بۇگىن، ناۋرىزدىڭ 11-كۇنى ساۋد ارابياسىندا اقش پەن ۋكراينانىڭ جوعارى شەندى وكىلدەرى ۋكراينا مەن رەسەي اراسىنداعى 3 جىلعا سوزىلعان سوعىستى توقتاتۋ تۋرالى كەلىسسوزدى باستايدى.

كەشە ۋكراينا پرەزيدەنتى زەلەنسكي ساۋد ارابياسىنا بارىپ، تاق مۇراگەرى مۇحاممەت سالمانمەن كەزدەستى. كەزدەسۋدەن كەيىن زەلەنسكي جازبا جاريالاپ، ەكەۋارا كەزدەسۋدىڭ دوستىق پەيىلدە وتكەنىن جەتكىزدى. ساۋديا بيلىگىنىڭ الەمدىك جانە ۋكراينا ماسەلەسىندە اراعايىندىق بولىپ وتىرعانىنا العىس ءبىلدىردى.

مۇحاممەد حانزادا كەشە اقش مەملەكەت ىستەر حاتشىسى ماركو رۋبيونى دا قابىلدادى. ەكى تاراپ ۋكراينا ماسەلەسىنەن بولەك، ورتا شىعىستاعى جاعدايدى تالقىلاعان.

ايتا كەتۋ كەرەك زەلەنسكي بۇگىن وتەتىن اقش پەن ۋكراينا كەلىسسوزىنە قاتىسپايدى. اقش تارابىنان مەملەكەتتىك حاتشى رۋبيو، ترامپتىڭ مەملەكەت قاۋىپسىزدىگى جونىندەگى كومەكشىسى ۆالس، ورتا شىعىس ماسەلەسى جونىندەگى ءارناۋلى وكىلى ۋيتكوفف، ۋكراينا جاعىنان پرەزيدەنتتىڭ ءىس باسقارۋشىسى ەرماك، سىرتقى ىستەر ءمينيسترى سيبيگا، قورعانىس ءمينيسترى ۋمەروۆ قاتارلىلار قاتىسادى.

كەلىسسوز تۋرالى اقش تارابىنان ۋيتكوفف: "كەزدەسۋدىڭ ماقساتى بەيبىتشىلىك كەلىسىمىنىڭ مازمۇنىن، شارتتارىن انىقتاۋ ءارى سوعىس توقتاتۋدىڭ باستاپقى جۇلگەسىن بەكىتۋ", - دەسە، رۋبيو: "ۋكراينا تاراپتىڭ بىتىمگە كەلۋگە دايىندىعىن تەكسەرىپ كورۋ", - دەيدى. ول تاعى دا ۋكراينا تاراپقا مىنانى ىستە دەپ ەشقانداي شارت قويىلمايتىنىن، ولاردىڭ پىكىرىن تىڭداپ كورۋ ماقساتىندا وتەتىنىن، ولارعا ويلانۋعا ءتيىستى كەيبىر ماسەلەلەر ورتاعا سالىناتىنىن جەتكىزدى. كەزدەسۋ بارىسىندا ۋكراينانىڭ سيرەك ماتاللدار قورىن يگەرۋ ماسەلەسى دە تالقىلانادى ەكەن.

ترامپ بولسا ءالى دە: "زەلەنسكي بەيبىتشىلىك كەلىسىمىنە قول قويۋعا دايىن ەمەس", - دەگەن پىكىردە ەكەن.

وتكەن ءبىر اپتا زەلەنسكي ءۇشىن، ۋكراينا ءۇشىن وتە اۋىر بولعان. امەريكانىڭ اسكەري قارۋ-جاراق بەرۋدى، ساندىق مالىمەتتەردى ءبودىسۋدى توقتاتۋى رەسەيگە جاڭا مۇمكىندىك بەرگەندەي. ۋكرايناعا شابۋىلدى بارلىق باعىتتا كۇشەيتتى.

زەلەنسكيگە اق ۇيدەگى قاتەلىگى ءۇشىن ۇلكەن بوداۋ بەرۋگە تۋرا كەلدى. ەۋروپا ەلدەرى بۇرىنعىداي قۇرعاق ۋادە بەرۋمەن عانا شەكتەلدى. اسكەري كومەكتىڭ قاراسى ءالى كورىنبەدى. بۇل جاعدايعا كرەمل تارابى شاتتانىپ وتىر دەيدى ساراپشىلار. ولار بۇگىن وتەتىن اقش پەن ۋكراينا كەلىسسوزىنىڭ ءوز پايداسىنا شەشىلەتىنىنە بەك سەنىمدى ەكەن.

Abai.kz