ۋكراينا پرەزيدەنتى جۇما كۇنى اق ۇيدە اقش پرەزيدەنتى ترامپپەن، ونىڭ ورىنباسارى ۆەنسپەن ءسوز تالاستىرىپ، كەلىسىمگە كەلە الماي كەرى قايتقاننان كەيىن اقش-تىڭ جوعارى لاۋازىم يەلەرىنىڭ پوزيتسيالارى قاتقىل شىعا باستادى.

ترامپتىڭ ۇلتتىق قاۋىپسىزدىك ماسەلەلەرى بويىنشا كومەكشىسى مايكل ۋولتس 2-ءشى ناۋرىزدا CNN ارناسىنا بەرگەن سۇحباتىندا: «امەريكا قۇراما شتاتتارىنا اقش-پەن دە، رەسەيمەن دە شۇيىركەلەسە الاتىن ءارى قاقتىعىستى توقتاتا الاتىن ۋكراينا كوشباسشىسى قاجەت»، - دەدى. ول سونداي-اق: «زەلەنسكيدىڭ جەكە جانە ساياسي ۇستانىمى ۋكراينا قاقتىعىسىن رەتتەۋمەن قابىسپاسا، ءبىز كۇردەلى ماسەلەگە تاپ بولامىز»، - دەدى.

اقش وكىلدەر پالاتاسىنىڭ سپيكەرى مايك دجونسون دا 2-ءسى كۇنى امەريكاندىق باق-قا بەرگەن سۇحباتىندا: «زەلەنسكي بايسالدى قالپىن قايتا تاۋىپ، العىس سەزىممەن كەلىسسوز ۇستەلىنە وتىرۋى كەرەك، ويتپەگەندە ۋكراينانى باسقا ادام باسقاراتىن بولادى»، - دەدى. ول زەلەنسكيدىڭ اق ۇيدەگى ارەكەتى ونىڭ بەيبىتشىلىك كەلىسىمىنە دايىن ەمەستىگىن كورسەتتى، ءۇمىتتى اقتامادى دەپ سانايدى.

اقش مەملەكەتتىك حاتشىسى رۋبيو دا 2-ءشى كۇنى باق وكىلدەرىنە زەلەنسكيدىڭ اق ۇيدە ايتقان سوزدەرى ۋكرايناداعى قاقتىعىستى كەلىسسوزدەر ارقىلى توقتاتۋ ارەكەتتەرىنە «قايشى» ەكەنىن ايتتى. ول 28 اقپاننان بەرى «زەلەنسكيمەن جانە ۋكراينا سىرتقى ىستەر ءمينيسترى سەربيگامەن ەشقانداي بايلانىستا بولماعانىن» جەتكىزدى. دەسە دە ۋكرايناداعى قاقتىعىستى توقتاتۋ قۇلشىنىستارى قايتا باستالاتىنىن ايتتى.

ال زەلەنسكي بولسا، قازىرگى كۇردەلى كەزەڭدە ءوزىن پرەزيدەنتىكتەن كەتىرۋدىڭ وتە قيىنعا سوعاتىنىن جەتكىزدى. ول اعىلشىن ارناسىنا بەرگەن سۇحباتىندا: «ەگەر ولار مەنى اۋىستىرعىسى كەلسە، قازىرگى قيىن جاعدايمەن، ەلدىڭ ماعان دەگەن قولداۋىمەن ساناسۋى كەرەك. مەنى ورنىمنان ىعىستىرۋ وڭايعا سوقپايدى. سايلاۋ وتكىزۋمەن ماسەلە شەشىلمەيدى. ول ءۇشىن مەنى سايلاۋدان شەتتەتۋلەرىڭ كەرەك. ول قيىننىڭ قيىنى، اينالىپ كەلىپ مەنىمەن كەلىسسوز وتكىزۋگە ءماجبۇر بولاسىڭدار»، - دەدى. ول ءوزىنىڭ باستى ماقساتى ناتو-عا كىرۋ ەكەنىن، سول تىلەگى ورىندالعاندا عانا پرەزيدەنتتىكتەن ءوز ەركىمەن كەتەتىنىن تاعى قايتالادى.

Abai.kz