان ءبىر حاتىندا بىلاي دەپتى:

«قۇرمەتتى عايشا حانىم!

عۇمار ابزيعا، سىزگە، بالالارعا ماريام ەكەۋمىز موسكۆالىق سانسىز سالەم جولدايمىز.­ ءبارىڭىزدىڭ دە دەنساۋ­لىق­تا­رىڭىزعا، باقىتتى بولۋلارىڭىزعا تىلەك­تەسپىز. ءبىز وسى موسكۆاعا اۆگۋستىڭ 10-ى كۇنى ۇشىپ كەلدىك. ودان بۇرىن مەن قىتاي­دا­ بولعانمىن: 20-مايدا بولعام دا، 22-يۋلدە­ جار­كەنت ارقىلى الماتىعا كەلگەم، ودان مۇندا – موسكۆاعا كەتتىم. ءسىز ەكەۋمىز قىتاي­عا ۇشار الدىندا عانا الماتى كوشە­سىندە جولىقتىق. ءسىز ماعان سوڭعى جىل­داردا بايلانىسىمىز ءۇزىلىپ كەتۋى تۋرالى­ وكپە ايتتىڭىز دا، قايتادان تابى­سۋعا ۇيىڭىزگە شاقىردىڭىز. مەن بارۋ­عا ۋادە بەردىم. سول كۇننىڭ ەرتەڭىنە ويدا­ جوقتا موسكۆادان: «تەز كەلىڭىز، قىتاي­عا باراسىز» دەگەن تەلەگرامما الدىم دا، ۇشىپ كەتتىم. سوندىقتان ۇيىڭىزگە بارا الماعانىما مىڭنان ءبىر كەشىرىم وتىنەم! بۇل حاتتى جازىپ وتىرعان سەبەبىم، الماتىعا وكتيابردىڭ باسىنسىز قايتپايمىز: موسكۆادا، لەنينگرادتا، پەتروپاۆل، كوكشەتاۋدا جۇمىستارىم بار، ال قازىر سىزبەن سويلەسىپ الايىن، شىعارماشىلىق ءبىر ءسوز بار.

ءسىز بەن ءبىز، قۇرمەتتى عايشا حانىم، اۋەل­دەن تۆورچەستۆولىق ىستە كەزدەسىپ، تانىس­تىق تا، سول ارقىلى دوس بولىپ كەتتىك قوي.­ ول دوستىقتان الدەنەندەي «تاعدىر» ءبىزدى­ سوڭعى جىلداردا ايىردى. ءسىزدىڭ قالاي­ قابىلدايتىنىڭىزدى بىلمەيمىن. مەن ءوزىم تۇرپايى ءسوز ايتقانعا كەشىرىم وتىنەم، سۆولوچ-تاعدىر ءبىزدىڭ ارامىز­دا­ ءالى دە كۇنەلتىپ جۇرگەنىنە، سوڭعى جىل­داردا كوزىم جەتتى. ءبىزدى ايىرعان سول­ «تاعدىرلار». قازىرگى سىزگە جازعالى وتىر­عا­نىم ول تۋرالى ەمەس، باسقا. قىتايدا مەن­ 63 كۇن بولدىم. بۇل ءبىر، بۇرىنعىسى دا، بولاشاعى دا عاجاپ ەل ەكەن. 63 كۇندە ءبىز ونىڭ نەبىر تاماشاسىن كوردىك. مەن كور­گەن-بىلگەننىڭ ءبارىن كۇندەلىگىمە جازىپ ءجۇر­دىم. ەندى سول «كۇندەلىكتى» ادەبيەت ءتۇرى­نە كەلتىرۋگە تىرىستىم. بۇل شاماسى، 15-20 باسپا تاباقتىق كىتاپ بولادى. وسى­ كىتاپتى «درۋجبا نارودوۆ» باسامىز­ دەدى. رەداكتورى – لاۆرەنەۆ، زامى – چاگين ماعان دوس ادامدار. بۇل كىتاپتىڭ اۋدارۋشىلىعىنا، مەن ءسىزدى شاقىرعىم كەلەدى. ول ويىمدى رەداكتسياعا ايتتىم دا. ولاردا قارسىلىق جوق. «نويابردە بەرسەڭىز – يانۆاردا، دەكابردە بەرسەڭىز – فەۆرالدا باسامىز، 18 باسپا تاباقتاي الا الامىز»، دەيدى.

