پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى س.م. جۇمانعارينگە!  

بىلەسىزدەر، ءبىزدىڭ پارتيا قولعا العان سالالىق باعدارلامانىڭ ءبىرى «اۋىل اماناتى» دەپ اتالادى. ءۇش جىل بۇرىن ىسكە قوستىق. جەتىستىك جوق ەمەس. بار. تەك 2023 جىلى 100 ملرد. تەڭگە شاعىن نەسيە بەرىلدى. 15000 جاڭا جۇمىس ورنى اشىلدى. بىراق باعدارلامانىڭ ورىندالۋىنا كەلگەندە ايتىلىپ جاتقان سىن از ەمەس. ازىرگە، اۋىل حالقىنىڭ تابىسىن تولتىرۋعا ارنالعان ەلدەگى جالعىز جوبا – وسى بولعاندىقتان ودان ءۇمىت كۇتەتىن ەل كوپ. بىراق، سول ەلدىڭ بۇل جوباعا ايتار وكپە-نازى دا جوق ەمەس. نەگە بۇلاي؟

كاسىپتەن ءناسىبىن تاپقىسى كەلەتىندەردى اكىمدىك اۋرە سارساڭعا سالۋعا دايىن. ءالجۋاز الەۋمەتكە بيۋروكراتيا ءۇش-ءتورت ايلاپ قۇجات جيناتىپ، تابانىنان توزدىرادى. بۇل ءبىر.

ەكىنشىدەن بۇل جوبانى قارجىلاندىرۋ تەتىگى دە قارىن اشىتادى. نەگىزى جوبانىڭ باستى ماقساتى - 7 جىلدا 350 مىڭ جۇمىس ورنىن اشىپ، جىل سايىن كەمىندە 20-25 مىڭ تۇرعىنعا ميكرونەسيە بەرىلۋ كەرەك. بىراق بيۋدجەت تاپشىلىعىنا بايلانىستى، بىلتىر جوباعا بار بولعانى 20 ملرد. تەڭگە بولىنگەن. بۇنى ەكى دەپ قويىڭىز.

تاعى ءبىر وزەكتى ماسەلە كادر تاپشىلىعى. كووپەراتيۆتەردە ۆەتەرينار، زووتەحنيك، مەحانيزاتور، اگرونوم سياقتى ماماندار جەتىسپەيدى. سويتە تۇرا كووپەراتيۆ قىزمەتىنە كۇندەلىكتى مونيتورينگ پەن باقىلاۋ جۇرگىزۋ، اقپاراتتىق، كونسۋلتاتسيالىق جانە ادىستەمەلىك كومەك كورسەتۋ تۋرالى ايتقىمىز كەلەدى.

سوندىقتان وڭىرلەردەگى الەۋمەتتىك كاسىپكەرلىك كورپوراتسيالار (سپك) نەسيە ۇلەستىرىپ، نەمكەتتى دەپ قانا وتىرماي بىرىنشە كەزەكتە وڭىردەگى وسىنداي وزەكتى ماسەلەلەرگە دە ءمان بەرگەنى ءجون. ايتپەسە قازىر، اكىمدىكتەردى مازالايتىن ەكى-اق ماسەلە بار. نەسيە الاتىن ادامداردىڭ سانىن تولتىرۋ جانە بەرگەن اقشانى يگەرۋ. ءبىتتى.

وسى رەتتە، پيلوتتىق اۋىلدار جوباسى ءپرينتسيپىن مىندەتتى تۇردە قالدىرۋ قاجەت. ايتپەسە، جوبانىڭ ءمانى جوعالادى، جوبا تەك كرەديت بەرەتىن كەزەكتى باعدارلاما رەتىندە بايانسىزدىڭ كۇنىن كەشەدى.

ارينە، وسىدان ءبىراز بۇرىن پرەزيدەنت نازارىنا ۇسىنىلعان جامبىل وبلىسىنداعىداي بارلىعى باقۋاتتى بولمايتىنى انىق. بىراق، پيلوتتىق پرينتسيپ توقتاسا، وندا اۋىل كووپەراتيۆتەرىن قۇرۋدىڭ، تيىسىنشە، ليزينگكە تەحنيكا بەرۋدىڭ دە قاجەتى بولماي قالۋى مۇمكىن.

