ساۋالناماعا قاتىسقانداردىڭ 70%-دان استامى ەلدىڭ دۇرىس باعىتتا دامىپ كەلە جاتقانىن ايتادى.

قوعامدىق ساياسات ينستيتۋتىنىڭ زەرتتەۋ ناتيجەلەرىنە سايكەس، رەسپوندەنتتەردىڭ 70%-دان استامى قازاقستاننىڭ دۇرىس باعىتتا دامىپ كەلە جاتقانىن اتاپ وتكەن. مۇنداي پىكىر اسىرەسە اۋىل تۇرعىندارى (80,7%), 24 جاسقا دەيىنگى جاستار (78,9%) جانە ايەلدەر (72,2%) اراسىندا كەڭ تارالعان.

حالىقتىڭ قازىرگى ساياسي جانە الەۋمەتتىك-ەكونوميكالىق جاعدايعا بەرگەن باعاسى سالىستىرمالى تۇردە ءبىرشاما ۇستامدى ءوپتيميزمدى كورسەتەدى – سايكەسىنشە 76,5% جانە 67%.

بۇل ناتيجەلەر ەلدە جۇرگىزىلىپ جاتقان رەفورمالارعا دەگەن وڭ كوزقاراسپەن بايلانىستى. ماسەلەن، قوعامدىق-ساياسي سالادا ازاماتتارعا اۋىل جانە اۋدان اكىمدەرىن تىكەلەي سايلاۋ مۇمكىندىگى بەرىلدى، سايلاۋ جۇيەسى اشىق بولا ءتۇستى، كونستيتۋتسيالىق سوت قايتا قالپىنا كەلتىرىلدى، ال گەندەرلىك تەڭدىك باستامالارى ايەلدەرگە ساياسات پەن قوعامدىق ومىرگە بەلسەندى قاتىسۋ ءۇشىن جاڭا مۇمكىندىكتەر اشتى.

الەۋمەتتىك-ەكونوميكالىق سالاداعى وزگەرىستەر بيۋدجەت سالاسى قىزمەتكەرلەرىنىڭ تابىسىن ايتارلىقتاي ارتتىرۋعا، اۋقىمدى قولداۋ باعدارلامالارىن ىسكە قوسۋعا، جەر رەسۋرستارىنا ءادىل قولجەتىمدىلىكتى قامتاماسىز ەتۋگە، سونداي-اق قاۋىپتى جانە زياندى وندىرىستەردە جۇمىس ىستەيتىندەر ءۇشىن زەينەت جاسىن تومەندەتۋگە مۇمكىندىك بەردى.

جالپى، ساۋالناما ناتيجەلەرى بويىنشا رەسپوندەنتتەردىڭ 89%-ى ءوز كوڭىل-كۇيىن وڭ دەپ سيپاتتاعان. ءپوزيتيۆتى كوزقاراس كوبىنەسە 18-35 جاس ارالىعىنداعى جاستارعا، بويداق نەمەسە وتباسىلى ازاماتتارعا جانە جوعارى ءبىلىمى بار رەسپوندەنتتەرگە ءتان.

Abai.kz