ءماجىلىس دەپۋتاتى ماقسات تولىقباەۆ ەلىمىزدە فونوگراممامەن ءان سالۋعا تىيىم سالۋ باستاماسىن قايتا كوتەردى. ونىڭ ايتۋىنشا، فونوگراممامەن ءان سالعان جاعدايدا الدىمەن تىڭدارمانعا ەسكەرتۋ كەرەك.

«قولدانىستاعى زاڭ بويىنشا فونوگراممامەن ءان ايتقان كەزدە كونتسەرت ۇيىمداستىرۋشىلارى كورەرمەندەردى ەسكەرتۋگە مىندەتتى، ءانشى اۋزىن جىبىرلاتىپ فونوگراممامەن ايتادى دەۋ كەرەك. بىراق، بۇل ەرەجە مۇلدەم جۇمىس ىستەمەيدى. سوندىقتان ءبىز بۇل جوباسىندا فونوگراممامەن ءان سالۋعا تىيىم سالۋدى بەلگىلەۋگە باعىتتالعان تۇزەتۋلەر ەنگىزۋدى ۇسىندىق، بىراق مادەنيەت جانە اقپارات مينيسترلىگى قولداماي وتىر، ايتاتىن سىلتاۋ كوپ، وڭىرلەردەگى تەحنيكالىق قۇرالداردىڭ 70%-ى توزعان دەيدى. جارايدى دەپ، نورمانى جەڭىلدەتىپ بەردىك، كونتسەرت زالى تەحنيكالىق قۇرالدارمەن تولىق قامتاماسىز ەتىلسە، فونوگراممانى پايدالانۋعا تىيىم سالىنادى دەدىك، بىراق بۇل نورما دا وتپەي وتىر. تاعى ءبىر سىلتاۋ بىلىكتى دىبىس رەجيسسەرلەرى جەتىسپەيدى ەكەن، سۇرانىس بولماعان سوڭ ارينە جەتىسپەيدى. فونوگراممانى الىپ تاستاسا، ەڭ قىمبات گونوراردى دىبىس رەجيسسەرلەرى الادى. ودان بولەك، تاعى ءبىر جەڭىلدىك ۇسىندىق، ەگەر كونتسەرت وتەتىن ورىن جابدىقتالماسا، مىسالى، كونتسەرت ستاديوندا وتسە، اۋديتوريانى حاباردار ەتە وتىرىپ، فونوگراممانى پايدالانۋعا رۇقسات ەتىلەدى دەدىك، بۇعان دا قارسى بولىپ وتىرسىزدار»، - دەدى ماقسات تولىقباەۆ ءماجىلىستىڭ جالپى وتىرىسىندا.

حالىق قالاۋلىسى كوتەرگەن فونوگرامما ماسەلەسىنە قاتىستى مادەنيەت جانە اقپارات ۆيتسە-ءمينيسترى ايبەك سىدىقوۆ تۇسىنىك بەردى.

«فونوگرامماعا قاتىستى بىرنەشە جۇمىس توبىنىڭ وتىرىسى ءوتتى، قىزۋ تالقىلانىپ جاتىر. مەملەكەتتىك ورگان رەتىندە مامانداردىڭ پىكىرىن تىڭداپ، مۇددەلى جانداردىڭ باسىن قوسىپ، اشىق تالقىلاۋ كەرەك دەگەن مامىلەگە كەلدىك. 11 ناۋرىزدا شوۋ بيزنەس وكىلدەرى، مادەني مەكەمەلەر باسشىلارى، رەجيسسەرلەر جانە باسقا ماماندارمەن سىزدەر ۇسىنعان مەحانيزمدەردى تالقىلاپ، ەگجەي-تەگجەيلى پىسىقتاپ ماجىلىستەگى زاڭ جوباسىنىڭ ەكىنشى وقىلىمىنا دەيىن ءبىر شەشىمگە كەلەمىز دەگەن سەنىمدەمىن»، - دەپ جاۋاپ بەردى ءمينيستردىڭ ورىنباسارى.

ۆيتسە-مينيستر فونوگراممامەن كونتسەرت وتەتىن كەزدە كورەرمەندەردى ەسكەرتۋ ءىس جۇزىندە ورىندالماي وتىرعانىن مويىندادى.

ەسكە سالا كەتسەك، ەلىمىزدە فونوگراممانى ەسكەرتۋسىز قولدانۋ زاڭمەن قاداعالاناتىنى 2020 جىلدان بەرى ايتىلىپ كەلەدى.

بىلتىر مادەنيەت جانە اقپارات ءمينيسترى ايدا بالاەۆا فونوگراممامەن ءان ايتۋ، اۆتورلىق قۇقىق ماسەلەسى زاڭ ارقىلى رەتتەلەتىنىن ايتقان ەدى.

بۇگىن ءماجىلىس «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت جانە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى.

Abai.kz