قازاقستان رەسپۋبليكاسى توعىزقۇمالاق سپورتى فەدەراتسياسىنىڭ پرەزيدەنتى بولىپ اكىم تۇرسۇن سايلاندى. ال بۇعان دەيىن رەسپۋبليكالىق فەدەراتسيانى باسقارعان قوعام قايراتكەرى اليحان بايمەنوۆ ۇيىمنىڭ قۇرمەتتى پرەزيدەنتى بولىپ بەكىتىلدى. سونىمەن بىرگە اليحان بايمەنوۆ دۇنيەجۇزىلىك توعىزقۇمالاق فەدەراتسياسى پرەزيدەنتى قىزمەتىن جالعاستىرادى.

استانادا وتكەن رەسپۋبليكالىق فەدەراتسيانىڭ جيىنىندا اليحان بايمەنوۆ وسى كۇنگە دەيىن قر توعىزقۇمالاق سپورتى فەدەراتسياسى ۆيتسە-پرەزيدەنتى قىزمەتىن اتقارعان اكىم تۇرسۇندى فەدەراتسيا باسشىسى قىزمەتىنە ۇسىندى. وتىرىسقا قاتىسقان وڭىرلىك فەدەراتسيا جەتەكشىلەرى، توعىزقۇمالاق قايراتكەرلەرى جانە فەدەراتسيا باسشىلىق قۇرامى ۇسىنىستى قولداپ، تۇرسۇندى قر توعىزقۇمالاق سپورتى فەدەراتسياسى پرەزيدەنتى لاۋازىمىنا سايلادى.

ايتا كەتۋ كەرەك،  اليحان بايمەنوۆ رەسپۋبليكالىق فەدەراتسيانى 2004-2025 جىلدار ارالىعىندا باسقاردى. سونداي-اق بۇل باسقوسۋدا رەسپۋبليكالىق فەدەراتسيانىڭ ۆيتسە-پرەزيدەنتتەرى لاۋازىمىنا باتىربەك قۇلەكەەۆ، شولپان قادىروۆا، ماقسات شوتاەۆ، داۋلەت ابدىكارىموۆ سايلاندى. ماقسات شوتاەۆ ۆيتسە-پرەزيدەنتتىكپەن بىرگە دۇنيەجۇزىلىك توعىزقۇمالاق فەدەراتسياسىندا باس حاتشى قىزمەتىن اتقارادى. فەدەراتسيانىڭ قۇرمەتتى پرەزيدەنتى، پرەزيدەنت، ۆيتسە-پرەزيدەنت جانە باس حاتشى قىزمەتتەرى - قوعامدىق نەگىزدەگى جۇمىس. ال قر توعىزقۇمالاق سپورتى فەدەراتسياسى PR ديرەكتورى لاۋازىمىنا جۋرناليست ريشات اسقاربەكۇلى تاعايىندالدى.

وتىرىس بارىسىندا دۇنيەجۇزىلىك توعىزقۇمالاق فەدەراتسياسىنىڭ پرەزيدەنتى اليحان بايمەنوۆ جينالعاندارعا 2024 جىلى اتقارىلعان جۇمىستار مەن شارالاردىڭ ەسەبى بويىنشا اقپارات بەردى. وتكەن جىل ۇلتتىق زياتكەرلىك ويىننىڭ ەرەكشە دامۋ جىلى بولعانىن جانە 5-ءشى دۇنيەجۇزىلىك كوشپەندىلەر ويىنى ەلدەگى تاريحي وقيعالاردىڭ ءبىرى ەكەنىن اتاپ ءوتتى. بۇل جىلى ءداستۇرلى جۇزدەگەن شارامەن قاتار  تىڭ جانە  ءىرى جاڭالىقتار مول بولدى (قوسىمشادا بەرىلگەن-اۆت.)

بۇل شارالار دۇنيەجۇزىلىك جانە قر توعىزقۇمالاق سپورتى فەدەراتسياسى مەن وڭىرلەردەگى توعىزقۇمالاق فەدەراتسيالارىنىڭ، قر تۋريزم جانە سپورت مينيسترلىگىنىڭ، وقۋ-اعارتۋ مينيسترلىگىنىڭ، سپورتتى قولداۋ قورىنىڭ جانە جەرگىلىكتى اكىمدىكتەردىڭ، سپورت باسقارمالارىنىڭ تىعىز ارىپتەستىگىمەن توعىزقۇمالاق جاناشىرلارى، دەمەۋشى كاسىپكەرلەردىڭ قولداۋى ارقاسىندا جۇزەگە اسىرىلدى.