ەڭ قىزىعى، كووپەراتيۆتتەر قۇرۋ دەگەن نە؟ ونىڭ مەحانيزمى قانداي؟ بۇنى جەرگىلىكتى اتقارۋشى ورگانداردىڭ ءوزى تۇسىنبەي جاتادى. سوندا ونى قاراپايىم حالىق قايدان تۇسىنەدى؟

سوندىقتان ەڭ الدىمەن اۋىل تۇرعىندارى اراسىندا جالپى جوبا تۋرالى، سونىڭ ىشىندە اۋىل كووپەراتيۆتەرىنىڭ جۇرتقا، نارىققا بەرەتىن پايداسى مەن مۇمكىندىكتەرى تۋرالى ءتۇسىندىرۋ جۇمىستارىن شيراتقان ءجون.

سونداي-اق، اۋىل حالقىنىڭ تابىسىن كوتەرۋ ءۇشىن، تۇرعىنداردى اۋىل شارۋاشىلىعى بويىنشا تەحنولوگيالىق كارتالارعا وقىتۋ ماسەلەسى وتە وتكىر بولىپ تۇر. بۇنى مەملەكەت باسشىسى 2 قىركۇيەكتەگى جولداۋىندا ايتتى؟ سوزبە-ءسوز وقىپ بەرەيىن.

«پيلوتتى رەجيمدە «امانات» پارتياسىنىڭ مەركە اۋدانىندا اشقان «اگروساۋات» وقۋ ورتالىعىن بارلىق اۋدانداردا اشۋدى ۇكىمەتكە تاپسىرامىن»، - دەدى. بىراق، بۇل تاپسىرما بويىنشا ۇكىمەت تە، ءوڭىر اكىمدەرى دە قىلاۋداي شەشىم قابىلداماعان. بۇل ۇكىمەتكە، اكىمدىكتەرگە سىن.

بۇل جۇيەنى ىسكە قوسپاي، قالىپتاستىرماي اۋىل حالقىنىڭ تابىسىن كوتەرۋ مۇمكىن ەمەس. «اگروساۋات» ورتالىعى جۇيە قالىپتاستىراتىن، بىلمەگەنگە ۇيرەتەتىن، بىلگەنگە قولداۋ بولاتىن ورتالىق.

سوندىقتان، دەپۋتاتتىق ساۋالىمدى ۇلتتىق ەكونوميكا ءمينيسترى سەرىك جۇمانعارينگە جولداي وتىرىپ، «اگروساۋات» وقۋ ورتالىقتارىن اشۋ تۋرالى مينيسترلىكتىڭ جوسپارىمەن تەز ارادا تانىستىرۋىڭىزدى سۇرايمىن.

جالپى كرەديتتىڭ ءبارىن تەك مال ساتىپ الۋعا عانا بەرە-بەرۋگە بولمايدى. مال جاتقانعا ەمەس، باققانعا بىتەدى. ال ونى باعىپ قاعۋ ءۇشىن جايىلىمداردىڭ جايىن ايتپاعاندا، ەلدە ءالى كۇنگە دەيىن كوپكە ۇلگى بولاتىن جەم-ءشوپ دايىندايتىن ورتالىقتار جۇيەسى جوق. بۇل دا وزەكتى.

سونىمەن قاتار، قازىر شالعايداعى اۋىلعا ليزينگكە تراكتورلار بەرىلە باستادى. جاقسى باستاما. بىراق تەحنيكا ەرتەڭ سىنباي ما؟ وعان ارى قاراي قوسالقى بولشەكتەرىن قايدان الادى ەل؟ جاپپاي تراكتورلارعا قىزمەتتى كىم كورسەتەدى؟ تەحنيكانىڭ ساقتالۋىن كىم قامتاماسىز ەتەدى؟ قىسقاسى ايتا بەرسەڭ باسى اشىق سۇراقتار وتە كوپ. سوندىقتان سىزدەن، وسى ماسەلەلەرگە شۇعىل ارادا نازار اۋدارۋىڭىزدى سۇرايمىن.

قۇرمەتپەن، «AMANAT» پارتياسى  فراكتسياسىنىڭ مۇشەسى

تولىقباەۆ ماقسات مالىكۇلى 

Abai.kz