قورعانىس ءمينيسترىنىڭ ورىنباسارى شايح-حاسان جازىقباەۆ جەڭىستىڭ 80 جىلدىعىنا وراي وتەتىن شەرۋگە قانشا تەڭگە جۇمسالاتىنىن ايتتى.

بيىل ەلىمىز جەڭىستىڭ 80 جىلدىعىن اتاپ وتەدى. مەرەكەگە وراي، ەلوردادا 7 مامىردا شەرۋ وتەدى. شەرۋگە قانشا قارجى بولىنەدى دەگەن سۇراققا قورعانىس مينيسترلىگى رەسمي جاۋاپ بەردى.

«ۇلى جەڭىستىڭ 80 جىلدىعىنا ارنالعان اسكەري شەرۋدىڭ بيۋدجەتى شامامەن 2,5 ميلليارد تەڭگەنى قۇرايدى. قاراجات قورعانىس مينيسترلىگىنىڭ 2025 جىلعا ارنالعان جاۋىنگەرلىك دايىندىق ءىس-شارالارى ەسەبىنەن الىنادى», - دەپ جاۋاپ بەردى جازىقباەۆ.

ونىڭ سوزىنشە، قاراجات نەگىزىنەن شەرۋگە قاتىساتىن جەكە قۇرامنىڭ ءىسساپار شىعىندارى، شاتىرلى قالاشىقتى جابدىقتاۋعا ارنالعان ماتەريالداردى دايىنداۋعا، اسكەري جانە اۋە تەحنيكاسىن جانار-جاعارمايمەن قامتاماسىز ەتۋگە جۇمسالماق.

«ەلىمىزدىڭ باسقا وڭىرلەرىندە شەرۋ وتكىزۋگە قارجى ءبولۋ قاراستىرىلماعان. ۇلى جەڭىستىڭ 80 جىلدىعىنا ارنالعان اسكەري شەرۋ ەڭ الدىمەن قان مايداندا ەرلىكپەن قازا تاۋىپ، بولاشاق ۇرپاق ءۇشىن بەيبىت ءومىر سىيلاعان بوزداقتارعا، قازىرگى كوزى ءتىرى 120 سوعىس ارداگەرىنە ارنالعان قۇرمەت. ەكىنشىدەن، ەل حالقىنا جانە وسكەلەڭ ۇرپاققا قازاقستان اسكەرىنىڭ كۇش-قۋاتىن پاش ەتۋ. ۇشىنشىدەن، جاستاردىڭ بويىندا تۋعان جەرىنە، ءوز اسكەرىنە، اتا-بابا ەرلىگىنە پاتريوتتىق سەزىمدى قالىپتاستىرۋ», - دەپ جاۋاپ بەردى قورعانىس ءمينيسترىنىڭ ورىنباسارى شايح-حاسان جازىقباەۆ.

Abai.kz