قوسىمشا اقپارات:

2024 جىلى توعىزقۇمالاق الەمىندە بولعان ەرەكشە ماڭىزدى وقيعالار مەن  جاڭا باستامالار.

2024 جىلعى 2 اقپاندا قر توعىزقۇمالاق سپورتى فەدەراتسياسىنىڭ قامقورشىلار كەڭەسى قۇرىلدى.

2024 جىلعى 25 ناۋرىزدا «توعىزقۇمالاق» ءانىنىڭ تۇساۋكەسەرى ءوتتى. ءسوزىنىڭ اۆتورى: قالقامان سارين، ءانىنىڭ اۆتورى: قايرات باەكەنوۆ.

2024 جىلعى 21 مامىردا V دۇنيەجۇزىلىك كوشپەندىلەر ويىندارىن قولداۋ ماقساتىندا "ەلشىلەر اراسىندا V-ءشى «The One Hotel Astana» دوستىق كەزدەسۋ مەن استانا قالاسى مىقتىلارى اراسىنداعى تۋرنير ءوتتى.

تارازدا ءا. اقشوراەۆ پەن س. تىلەۋباەۆتى ەسكە الۋعا ارنالعان رەسپۋبليكالىق تۋرنير ءوتىپ، ەندى ول جىل سايىن فەدەراتسيا كۋبوگى دەڭگەيىندە ۇيىمداستىرىلاتىن بولدى.

2024 جىلعى 8 شىلدەدە يسپانيانىڭ مادريد قالاسىندا Togyzqumalaq España كلۋبى اشىلدى.

2024 جىلعى 11-19 شىلدە ارالىعىندا چەحيانىڭ پاردۋبيتسە قالاسىندا توعىزقۇمالاقتان ەرلەر مەن ايەلدەر اراسىندا الەم كۋبوگى ءوتتى.

2024 جىلعى 14 تامىزدا استانادا ۇلىبريتانيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى – كاتي ليچ حانىم مەن قر توعىزقۇمالاق سپورتى فەدەراتسياسىنىڭ پرەزيدەنتى – اليحان بايمەنوۆتىڭ قاتىسۋىمەن ەلشىلىك قىزمەتكەرلەرىنە ارنالعان توعىزقۇمالاق كۋرسىنىڭ العاشقى ساباعى ءوتتى.

2024 جىلعى 14-18 قازان ارالىعىندا استانا قالاسىندا ى. التىنسارين اتىنداعى «بينوم» مەكتەبىندە 2-11 سىنىپ وقۋشىلارى اراسىنداعى وليمپيادا ءوتتى. وليمپياداعا الماتى قالاسى، اقمولا وبلىسى، اقتوبە وبلىسى، اتىراۋ وبلىسى، پاۆلودار وبلىسى، ماڭعىستاۋ وبلىسى، جەتىسۋ وبلىسى، جامبىل وبلىسى جانە استانا قالاسىنان 100 وقۋشى قاتىستى.

2024 جىلعى 16 تامىزدا تۇركىستاننىڭ ورتالىق الاڭىندا اشىق اسپان استىندا وينايتىن ءمارماردان جاسالعان توعىزقۇمالاق تاقتالارى ورناتىلىپ، «توعىزقۇمالاق اللەياسى» اشىلدى.

2024 جىلعى 23 تامىزدا استانادا توعىزقۇمالاقتان «اباي جۇلدەسى» رەسپۋبليكالىق ءتۋرنيرىنىڭ فينالدىق كەزەڭى ءوتتى.

2024 جىلعى 8-13 قىركۇيەك ارالىعىندا استانا قالاسىندا V دۇنيەجۇزىلىك كوشپەندىلەر ويىندارى ءوتتى. جارىسقا 41 مەملەكەتتەن 114 سپورتشى قاتىستى.

2024 جىلعى 9 قىركۇيەكتە V دۇنيەجۇزىلىك كوشپەندىلەر ويىنىنىڭ اياسىندا توعىزقۇمالاقتان رەسپۋبليكا بويىنشا ءبىر مەزەتتە 213 478 ادامدى ونلاين قاتىستىرىپ، قازاقستان رەكوردتار كىتابىنا (كينەس) ەنگىزىلدى.

2024 جىلعى 11 قىركۇيەكتە استانا قالاسى اكىمدىگىنىڭ قولداۋىمەن «حان شاتىر» ساياباعىندا 41 ەل وكىلىنىڭ قاتىسۋىمەن «توعىزقۇمالاقشىلار اللەياسىندا» اعاش وتىرعىزۋ شاراسى ءوتتى.