سىزدەن ءوتىنىش: وسىنى ويلانىڭىز دا، ريزا­ بولساڭىز ماعان تەلەگرامما بەرىڭىز. «كۇن­دەلىك»-ءتىڭ باسىن سىزگە مەن موسكۆادان جىبە­رەم دە، اياعىن وكتيابردە بەرىپ بولام. ءسىز­ جىبەرگەن ماتەريالدى اۋدارا بەرەسىز. رەداك­تسيا قالاماقىڭىزدى اۋدارىپ بولعان سوڭ تولەيدى.

ويلانىڭىز. جاۋاپ كۇتەم.

جولداستىق سالەممەن – ءسابيت،

موسكۆا، گوستينيتسا «موسكۆا» 955, تەلەفون، - ك-2-29-55». ءبىز حاتتىڭ ىشىندە نە جازىلسا، سونى وسىندا قاعاز بەتىنە تۇسىردىك. قالاي دەگەنمەن، بۇل سول كەزدە اتى دۇركىرەپ تۇرعان جازۋشىنىڭ ءبىر مەزەتتىك كوڭىل كۇيى، جۇرەك ءسوزى.

جازۋشى كەلەسى ءبىر حاتىندا: «ق. عايشا! سىزگە مىنا كىتاپتىڭ ەكى گلاۆاسىن جىبەرەم. قالعانىن كەيىن. ەگەر تۇسىنىكسىز بولسا ماشىنكەگە باستىرۋعا بولادى» دەگەن ءوتىنىشىن ايتىپ، استىنا قولىن قويىپتى.

تاعى ءبىر حات ورىس تىلىندە جازىلىپتى. «ش. سوڭعى – VIII-تاراۋعا ۇلگەرمەدىم. مەن ونى موسكۆادا جاسايمىن. جىبەرۋگە ۋاقىتىم بولماسا، ونى موسكۆاعا اۋدارىپ بەرۋىڭىزدى سۇرايمىن. كيلل روماندى (ونى پوۆەست دەپ اتاۋعا بولادى) وسىندا ورىس تىلىندە شىعارعىسى كەلەدى. دالەلدى اياقتاڭىز. ستيل بىرلىگى ءۇشىن ... سوڭعى تاراۋدى ەكىنشى رەت اۋدارۋ كەرەك. ءسىز مەنى موسكۆاعا اۋىستىراسىز دەپ ۇمىتتەنەمىن. ماي ايىندا موسكۆاعا كەتكەنگە دەيىن ونى كورمەيتىنىم تىم وكىنىشتى.

ءسابيت. 11/II-37.

اۋدارماسى مەن تۇپنۇسقاسىن لۋكاشەۆ جولداسقا بەرىڭىزشى. ول ماعان جىبەرەدى».

سابەڭنىڭ عايشا حانىمعا جازعان ءۇشبۋ حاتتارى، مىنە، وسىلاي سىر شەرتەدى. وقي كەلە حاتتاردان سول ءداۋىردىڭ ءۇنىن، كەلبەتىن، زيالىلاردىڭ ءبىر-بىرىمەن تىعىز بايلانىس­تا­ بولعانىن تۇسىنەمىز. حاتتار، حاتتار...

كەلەسى حات يەسى – قۇلاگەر اقىن ءىلياس جانسۇگىروۆ.

ءىلياس جانسۇگىروۆتىڭ العاشقى حاتى بىلاي باستالادى:

«عايشا حانىم!

…بيلەت الۋ شاتاق بولىپ، مەن كەشە جىيلىسقا بارا المادىم. ەكىنشى جاعىنان «نا توكۋ»-دان كەيىنگى ءتورت ءبولىمدى كوشىرىپ بەرىپ كەتەيىن دەپ ويلاپ ەم، ونى دا بىتىرە المادىم. بۇگىن شىعىپ بارام. مارتتىڭ 20-25 شاماسىندا عابباس موسكۆاعا كەلەتىن بولدى، «نا توكۋ»-دىڭ جالعاسىن سودان جىبەرەرمىن. مەنىڭ …تۋرالى نەندەي مالىمەتتەر كەرەكسىنەسىز سونى ايتىپ، ماعان بۇگىن-ەرتەڭ حات جازىڭىز، عابباس ارقىلى جىبەرەيىن. الماناق باسقارماسىنا جولىعىپ، «نا توكۋ»-دىڭ اۋدارماسىنا شارت جاساڭىز. «كراسنىي نوۆ» جورنالىنا دا وسى ءسىز اۋداراتىن ءبولىمى باسىلاتىن بولدى. سىزدەن الارسىڭ دەپ وسىنداعى التايسكي دەگەنگە ايتىپ كەتتىم.

حات كۇتەم. الماتىعا بارعان سوڭ دا جازارمىن. اپرەلدىڭ اياق كەزىندە تاعى كەلەم.

