نۇرسۇلتان نازارباەۆتىڭ كۇيەۋ بالاسى، وليگارح تيمۋر قۇلىباەۆ قازاقستان بيلىگىمەن مەملەكەت پايداسىنا 1 ميلليارد دوللار تولەۋ تۋرالى كەلىسسوزدەر جۇرگىزۋدە دەگەن حاباردى «Bloomberg» باسىلىمى ءوز دەرەككوزدەرىنە سىلتەمە جاساي وتىرىپ جازادى.

«Bloomberg»: «قازاقستاننىڭ ەڭ باي ادامدارىنىڭ بىرىنە قاتىستى (ت.قۇلىباەۆ) ونىڭ ءبىرىنشى پرەزيدەنت كەزىندە (ن.نازارباەۆ) تاپقان بايلىعى بويىنشا ۇكىمەتتىك تەرگەۋ اياسىندا مەملەكەتكە شامامەن 1 ميلليارد دوللار تولەۋى تالقىلانۋدا»، - دەپ ءمالىم ەتەدى.

وتكەن جىلدىڭ قاراشا ايىندا باس پروكۋراتۋرا جانىنداعى اكتيۆتەردى قايتارۋ جونىندەگى كوميتەت تيمۋر قۇلىباەۆقا قارسى تاعى ءبىر تالاپ ارىز بەرگەنى بەلگىلى بولدى. بالكىم، «Bloomberg» ءدال وسى تەرگەۋدى ءسوز ەتىپ وتىرعان شىعار. ەگجەي-تەگجەيلى اقپارات الۋ قيىن، سەبەبى قۇلىباەۆتىڭ اكتيۆتەرى تۋرالى مالىمەتتەر كوميتەتتە «مەملەكەتتىك قۇپيانى ساقتاي» وتىرىپ اشىق ايتىلمايدى.

ەگەر كەلىسىمگە قول جەتكىزىلسە، وندا قۇلىباەۆقا قاراجاتتىڭ ءبىر بولىگىن تولەۋگە، ال قالعان بولىگىن ماڭىزدى جوبالارعا ينۆەستيتسيالاۋعا تۋرا كەلەدى. بۇل تۋرالى شەتەلدىك باق-قا وسى كەلىسسوزدەردىڭ بارىسىمەن تانىس ەكى ادام ايتىپ بەرگەن ەكەن. دەرەككوزدەر جاسىرىن بولعاندىقتان، بۇل اقپاراتتى راستاۋ مۇمكىن ەمەس. دەسەك تە، الدىن الا بەلگىلى بولعان مالىمەتتەر بويىنشا، قۇلىباەۆ پەن مەملەكەت اراسىنداعى مامىلە (ەگەر ول بولا قالسا) قۇلىباەۆقا قانداي دا ءبىر ايىپ تاعۋدى نەمەسە قولىنداعى بيلىگىن شەكسىز پايدالانعانى ءۇشىن كىناسىن مويىنداۋىن بىلدىرمەيدى.

«ەگەر كەلىسىمگە قول جەتكىزىلسە، نۇرسۇلتان نازارباەۆتىڭ كۇيەۋ بالاسى تيمۋر قۇلىباەۆ قاراجاتتىڭ ءبىر بولىگىن اقشامەن، ال ەكىنشى بولىگىن ينۆەستيتسيا تۇرىندە تولەيدى»، - دەپ حابارلايدى اگەنتتىك.

«بۇل رەتتە تولەم - ونىڭ كىناسىن مويىنداۋدى بىلدىرمەيدى», - دەپ ناقتىلايدى «Bloomberg» دەرەككوزدەرى.

قۇلىباەۆتىڭ وكىلى بۇل ماسەلەگە تىكەلەي تۇسىنىكتەمە بەرۋدەن باس تارتتى. بىراق: «كەز كەلگەن ەرىكتى جارنانى – «اكتيۆتەردى قايتارۋ» دەپ ويلاۋ قاتە»، - دەدى.

«وسى جىلدار ىشىندە قۇلىباەۆ ەلدىڭ ەكونوميكالىق جانە الەۋمەتتىك دامۋىنا ەلەۋلى ۇلەس قوستى جانە «وسى باعىتتا ۇكىمەتپەن ءوزارا ءىس-قيمىلدى جالعاستىرۋدا»، - دەپ جازادى «Bloomberg».

«Forbes Kazakhstan» 2024 جىلى تيمۋر قۇلىباەۆتى ەڭ باي بيزنەسمەندەر رەيتينگىندە 2-ورىنعا قويدى. ونىڭ جاعدايى 5 ملرد دوللار دەپ باعالانۋدا. «Forbes» ميللياردەرلەرىنىڭ جاھاندىق رەيتينگىندە ءبىرىنشى پرەزيدەنتتىڭ كۇيەۋ بالاسى 612-ءشى ورىندا تۇر.

زايىبى دينارا قۇلىباەۆامەن بىرگە ول «قازاقستان حالىق بانكى» اق-نى «المەكس» حولدينگتىك توبى ارقىلى باقىلاۋىندا ۇستايدى. سونىمەن قاتار ەرلى-زايىپتىلار «فيرما» المەكس پليۋس» جشس مەن «المەكس پروەكت» جشس-ءنى تەپە-تەڭدىك نەگىزدە بىرلەسە يەلەنەدى.

تيمۋر قۇلىباەۆ 100% «كاسپي مۇناي» اق، 51% «كريستالل مەنەدجمەنت» اق، 50% «Premier Development Company» جشس جانە ت.ب. كىرەتىن «Joint Resources» اق يەسى بولىپ تابىلادى. بۇدان باسقا، قۇلىباەۆتاردىڭ بيزنەس قۇرىلىمدارىنا الماتى، استانا، اتىراۋ، اقتوبە، اقتاۋ، شىمكەنت جانە دۋبايدا جالپى اۋدانى 1 ملن شارشى مەتردەن استام كوممەرتسيالىق جىلجىمايتىن مۇلىكتى جالعا الۋمەن جانە باسقارۋمەن اينالىساتىن «Mercury Properties» جشس كىرەدى.

مەملەكەت 2024 جىلى «كيپروس» جشس مەن «Joint Technologies» جشس ارقىلى ەكس-پرەزيدەنت نۇرسۇلتان نازارباەۆتىڭ كۇيەۋ بالاسى وليگارح تيمۋر قۇلىباەۆ باقىلاپ وتىرعان «تەك-قازاقستان» كومپانياسىنان 54 نىساندى الدى، دەپ حابارلايدى اگەنتتىكتىڭ ءتىلشىسى.

ءابىل-سەرىك الىاكبار

Abai.kz