2024 جىلعى 17 قىركۇيەكتە بۋرابايدا بىرىككەن ۇلتتار ۇيىمى قىزمەتكەرلەرى ءۇشىن شەبەرلىك ساباق وتكىزىلدىۇ

2024 جىلعى 26-29 قىركۇيەك ارالىعىندا رۋمىنيانىڭ كونستانتا قالاسىندا 19 جاسقا دەيىنگى جاستار اراسىنداعى الەم كۋبوگى ءوتتى.

2024 جىلعى 28 قىركۇيەكتە وڭتۇستىك كورەيانىڭ سەۋل قالاسىندا «دۇنيەجۇزىلىك توعىزقۇمالاق فەدەراتسياسى» جانە «O'Brain and Matematic Academy» اراسىندا مەموراندۋمعا قول قويىلدى.ى

2024 جىلعى 4-8 قازان ارالىعىندا ورال قالاسىندا ارداگەرلەر اراسىنداعى قازاقستان رەسپۋبليكاسىنىڭ چەمپيوناتى ءوتتى.

2024 جىلعى 14-18 قازان ارالىعىندا توعىزقۇمالاقتان 2-11  سىنىپ وقۋشىلارى اراسىندا وليمپيادا ءوتتى.

2024 جىلعى 22-24 قازان ارالىعىندا استانا قالاسىندا رەسپۋبليكا كۇنىنە ارنالعان توعىزقۇمالاقتان «قازاقستان زياتكەرى» رەسپۋبليكالىق ءتۋرنيرى ءوتتى. جارىسقا 5 قر ەسسش، 22 قر حدسش، 33 قر سش، 26 قر ءسشۇ قاتىستى. جارىستىڭ جالپى جۇلدە قورى 25 ميلليون تەڭگەنى قۇرادى.

2024 جىلعى 9-16 قاراشا ارالىعىندا  تۇركيانىڭ انكارا قالاسىندا ءVIى الەم چەمپيوناتى ءوتتى.

2024 جىلعى 10-19 قاراشا ارالىعىندا موڭعوليانىڭ ۇلان-باتىر قالاسىندا 13, 15, 17 جاسقا دەيىنگى ۇلدار مەن قىزدار اراسىندا حالىقارالىق جارىس ءوتتى.

2024 جىلعى 15 قاراشادا جاسوسپىرىمدەر اراسىنداعى قاتاردىڭ اشىق چەمپيوناتى ءوتتى. بارلىعى 14 ادام قاتىستى.

2024 جىلعى 22-30 قاراشا ارالىعىندا كولۋمبيانىڭ كالي قالاسىندا حالىقارالىق تۋرنير ءوتتى. جارىسقا كولۋمبيا، برازيليا، مەكسيكا، ەكۆادور، ارگەنتينا، چيلي، گۆاتەمالا، پاناما، ۆەنەسۋەلا، قازاقستان ەلدەرىنەن 50 جۋىق سپورتشى قاتىستى.

2024 جىلعى 24 قاراشادا كولۋمبيانىڭ كالي قالاسىندا «لاتىن امەريكاسىنىڭ توعىزقۇمالاق فەدەراتسياسى» قۇرىلدى. كولۋمبيا، برازيليا، مەكسيكا، ەكۆادور، ارگەنتينا، چيلي، گۆاتەمالا، پاناما، ۆەنەسۋەلا ەلدەرى مۇشە بولۋعا نيەت ءبىلدىرىپ، فەدەراتسيا پرەزيدەنتى - Oscar Fajardo, باس حاتشىسى - German Gonzalez سايلاندى.

2024 جىلعى 1-5 جەلتوقسان ارالىعىندا تۇركىستان قالاسىندا ەرەسەكتەر مەن جاستار اراسىنداعى ازيا كۋبوگى ءوتتى

2024 جىلعى 7 جەلتوقساندا افريكانىڭ بەنين ەلىندە توعىزقۇمالاق ويىنىڭ شەبەرلىك ساباعى ۇيىمداستىرىلدى.

2024 جىلعى 10 جەلتوقساندا افريكانىڭ نيگەريا ەلىندە توعىزقۇمالاق ۇيىرمەسى اشىلدى.

2024 جىلعى 25-29 جەلتوقسان ارالىعىندا وزبەكستاننىڭ نۇكىس قالاسىندا اراسىندا حالىقارالىق جارىس ءوتتى.