ءىى/12-36».

حاتتى وقي كەلە عايشا حانىمدى الدەبىر لاۋازىمدى كىسى مە دەگەن ويعا قالاسىز.

كەلەسى حاتقا كەزەك بەرەلىك.

«قادىرلى عايشا حانىم!

موسكۆاعا توقتاماي ءوتىپ كەتتىك. ءۇش كىسى كەلدىك. بەيىمبەت … پەن قابارىز قادىر قاسىمدا. «جولداستاردى» الىپ كەلىپ ەدىم. قايتقان سوڭ قالدىرامىن. مىندا ء17/ىى دەيىن بولامىز. موسكۆادا ءبىز از ۋاقىت بولامىز. ۇيىڭىزگە كوپ سالەم. فاتيما كوپ-كوپ سالەم ايتتى.

قۇرمەتپەن: ءىلياس

ء12/ىى-1936».

جانسۇگىروۆ عايشا شاريپوۆاعا جازعان كەلەسى حاتىن ورىس تىلىندە جازىپتى.

«20 ناۋرىز، 1931 ج

قۇرمەتتى عايشا!

حاتىڭىزعا كەش جاۋاپ بەرگەنىم ءۇشىن كەشىرىم سۇرايمىن. مەن ءىسساپارلاردا بولدىم. گنەپەر سوزگە جاقىنىراق: ءسىزدىڭ ۇسىنىسىڭىز، اسىرەسە مەنى قۋانتتى. ءسىز ۇلكەن مادەني جۇمىس ىستەپ، ۇلتتىق ادەبيەتتىڭ بايلانىسىن جەدەلدەتۋگە اتسالىسۋداسىز. مەن بۇل ماسەلەنى ءتيىستى ۇيىمداردىڭ الدىنا قويىپ، FOSP اۋدارما بيۋرولارىنا، اسىرەسە سىزدەرگە حابارلاسۋدى تاپسىردىم. بىراق مەن سىزدەرگە قازاق ادەبيەتىنەن ءبىراز كىتاپتار جىبەرگىم كەلدى، بىراق وسى جەردەن اتىن اتايتىن بىردە-ءبىر كىتابىن تاپپاعانىما سەنىڭىز:

«كولحوز» – ءمايليننىڭ اڭگىمەسى

«تۋلاعان تولقىندا» مۇسىرەپوۆ (رومان)

«جاڭا جولدا» (ەسسە) جانسۇگىروۆ

«تاڭبالىلار» – تىلەپبەرگەنوۆ

بۇل كىتاپتار الماتىدا جوق. دۇكەندە موسكۆادا (كۋزنەتس. موست) باسىلىم جوق­ دەپ ەسەپتەيمىن. ەگەر جوق بولسا، وگيز دۇكەنىنە جانە «قىزىل-وردا تاۋلا­رىن­دا» دەپ جازۋعا بولادى. مەن بۇل كىتاپ­تاردى كەزدەستىرسەم، مىندەتتى تۇردە سىزگە ءجى­بە­رە­مىن. ونىڭ ۇستىنە بىزدە پوەزيا ەرەكشە دامى­دى. ەڭ دۇرىسى...، مۇنى ءسىز ارقىلى جاساۋ­عا بولا ما، الدە دوسىڭىز جاساي ما؟ جاق­سىراق ... پەسالاردا، ءسىز وعان قالاي قارايسىز؟

ءسىز بۇل ماڭىزدى تاپسىرمانى تاستامايسىز دەپ ۇمىتتەنەمىن...

اۋدارماڭىزدى وقىدىم – ءباياميننىڭ اڭگىمەسى وتە جاقسى! ءسىز بۇل جۇمىستى جالعاستىراسىز. ءبىز بارىنە دايىنبىز...

ءىلياس».

عابباس توعجانوۆتىڭ دا عايشاعا جازعان حاتتارىنىڭ تۇپنۇسقاسى وسى دەرەكتەرمەن بىرگە اتالعان ورتالىقتا ساقتاۋلى تۇر. ءبىز وعان دا كوز جۇگىرتىپ كوردىك.

«قۇرمەتتى ايشا!

ءبىز ءسىزدىڭ پاتەرىڭىزدى باسشىلارىمىزبەن كەلىستىك: ءساۋىر ايىندا ولار مامانداردىڭ ۇيىنەن 3 بولمەلى پاتەر بەرۋگە ۋادە بەردى (مەنىكى سياقتى), اندروننيكوۆ قازىر جوق، ول مەتتپەن سويلەستى، كۇندەردىڭ بىرىندە ول كەتىپ قالادى. موسكۆا ءۇشىن ول جەكە سويلەسكىسى كەلەدى ...

