پرەمەر-مينيستر ولجاس بەكتەنوۆتىڭ تاپسىرماسى بويىنشا ۇلىتاۋ وبلىسىنداعى تج ورنىندا ۆيتسە-پرەمەر قانات بوزىمباەۆتىڭ باسشىلىعىمەن ۇكىمەتتىك كوميسسيا جۇمىس ىستەپ جاتىر.

كوميسسيا قۇرامىندا ۇلىتاۋ وبلىسىنىڭ اكىمى داستان رىسپەكوۆ، تج ءمينيسترى شىڭعىس ءارىنوۆ، ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ، ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اقمادي سارباسوۆ، دەنساۋلىق ساقتاۋ ۆيتسە-ءمينيسترى ەرجان نۇرلىباەۆ، ونەركاسىپ جانە قۇرىلىس ۆيتسە-ءمينيسترى يران شارحان، قر تجم ونەركاسىپتىك قاۋىپسىزدىك كوميتەتى توراعاسىنىڭ مىندەتىن اتقارۋشى راشيد دۋباەۆ بار.

سۋرەت: primeminister.kz سايتىنان الىندى.

وقيعا ورنىندا تج قىزمەتى، ءىىم جانە ونەركاسىپتىك قاۋىپسىزدىك كوميتەتىنىڭ شۇعىل تەرگەۋ توبى، سونداي-اق ەڭبەك جانە حالىقتى الەۋمەتتىك قورعاۋ مينيسترلىگى مەن ونەركاسىپ جانە قۇرىلىس مينيسترلىگىنىڭ قىزمەتكەرلەرى جۇمىس ىستەپ جاتىر.

كوميسسيا مۇشەلەرى وقيعا ورنىندا بولىپ، تەرگەۋ بارىسىمەن تانىستى. قازا تاپقانداردىڭ وتباسىلارىنا ءبىرىنشى كەزەكتە كومەك كورسەتۋ جونىندە تاپسىرما بەرىلدى.

ءارى قاراي پرەمەر-ءمينيستردىڭ ورىنباسارى شتاب وتىرىسىن وتكىزىپ، قازا تاپقانداردىڭ تۋىستارىمەن كەزدەسەدى.

Abai.kz