2024 جىلى جەلتوقساندا كاتاردا تۇڭعىش تۋرنير ءوتتى.

2024 جىلى م. شوتاەۆ (وزبەكستاندا) پەن ءا. داليەۆانىڭ (كولۋمبيادا) باسقا تىلدەرگە اۋدارىلعان كىتاپتارى جانە دە باسقا دا باسىلىمدار جارىققا شىقتى.

2024 جىلى العاش رەت «توعىزقۇمالاق» تاقتاسى ستراتوسفەراعا ۇشىرىلدى.

2024 جىلى تۇڭعىش رەت توعىزقۇمالاق قايراتكەرلەرى: «ەرەڭ ەڭبەگى ءۇشىن» مەدالىمەن - 8 سپورتشى، 3 جاتتىقتىرۋشى جانە «قۇرمەت» گراموتاسىن - 1 سپورتشى ماراپاتتالدى.

قر ءماجىلىسى كەيبىر دەپۋتاتتارىنىڭ سولاقاي باستاماسىنا (توعىزقۇمالاق اتاۋىن وزگەرتۋ تۋرالى) فەدەراتسيانىڭ ۇستانىمى تۋرالى، قر توعىزقۇمالاق سپورتى فەدەراتسيا پرەزيدەنتىنىڭ حاتى جاريالاندى جانە وعان نەگىزدەلگەن ۇكىمەتتىڭ دەپۋتاتتارعا جاۋابى بەرىلدى.

استانا قالاسى اكىمدىگىنىڭ قولداۋىمەن ارنايى بولاشاقتا توعىزقۇمالاق وتاۋى بولاتىن بولمەسى بەرىلدى.

سونىمەن قاتار، «Tary Cup» جارىسى ءوتتى، ميكروكرەديتتىك ۇيىمدارمەن كەلىسىم-شارت جاسالدى، تۇركىستان قالاسىنداعى كوشەدە ويناتىلاتىن توعىزقۇمالاق تاقتالارى ورناتىلدى، كۇزدە الماتى قالاسىندا بىرىككەن ۇلتتار ۇيىمىنىڭ دامۋ باعدارلاماسى ورتالىق ازيا مەملەكەتتەرى جاستارىنا ارنالعان ۇلكەن جيىندا توعىزقۇمالاقتان شەبەرلىك ساباقتار وتكىزىلدى جانە توعىزقۇمالاق تاقتالارى تاراتىلدى، ۇلتتىق عىلىمي-پراكتيكالىق دەنە شىنىقتىرۋ ورتالىعىمەن كەلىسىم جاسالدى، مەملەكەتتىك قىزمەتكەرلەر اراسىندا جانە ىسكى ىستەر مينيسترلىگى قىزمەتكەرلەرى اراسىندا رەسپۋبليكالىق جارىس جانە باسقا دا شارالار ءوتتى.

2025 جىلعى 8 قاڭتارداعى اقپاراتقا سايكەس www.iggamecenter.com سايتىندا توعىزقۇمالاقتى ونلاين 100-دەن استام ەلدەن 28 مىڭنان استام سپورتشى 440 مىڭنان استام پارتيا وينادى، ونىڭ 13 796 ويىنى تەڭ اياقتالدى. www.playok.com سايتىندا كۇندەلىكتى ونلاين فورماتتا 1000 استام پارتيا وينالىپ، ويىنشىلار شەبەرلىكتەرىن ارتتىرىپ جاتتىعۋ وتكىزىپ تۇرادى.

قازاقستانداعى توعىزقۇمالاق تۋرالى ستاتيستيكا:

1. سەكتسيالار سانى-5681, ونىڭ ىشىندە اۋىلدىق جەردە-3859
2. شۇعىلدانۋشىلار سانى-196 508, ونىڭ ىشىندە اۋىلدىق جەردە-115 328
3. جاتتىقتىرۋشىلار سانى-2556, ونىڭ ىشىندە اۋىلدىق جەردە-1761
4. شتاتتاعى جاتتىقتىرۋشىلار سانى-376, ونىڭ ىشىندە اۋىلدىق جەردە-217
5. تورەشىلەر سانى- 130 (حدت،جسۇت،ۇست)
6. جوعارعى سپورتتىق اتاعى بار سپورتشىلار سانى-200

قرەسسش-7سپورتشى

حدسش-40 سپورتشى

قرسش-153 سپورتشى

قر توعىزقۇمالاق سپورتى فەدەراتسياسىنىڭ ءباسپاسوزى قىزمەتى

Abai.kz