مەن سىزگە حات جازامىن، مۇمكىن سول ۋاقىتقا دەيىن اندروننيكوۆ كەلەدى، سودان كەيىن مەن ءسىزدىڭ ويلارىڭىز تۋرالى ونىمەن كەلىسەمىن.

قازىر ونكۇندىككە دايىندالىپ جاتىرمىز. سونداي كۇندەردىڭ بىرىندە ورتالىق جۋرنالدارعا ماتەريالدار جىبەرەمىز. سىزگە مايلين تۋرالى ماقالا جازۋ تاپسىرىلدى.

مايلين مەن جانسۇگىروۆ قازىر ماسكەۋدە بولسا كەرەك – تولىق اقپاراتتى سولاردان الۋعا بولادى.

ءساۋىردىڭ ءبىرىنشى جارتىسىندا ماسكەۋگە كەتەيىن دەپ جاتىرمىن، ەگەر پاتەر وسى ۋاقىتقا دەيىن دايىن بولسا، وندا ءسىز كەلگەنشە ءبىر جولداسىمىزدى (بويداقتى) ۋاقىتشا ورنالاستىرامىز، ول بوس ەمەس – ايتپەسە، ءبىزدىڭ جاعدايدا ، ولار شەشىمسىز پاتەر الا الادى.

ءسىزدىڭ كەلگەنىڭىزدە مەنىڭ جەكە پىكىرىم مىناۋ: ەگەر ءسىز مەن جوقتا كەلسەڭىز، بۇل ىڭعايسىز جانە ون جىلدان كەيىن (مامىردىڭ اياعىندا) كەلگەنىڭىز دۇرىسىراق ەكەنى انىق.

21/II-36.

21-4-36. قۇرمەتپەن، توعجانوۆ».

عابباس توعجانوۆتىڭ قولجازباسىنداعى حاتتىڭ كەلەسى بەتىندە مىنا سوزدەر بار.

«سالەمەتسىز بە، عايشا حانىم!

ءسىزدىڭ مازمۇنى مەن كولەمى جاعىنان قىس­قا دا نۇسقا حاتىڭىزعا اشۋلانۋعا حاقىم­ بار ما؟ ءسىزدى كوپ سۇراقپەن كومىپ تاس­تاي­ ­الامىن: ونكۇندىك نەلىكتەن قاراشاعا اۋىس­تىرىلدى؟.. قازاق ادەبيەتشىلەرى قوناق­تاردى – مايدانگەرلەردى قىزىل الاڭ­داعى جەڭىس شەرۋىنەن كەيىن شارشاپ-شال­­دىققان كۇيىندە كۇتپەگەن جەردەن قارسى الۋى مۇمكىن. كىمدەر، قانداي اۋدار­ماشىلار جۇمىسسىز ءجۇر؟ مۇمكىن ولار – شاقىرىلعاندار ادەتتەنبەگەن شىعار؟­ بىراق اۋەزوۆ ءوزىنىڭ ماقالاسىندا («كوم­سومولسكايا») قۇدىرەتتى گۇلدەنۋ تۋرا­لى­ ايتتى عوي. دەمەك اۋدارماشىلار جۇ­مىس­سىز­ وتىرماۋى كەرەك.

نەلىكتەن الماناح جىلدا شىعا­رىل­مايدى؟

(سويلەم تۇسىنىكسىز)

باستىسى، ءوزىڭىز قىزىقتى بىردەڭە جازا الدىڭىز با؟

پ.كۋزنەتسوۆ نە ىستەپ ءجۇر؟

وماردىڭ ءحالى قالاي؟ وعان شىن جۇرەك­تەن سالەم ايتىڭىز. اسياعا سىناقتى ءسات­تى­ تاپسىرۋىنا تىلەكتەسپىن. ناديا مەنى­ اعىلشىن تىلىنە ۇيرەتۋگە دايىندال­سىن».

اقىن ءابۋ سارسەنباەۆتىڭ دا عايشا شاريپوۆاعا جازعان ىزەتتى حاتىن وقىر­مان­عا ۇسىنايىق.

«قۇرمەتتى عايشا اپاي،

سالەم سىزگە الىستان. موسكۆاداعى جۇمىس­­تاردى ءبىر ىڭعايلاپ كەلىپ، پەرە­لە­كي­نو­دا جاتىرمىن. رەداكتور دا، ءوزىمنىڭ ءبىر ماي­­دانداس جولداسىم دا (جازۋشى) وقىپ شىق­­تى. پىكىرلەرى وتە جاقسى. ورتا جاستاعى بالا­­لار ءۇشىن ىقشامداپ شىعارماق. ءتىل جاعى­­نان، انىعىراق ايتقاندا، ءبىر ءسوزدىڭ سول­ اق ابزاتستا الدەنەشە رەت قايتالانۋى ءجونىن­دە عانا زامەچانيەلەرى بار. بۇلار، اسىرە­سە الدىڭعى بولىمدەرىندە. مىسالى، پرو­لوگتىڭ ەكىنشى ابزاتسىندا (1 بەت) جولىن­دا التى رەت قايتا­لانعان «نوسيلكي نەسلي» دەگەندەر بار­ ەكەن. ولار رەداكتسيا ۇستىندە تۇزەلەدى عوي.­ رەداكتور ىسكە كىرىستى. بىراق ۇزاققا سوزار­ ءتۇرى بار (رەداكتور سول رەتسەنزيا جازاتىن ۆلەكوۆا), شارتتى رەداكتسيادان كەيىن جاساماق. ءسىزدى شاقىرۋدىڭ كەرەگى جوق دەسەدى. اناۋ ءبىر جارىم گلاۆانىڭ اۋدارما­سىن جىبەرگەن ەكەنسىز. اپارىپ بەردىم.

عايشا اپاي، سىزدەن ەكى ءتۇرلى ءوتىنىشىم بار. ءبىرى اناۋ سكولكوۆسكايانىڭ رەداكتسياسىنان كەيىن قولجازبانى ابدەن ءبىر مۇقيات وقىپ­ شىعىڭىز. تاجىريبەسى جوق، جاس ادام عوي، ءبۇلدىرىپ جۇرمەسىن.

ەكىنشى، وڭدەي-وڭدەي ءجۇرىپ ەنگىزگەن ءوز­­گە­رىس­تەرىمىز 25 پايىزدان اسىپ كەتكەن ءتارىزدى.

بۇگىن … شارت پەرەيزدانيە ەمەس، جوڭقا ءنار­­­سە رەتىندە قايتادان جاساڭىز دەگەن ءتى­لەك­­­ ءبىلدىردىم. توعىز تاراۋعا ۇلكەن-ۇلكەن ءوز­­گە­­­رىستەر ەنگىزىلىپ، ءبىر تاراۋى تۇتاسىمەن قاي­­تادان ىستەلىندى. ءسىز دە وسىنى تالاپ ەتىڭىز.

قوش بولىڭىز. حات كۇتەم.

قۇرمەتپەن ءابۋ.

ادرەسىڭىزدى بىلمەگەن سوڭ يزدات-ۆو جولدادىم».

ەندەشە، ءبىز ءسوز سوڭىندا قازاقتىڭ مار­­­­­قاسقا تۇلعالارى بىرىنەن سوڭ ءبىرى حات جاز­­­عان عايشا حانىمنىڭ كىم بولعانىن وقىر­­­مان ەسىنە سالا كەتەيىك. ول 1901 جىلى قازان­ قالاسىندا تۋعان. اۋدارماشى. قازان­ ۋنيۆەرسيتەتىندە ءبىلىم العان. كەيى­نى­­­­ر­ەك تاتار­ جۇمىسشىلار تەاترىنىڭ ءارتىسى بولعان. تالانتتى عايشا ماسكەۋدە جو­­­­عار­­­­­عى­ سوتتا اۋدارماشى بولىپ قىزمەت ىستە­­گەن.­ وسى ۋاقىتتان باستاپ تاتار، باش­­قۇرت، قا­زاق جانە قىرعىز تىلدەرىنەن ورىس­ تىلىنە اۋ­دارماشى رەتىندە ادەبي قىز­مەتىن باس­تاي­دى. جوعارىداعى حاتتار ءدا­لەل­دە­گەندەي عايشا ءشاريپوۆا قازاق جازۋ­شى­لارىنىڭ شى­­عارمالارىن، ونىڭ ءىشىن­دە مۇحتار اۋەزوۆ، ءسابيت مۇقانوۆ، ءىلياس جانسۇگىروۆ سيا­ق­تى قالامگەرلەردىڭ تۋىن­دى­­لارىن ­اۋ­دا­­رۋعا قاتىسقان. قالاي دەسەك تە،­ عايشا حانىمعا جازىلعان حاتتار لەگى بىزگە سول كەز­دەگى ۋاقىتتىڭ، سول قوعامنىڭ بەينەسىن كوز الدىمىزعا اكەلەدى. حاتتار تولاستاماسىن.

دۇيسەنالى الىماقىن

Abai.kz